କୁଜଙ୍ଗ, ୧୨ା୪ (ଡି.ଏନ୍.ଏ.):୩ ମାସରୁ ଊର୍ଦ୍ଧ୍ୱ ସମୟ ହେବ ଫେରାର ଥିବା ଜଣେ ଅଭିଯୁକ୍ତଙ୍କୁ ପୋଲିସ କାବୁ କରିବାରେ ସଫଳ ହୋଇଛି। ଏଥିପାଇଁ ପୋଲିସକୁ ଘାସକଟାଳି ବେଶ ଧାରଣ କରିବାକୁ ପଡ଼ିଛି। ସମ୍ପୃକ୍ତ ଅଭିଯୁକ୍ତ ଜଗତ୍ସିଂହପୁର ଜିଲା ଢିଙ୍କିଆ ଚାରିଦେଶରେ ପ୍ରସ୍ତାବିତ ଜେଏସ୍ଡବ୍ଲ୍ୟୁ ପ୍ରକଳ୍ପ ଅଞ୍ଚଳରେ ଅଭୟଚାନ୍ଦପୁର ଥାନା କର୍ମଚାରୀଙ୍କୁ ଆକ୍ରମଣ ଘଟଣାରେ ଜଡ଼ିତ ଥିଲେ। ସେ ହେଲେ ଏହି ଅଞ୍ଚଳର ନୂତନ ଦାସ।
ଗତ ଡିସେମ୍ବର ୩ ତାରିଖ ରାତିରେ ଗୋବିନ୍ଦପୁରସ୍ଥିତ ପ୍ରଭାତ ରାଉତଙ୍କ ଘର ଉପରେ ବୋମାମାଡ଼ ହୋଇଥିଲା। ୪ ତାରିଖରେ ପୋଲିସ ଘଟଣାର ତଦନ୍ତ କରିବାକୁ ଢିଙ୍କିଆ ଗ୍ରାମକୁ ଆସିଥିଲା। ଏହି ସମୟରେ ପୋଲିସ କର୍ମଚାରୀଙ୍କ ଉପରେ କେତେଜଣ ଗ୍ରାମବାସୀ ଆକ୍ରମଣ କରିବା ସହ ଗାଡ଼ି ଭଙ୍ଗାରୁଜା କରିଥିଲେ। ଉକ୍ତ ଆକ୍ରମଣରେ ନୂତନ ମଧ୍ୟ ସାମିଲ ଥିଲେ। ପୋଲିସ ଏହି ମାମଲାରେ ପୂର୍ବରୁ ୫ ଜଣଙ୍କୁ ଗିରଫ କରିଥିବାବେଳେ ନୂତନ ଚକମା ଦେଇ ବୁଲୁଥିଲେ। ରବିବାର ଅପରାହ୍ନରେ ନୂତନ ଢିଙ୍କିଆ ଗ୍ରାମର ଏକ ବିଲରେ ଲୁଚିଥିବା ନେଇ ପୋଲିସକୁ କୌଣସି ସୂତ୍ରରୁ ସୂଚନା ମିଳିଥିଲା। ତାଙ୍କୁ ଧରିବା ପାଇଁ ଥାନାର କେତେଜଣ ପୋଲିସ କର୍ମଚାରୀ ସାଦା ପୋଷାକରେ ଦା’ ଏବଂ ଅଖା ଧରି ଘାସ କଟାଳି ସାଜି ବିଲକୁ ଯାଇଥିଲେ। ନୂତନ ସେମାନଙ୍କୁ ଚିହ୍ନି ନ ପାରି ପଦାକୁ ଆସିଥିଲେ। ଏହି ସମୟରେ ପୋଲିସ ତାଙ୍କୁ ଗିରଫ କରିଥିଲା। ସୋମବାର ନୂତନଙ୍କୁ କୋର୍ଟ ଚାଲାଣ କରାଯାଇଛି। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଛି ବୋଲି ଥାନା ଅଧିକାରୀ ଜୀବନାନନ୍ଦ ଜେନା କହିଛନ୍ତି।
