କାନବେରା,୨୬।୨: ଅଷ୍ଟ୍ରେଲିଆ ପୋଲିସ ଏମିତି ଜଣେ ବ୍ୟକ୍ତିଙ୍କୁ ଖୋଜୁଛି ଯାହାଙ୍କ ମୁଣ୍ଡରେ ସ୍ବସ୍ତିକ ଚିହ୍ନ ଅଙ୍କାଯାଇଛି। ଏହି ବ୍ୟକ୍ତି ଜଣକ ମା ଏବଂ ଝିଅ ଉପରେ ମରଣାନ୍ତକ ଆକ୍ରମଣ କରିଥିଲେ। ଏଥିରେ ମହିଳାଙ୍କ ହାତ ଜଳି ଯାଇଥିଲା। ମାତ୍ର ଝିଅର କୌଣସି କ୍ଷତି ଘଟି ନ ଥିଲା।
ଏହି ଘଟଣା ଅଷ୍ଟ୍ରେଲିଆର ପର୍ଥରେ ହୋଇଥିଲା। ପୋଲିସ ପ୍ରଶାସନ ଏହି ମାମଲାରେ ସିସିଟିଭି ଫୁଟେଜ ଯାଞ୍ଚ କରିଥିଲା। ଏହି ଫୁଟେଜରୁ ବ୍ୟକ୍ତି ଜଣକ ମୁଣ୍ଡରେ ସ୍ବସ୍ତିକ ଚିହ୍ନ ଆଙ୍କିଥିବା ଦେଖିବାକୁ ପାଇଥିଲା ପୋଲିସ। ଯାହା ଭୁଲ ତରିକାରେ ଅଙ୍କା ଯାଇଥିଲା।
ଏ ସମ୍ପର୍କରେ ଡିଟେକ୍ଟିଭ୍ ସିନିୟର ସର୍ଜେଣ୍ଟ ସଚିନ ବେଲ୍ କହିଛନ୍ତି ଯେ, ଉକ୍ତ ବ୍ୟକ୍ତିଙ୍କ ଦ୍ୱାରା କରାଯାଇଥିବା ଆକ୍ରମଣ ଅତ୍ୟନ୍ତ ନିନ୍ଦନୀୟ। ରାତିରେ ଭୋଜନ କରିବାକୁ ଯାଉଥିବା ମା’ ଏବଂ ଝିଅଙ୍କ ଉପରେ ହୋଇଥିବା ଏହି ଆକ୍ରମଣକୁ ସହଜରେ ଗ୍ରହଣ କରାଯାଇପାରିବ ନାହିଁ। ଏହି ମାମଲା ଅତ୍ୟନ୍ତ ଗମ୍ଭୀର। ସେ ଆହୁରି କହିଛନ୍ତି ଯେ, ଏହି ବିଷୟକୁ ଅତି ଗମ୍ଭୀରତାର ସହିତ ନେଉଛୁ। ଏପରି ଆଚରଣ ସଭ୍ୟ ସମାଜ ପାଇଁ ଆଦୌ ଗ୍ରହଣୀୟ ନୁହେଁ। ଆମେ ଏହାର କାରଣ ଖୋଜୁଛୁ। ଯଦି ଏହି ବ୍ୟକ୍ତିଙ୍କ ସମ୍ପର୍କରେ କୌଣସି ସୂଚନା ଅଛି ଆମ ସହ ଶେୟାର କରନ୍ତୁ ବୋଲି ପର୍ଥ ପୋଲିସ କହିଛି।
