ଅନୁଗୋଳ,୧୮।୬( ଜ୍ୟୋତି ରଞ୍ଜନ ସାହୁ ): ତାଳଚେରରେ ଏକ ସୁନା ରିଫାଇନେରୀ ଦୋକାନରେ ଫିଲ୍ମ ଷ୍ଟାଇଲରେ ଲୁଟ୍ ଘଟଣା ପରେ ଅନୁଗୋଳ ପୋଲିସ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଦୁଇ ଅପରାଧୀଙ୍କୁ ଏନ୍କାଉଣ୍ଟର କରିଥିବା ଜଣାପଡ଼ିଛି । ଗୁଳିମାଡ଼ ପରେ ଦୁଇ ଅଭିଯୁକ୍ତଙ୍କୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ବୁଧବାର ସନ୍ଧ୍ୟାରେ କିଛି ଦୁର୍ବୃତ୍ତ ନିଜକୁ ପୋଲିସ ସ୍ପେଶାଲ ଫୋର୍ସର ସଦସ୍ୟ ବୋଲି ପରିଚୟ ଦେଇ ତାଳଚେରର ଏକ ସୁନା ରିଫାଇନେରୀ ଦୋକାନରେ ପ୍ରବେଶ କରିଥିଲେ । ପରେ ସେମାନେ ସେଠାରୁ ସୁନା ଲୁଟି ନେବା ସହ ଜଣେ ବ୍ୟକ୍ତିଙ୍କୁ ଅପହରଣ କରି ନେଇଥିଲେ। ତେବେ କିଛି ଦୂର ଯିବା ପରେ ତାଙ୍କୁ ରାସ୍ତାରେ ଛାଡ଼ି ଦେଇ ଫେରାର ହୋଇଯାଇଥିଲେ। ଘଟଣା ସମ୍ପର୍କରେ ଖବର ପାଇବା ପରେ ଅନୁଗୋଳ ଓ ତାଳଚେର ପୋଲିସ ପକ୍ଷରୁ ଜିଲାର ବିଭିନ୍ନ ସ୍ଥାନରେ ନାକାବନ୍ଦୀ କରାଯାଇଥିଲା। ସିସିଟିଭି ଫୁଟେଜ୍ ଯାଞ୍ଚ କରିବା ପରେ ଅଭିଯୁକ୍ତମାନେ ସମ୍ବଲପୁର ଅଭିମୁଖେ ପଳାଇଥିବା ସନ୍ଦେହ ହୋଇଥିଲା। ଏହାପରେ ସମସ୍ତ ଥାନା ଓ ଚେକିଂ ପଏଣ୍ଟକୁ ସତର୍କ କରାଯାଇଥିଲା।
ବିଳମ୍ବିତ ରାତି ପ୍ରାୟ ୩ଟା ବେଳକୁ ହଣ୍ଡପା ଥାନା ଅଞ୍ଚଳରେ ଏନ୍ଏଚ୍-୫୫ରେ ଚେକିଂ ଚାଲିଥିବାବେଳେ ଅଭିଯୁକ୍ତମାନେ ପୋଲିସକୁ ଦେଖି ଜଙ୍ଗଲ ରାସ୍ତା ଦେଇ ଖସି ପଳାଇବାକୁ ଉଦ୍ୟମ କରିଥିଲେ । ପୋଲିସ ପିଛା କରିବାରୁ ସେମାନେ ପୋଲିସ ଉପରକୁ ଗୁଳି ଚଳାଇଥିବା ଅଭିଯୋଗ ହୋଇଛି। ଏହାର ଜବାବରେ ପୋଲିସ ଆତ୍ମରକ୍ଷା ପାଇଁ ଗୁଳି ଚଳାଇଥିଲା। ଏଥିରେ ସଚିନ ଗେଜେଗେ ଓ ପ୍ରକାଶ ମାଦନେ ନାମକ ଦୁଇ ଅଭିଯୁକ୍ତଙ୍କ ଗୋଡ଼ରେ ଗୁଳି ବାଜିଥିଲା। ଘଟଣାସ୍ଥଳରୁ ପୋଲିସ ଦୁଇଟି ବନ୍ଧୁକ, ଗୁଳି ଓ ଅପରାଧରେ ବ୍ୟବହୃତ ଗାଡ଼ି ଜବତ କରିଛି । ପ୍ରାଥମିକ ତଦନ୍ତରୁ ସମସ୍ତ ଅଭିଯୁକ୍ତ ମହାରାଷ୍ଟ୍ରର ବୋଲି ଜଣାପଡ଼ିଥିବା ବେଳେ ଗାଡ଼ିରେ ଲାଗିଥିବା ନମ୍ବର ପ୍ଲେଟ୍ ମଧ୍ୟ ନକଲି ବୋଲି ପୋଲିସ ସୂଚନା ଦେଇଛି। ଘଟଣାରେ ସମ୍ପୃକ୍ତ ଅନ୍ୟ ଆଉ ୨ଅଭିଯୁକ୍ତଙ୍କୁ ଗିରଫ କରିଛି ।
