ବାରଙ୍ଗ,୨୩ା୧୦(ଡି.ଏନ୍.ଏ.): ଚନ୍ଦକା ଥାନା ଅଧୀନସ୍ଥ ଗ୍ରାମଡ଼ିହଠାରେ ଥିବା ଏକ ପାନୀୟଜଳ କମ୍ପାନୀ ଉପରେ ଗୁରୁବାର ପୋଲିସ ଚଢ଼ାଉ କରିଛି। ଏହି କମ୍ପାନୀ ଏକ ନାମୀ ଘରୋଇ ବ୍ରାଣ୍ଡ ପାନୀୟ ଜଳ କମ୍ପାନୀର ଲୋଗୋ ବ୍ୟବହାର କରି ପାଣି ପ୍ୟାକେଟ ବିକ୍ରି କରୁଥିବା ଅଭିଯୋଗରେ ପୋଲିସ ୨ଜଣଙ୍କୁ ଗିରଫ କରିିଛି। ସେମାନେ ହେଲେ କମ୍ପାନୀର ମ୍ୟାନେଜର ବ୍ରହ୍ମଗିରି ଥାନା ଅଧୀନ ଜଉଖିଆ ଗ୍ରାମର ସର୍ବେଶ୍ୱର ଦାସ ଓ ସୁପରଭାଇଜର ନୟାଗଡ଼ ଥାନା ଅଧୀନ ନବଘନପୁର ଗ୍ରାମର ହରିହର ସାହୁ। ଏହାସହ ସେଠାରୁ ପାଣିବୋତଲ, ଛାଞ୍ଚ, ଖାଲି ପାଣି ବୋତଲ, ଲେବଲିଂ ଷ୍ଟିକର, ବୋତଲ ଠିପି, ୨ଟି ମେଶିନ ସହ ବିଭିନ୍ନ ବ୍ରାଣ୍ଡର ଛାଞ୍ଚ ସହ ପାନୀୟ ଜଳ ଉତ୍ପାଦନର ସମସ୍ତ ସାମଗ୍ରୀକୁ ଜବତ କରାଯାଇଛି। ସୂଚନା ଅନୁଯାୟୀ, ଗ୍ରାମଡିହଠାରେ ଥିବା ଲକ୍ଷ୍ମୀପାନୀୟ ନାମକ କମ୍ପାନୀ ଏକ ନାମୀ ପାନୀୟଜଳ କମ୍ପାନୀଠାରୁ ଚୁକ୍ତିନାମା କରି ସେହି ବ୍ରାଣ୍ଡର ପାନୀୟ ଜଳ ତିଆରି କରି ବିକ୍ରି କରୁଥିଲେ। କିନ୍ତୁ କମ୍ପାନୀ ସହ କିଛିଦିନ ହେବ ଚୁକ୍ତିନାମା ସରିଯାଇଥିଲେ ମଧ୍ୟ ଉକ୍ତ କମ୍ପାନୀ ସେହି ଲୋଗୋକୁ ବ୍ୟବହାର କରୁଥିଲେ। ଏହା ଜଣାପଡ଼ିବା ପରେ ନାମୀ ପାନୀୟ ଜଳ କମ୍ପାନୀର ଜଣେ ଅଧିକାରୀ ଦିଲ୍ଲୀର ବିଜୟ କୁମାର ଚନ୍ଦକା ଥାନାରେ ମଙ୍ଗଳବାର ଲିଖିତ ଅଭିଯୋଗ କରିଥିଲେ। ଥାନାଧିକାରୀ ଦେବେନ୍ଦ୍ର ବିଶ୍ୱାଳ ନଂ.୧୮୨/୨୦ରେ ଏକ ମାମଲା ରୁଜୁକରି ବୁଧବାର ରାତିରେ ଉକ୍ତ କମ୍ପାନୀ ଉପରେ ଚଢ଼ାଉ କରିଥିଲେ। ଏହି ସମୟରେ କମ୍ପାନୀ ମାଲିକ ଲକ୍ଷ୍ମୀକାନ୍ତ ନାୟକ ନ ଥିବାରୁ ମ୍ୟାନେଜର ଓ ସୁପରଭାଇଜରଙ୍କୁ ପଚରାଉଚୁରା କରିଥିଲେ। ପୋଲିସ ଯାଞ୍ଚ ବେଳେ ନାମୀ କମ୍ପାନୀର ବିନା ଲାଇସେନ୍ସ ଓ ପ୍ରାଧିକରଣ ବିନା ବେଆଇନ ଭାବେ ପାନୀୟ ଜଳ ପ୍ୟାକେଟ ଉତ୍ପାଦନ କରୁଥିବା ଜଣାପଡ଼ିଥିଲା। ଯଦିଓ ନାମୀ କମ୍ପାନୀ ଦ୍ୱାରା ଚୁକ୍ତିନାମା ସରିଯାଇଛି କିନ୍ତୁ ତା’ର ଛାଞ୍ଚ ଓ ସମାନ ଲେବୁଲ ବ୍ୟବହାର କରି ପ୍ୟାକେଟ କରୁଥିଲେ। ଏହାପରେ ୨ଜଣଙ୍କୁ ଗିରଫ କରିଥିଲେ।
