ଭୁବନେଶ୍ୱର,୧୬।୧(ବ୍ୟୁରୋ):ହକି ବିଶ୍ୱକପ୍ ଓ ଡଟ୍ ଫେଷ୍ଟ ପାଇଁ ପୋଲିସ ରାସ୍ତାଘାଟଠାରୁ ଆରମ୍ଭ କରି ଛକ ଛକରେ ଚେକିଂ କରିବା ସହ ପଇଁତରା ମାରୁଛି। ଏପଟେ ମୋ ବସ୍ ଭିତରେ ଭିଡର ସୁଯୋଗ ନେଇ ଲୁଟେରା ଓ ଚୋର ଗ୍ୟାଙ୍ଗ ପୁଣି ମାତିଛନ୍ତି। ଗୋଟିଏ ଦିନରେ ମୋ ବସ୍ ଭିତରୁ ୨ଜଣ ଛାତ୍ରଙ୍କଠାରୁ ୨ଟି ମୋବାଇଲ ଫୋନ୍ ଚୋରି କରି ଦୁର୍ବୃତ୍ତମାନେ ଖସି ପଳାଇଛନ୍ତି। ଚୋରିର ଶିକାର ହୋଇଥିବା ଛାତ୍ରଦ୍ୱୟ ହେଲେ ଦେବାଶିଷ ଦାଶ ଓ ରଶ୍ମିରଞ୍ଜନ ସାହୁ। ସେମାନେ ଜୟଦେବ ବିହାରରୁ ୧୮ ନମ୍ବର ମୋ ବସ୍ରେ ଯାଉଥିବାବେଳେ ଏହି ଘଟଣା ଘଟିଛି। ଚୋରି ସମ୍ପର୍କରେ ଜାଣିବା ପରେ ଛାତ୍ରଦ୍ୱୟ ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଛି ।
ସୂଚନାନୁସାରେ, ରବିବାର ପୂର୍ବାହ୍ନ ୧୧ଟାରେ ଆଚାର୍ଯ୍ୟ ବିହାରରେ ରହୁଥିବା ଦେବାଶିଷ ଘରକୁ ଯିବା ଲାଗି ଜୟଦେବ ବିହାରକୁ ଆସି ମୋ ବସ୍ରେ ଚଢିଥିଲେ। କିଛି ବାଟ ଯିବା ପରେ ମେ’ ଫେୟାର ଛକ ଆଗକୁ ତାଙ୍କ ପକେଟରେ ମୋବାଇଲ ଫୋନ୍ ନ ଥିବା ଜାଣିବାକୁ ପାଇଥିଲେ। ଏହାପରେ ବସ୍ରେ ବସିଥିବା ଯାତ୍ରୀଙ୍କୁ ପଚରାଉଚରା କରିବା ସହ ବସ୍ କର୍ମଚାରୀଙ୍କୁ ଜଣାଇଥିଲେ। କର୍ମଚାରୀମାନେ ବସ୍ ରଖି ଯାଞ୍ଚ କରିଥିଲେ ମଧ୍ୟ ମୋବାଇଲ ଫୋନ୍ ମିଳି ନ ଥିଲା। ଏପରିକି ଉକ୍ତ ମୋବାଇଲକୁ ଫୋନ୍ କରାଯାଇଥିଲେ ମଧ୍ୟ ତାହା ସୁଇଚ୍ ଅଫ ଦେଖାଇଥିଲା। ସେହିପରି ମୋ ବସ୍ରେ ଯାଉଥିବା ଅନ୍ୟଜଣେ ଛାତ୍ର ରଶ୍ମିରଞ୍ଜନ ମଧ୍ୟ ଚୋରିର ଶିକାର ହୋଇଥିଲେ। ସେ ପରୀକ୍ଷା ଦେବାକୁ ଜୟଦେବ ବିହାରରୁ ପଟିଆ ଅଭିମୁଖେ ଯାଉଥିବାବେଳେ ଓମ୍ଫେଡ୍ ଛକଟି ମୋବାଇଲ ନ ଥିବା ଜାଣିବାକୁ ପାଇଥିଲେ। ଏହାପରେ ଚିତ୍କାର କରିବାରୁ ସେଠାରେ ଗାଡି ଅଟକି ଲୋକଙ୍କୁ ପୋଲିସ ଉପସ୍ଥିତିରେ ଯାଞ୍ଚ କରାଯାଇଥିଲା। ଏହି ସମୟରେ କିଛି ସମୟ ଯାତ୍ରୀଙ୍କ ମଧ୍ୟ ଅସନ୍ତୋଷ ପ୍ରକାଶ ପାଇବା ସହ ଉତ୍ତେଜନା ଦେଖାଯାଇଥିଲା। ବସ୍ ଭିତରେ ଲାଗିଥିବା ସିସିଟିଭିକୁ ଯାଞ୍ଚ କରାଯିବା ସହ ପକେଟ ମାର୍ କରିଥିବା ଦୁର୍ବୃତ୍ତଙ୍କୁ ଧରିବାକୁ ପୋଲିସ ତନାଘନା ଆରମ୍ଭ କରିଛି। ଅନ୍ୟପଟେ ଜନସାଧାରଣଙ୍କ ସୁବିଧା ପାଇଁ ଚାଲୁ ହୋଇଥିବା ମୋ ବସ୍ ସେବା ଏବେ ଲୋକଙ୍କ ପାଇଁ ପାଲଟିଛି ଅସୁବିଧା। ବାରମ୍ବାର ମୋ ବସରୁ ଚୋରି ହେଉଥିବା ନେଇ ବିଭିନ୍ନ ଥାନାରେ ଅଭିଯୋଗ ହେଉଛି। ପୋଲିସ୍ର କାର୍ଯ୍ୟାନୁଷ୍ଠାନ ସତ୍ତ୍ୱେ ମୋ ବସ୍ରେ ଚୋରି ର଼୍ୟାକେଟ ସକ୍ରିୟ ରହିଛି।
