ଛତ୍ରପୁର,୨୧ା୬(ଦିଲୀପ ସାମଲ): ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଅଞ୍ଚଳରେ ହୋଇଥିବା ଏକ ଡକାୟତି ଅଭିଯୋଗର ୨୪ ଘଣ୍ଟା ନ ପୁରୁଣୁ ଗ୍ୟାଙ୍ଗର ୭ ଜଣଙ୍କୁ ପୋଲିସ ରବିବାର ଗିରଫ କରିଛି। ସେମାନଙ୍କଠାରୁ ବନ୍ଧୁକ, ଗୁଳି, ଲୁଟ୍ରେ ବ୍ୟବହୃତ ଜିନିଷ ଓ ଚୋରି ଟଙ୍କା ଏବଂ ସୁନା କବିସୂର୍ଯ୍ୟନଗର ପୋଲିସ ଜବତ କରିଥିବା ଗଞ୍ଜାମ ଏସ୍ପି ହରିଶ ବି. ସି. ସୂଚନା ଦେଇଛନ୍ତି। ଗିରଫ ଅଭିଯୁକ୍ତମାନେ ହେଲେ ସନ୍ତୋଷ ମହାପାତ୍ର, ମନୋରଞ୍ଜନ ଗୌଡ଼, ରୁଦ୍ରନାରାୟଣ ସେଠୀ, ଶୁଭମ ରାଉତ, ଜିତେନ୍ଦ୍ର ଖଟେଇ ଓରଫ ହିନ, ଦୂତିକୃଷ୍ଣ ନାୟକ ଓ ରାଜୀବ କୁମାର ଦାସ। ଏହି ଅପରାଧରେ ସମ୍ପୃକ୍ତ ଅନ୍ୟ ୨ ଅଭିଯୁକ୍ତ ହିତେଶ ସ୍ବାଇଁ ଏବଂ ଶ୍ୱେତା ଖଟେଇ ଫେରାର ଅଛନ୍ତି । ସେମାନଙ୍କୁ ଧରିବା ପାଇଁ ପୋଲିସ ଚେଷ୍ଟା ଜାରି ରହିଛି । ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରି ୧୫ ଦିନିଆ ନ୍ୟାୟିକ ହାଜତ ପାଇଁ ପୋଲିସ ଅନୁରୋଧ କରିଛି। ମାମଲାର ଅଧିକ ତଦନ୍ତ ଜାରି ରହିଥିବା ଏସ୍ପି କହିଛନ୍ତି।
ଗତ ୧୯ ତାରିଖ ରାତିରେ ଦୁର୍ବୃତ୍ତମାନେ କବିସୂର୍ଯ୍ୟନଗର ଥାନା ଅନ୍ତର୍ଗତ ଗୋକୁଳପଲ୍ଲୀ ଗ୍ରାମର ରଜନୀକାନ୍ତ ମିଶ୍ରଙ୍କ ଫାର୍ମ ହାଉସ ଭିତରକୁ ବନ୍ଧୁକ ଧରି ଯାଇଥିଲେ। ରଜନୀକାନ୍ତ ଏବଂ ତାଙ୍କ ସ୍ତ୍ରୀଙ୍କୁ ଭୟଭୀତ କରି ବାନ୍ଧି ଦେଇଥିଲେ। ପରେ ସେମାନେ ଉକ୍ତ ଘରୁ ୧୫ ତୋଳା ସୁନା ଅଳଙ୍କାର, ୧୨,୫୦୦ ଟଙ୍କା ଓ ୨ଟି ମୋବାଇଲ ଫୋନ ଲୁଟ କରି ନେଇଥିଲେ।
୨୦ ତାରିଖ ଭୋରରେ ରଜନୀକାନ୍ତ ଏ ନେଇ କବିସୂର୍ଯ୍ୟନଗର ଥାନାରେ ଏତଲା ଦେଇଥିଲେ। ପୋଲିସ ବିଏନଏସ ଧାରା ୩୧୦ (୨) ସହ ୨୫/୨୭ ଆର୍ମସ ଆକ୍ଟ ଅନୁଯାୟୀ ଥାନାରେ ୪୦୭/୨୬ ରେ ଏକ ମାମଲା ରୁଜୁ କରିଥିଲା। ଏସ୍ପିଙ୍କ ନିର୍ଦ୍ଦେଶକ୍ରମେ ପୁରୁଷୋତ୍ତମପୁର ଏସଡିପିଓ ସୁଜିତ କୁମାର ନାୟକ ଏକ ତଦନ୍ତକାରୀ ଦଳ ଗଠନ କରିଥିଲେ।
ବିଶ୍ୱସ୍ତ ସୂତ୍ରରୁ ଖବରପାଇ କଙ୍କଣା ମନ୍ଦିର ନିକଟସ୍ଥ ଜଙ୍ଗଲ ଭିତରେ ପୋଲିସ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲା। ସେମାନଙ୍କ ଠାରୁ ଗୋଟିଏ ଦେଶୀ ବନ୍ଧୁକ, ୩ଟି ଜୀବନ୍ତ ଗୁଳି, ରୂପା ଅଳଙ୍କାର, ୧୨୫୦୦ ଟଙ୍କା, ମୋବାଇଲ ଫୋନ ଏବଂ ୨ଟି ମଟରସାଇକେଲ ଜବତ ହୋଇଛି। ଅଭିଯୁକ୍ତ ସନ୍ତୋଷ ଏବଂ ମନୋରଞ୍ଜନ ଅଭିଯୋଗକାରୀ ରଜନୀକାନ୍ତଙ୍କ ଆର୍ଥିକ ସ୍ଥିତି ବିଷୟରେ ପୂର୍ବରୁ ଅବଗତ ଥିଲେ। ସେମାନେ ଅନ୍ୟମାନଙ୍କୁ ଏହି ଯୋଜନାରେ ସାମିଲ କରି ଏହି ଅପରାଧ ଘଟାଇଥିବା ପୋଲିସ କହିଛି। ଅଭିଯୁକ୍ତ ଜିତେନ୍ଦ୍ର ବନ୍ଧୁକ ବ୍ୟବହାର କରିଥିବା ସ୍ବୀକାର କରିଥିବା ଏସ୍ପି କହଛନ୍ତି। କବିସୂର୍ଯ୍ୟନଗର ଥାନା ଅଧିକାରୀଙ୍କ ସହ ସାଇଣ୍ଟିଫିକ୍ ଟିମ୍, ପୋଲସରା ଥାନା ଅଧିକାରୀ, ଆସିକା ଥାନା ଓ ବାଲିପଦର ଫାଣ୍ଡି କର୍ମଚାରୀ ତଦନ୍ତରେ ସାମିଲ ଥିବା ସୂଚନା ମିଳିଛି।
