ପ୍ୟାରିସ୍, ୨୨ା୯-ସ୍ଲୋଭେନିଆର ଟାଡେଜ୍ ପୋଗାକାର୍ ଟୁର୍ ଡି’ ଫ୍ରାନ୍ସ ୨୦୨୦ ସାଇକେଲ ରେସ୍ ଜିତିଛନ୍ତି। ଇଭେଣ୍ଟର ଇତିହାସରେ ଦ୍ୱିତୀୟ ସର୍ବକନିଷ୍ଠ ସାଇକ୍ଲିଷ୍ଟ ଭାବେ ସେ ଏହି ସଫଳତା ହାସଲ କରିବା ସୌଭାଗ୍ୟ ଅର୍ଜନ କରିଛନ୍ତି। ଅନ୍ୟପକ୍ଷରେ ସାମ୍ ବେନେଟ୍ ପ୍ୟାରିସ୍ରେ ଫାଇନାଲ ସ୍ପ୍ରିଣ୍ଟ୍ ଜିତିଛନ୍ତି। ଟୁର୍ ଡି’ ଫ୍ରାନ୍ସରେ ପ୍ରଥମଥର ଭାଗ ନେଇଥିବା ୨୧ବର୍ଷୀୟ ପୋଗାକାର ଶନିବାର ଟାଇମ୍ ଟ୍ରାଏଲ୍ରେ ଦୀର୍ଘ ସମୟ ଧରି ରେସ୍ ଲିଡର ରହିଆସିଥିବା ପ୍ରିମୋଜ ରଗ୍ଲିକ୍ଙ୍କୁ ଅତିକ୍ରମ କରି ୟଲୋ ଜର୍ସି ହାସଲ କରିନେଇଥିଲେ। ରେସ୍ ଲିଡର ଫାଇନାଲ ଷ୍ଟେଜ୍ରେ ଚ୍ୟାଲେଞ୍ଜ ଦେଇପାରି ନ ଥିଲେ। ଫଳରେ ପୋଗାକାର ତାଙ୍କ ପେଲୋଟନ୍ରେ ସହଜରେ ରେସ୍ ଫିନିଶ କରିଥିଲେ। ଅନ୍ୟପକ୍ଷରେ ଖୁସିରେ ଆତ୍ମହରା ବେନେଟ୍ ବିଶ୍ୱ ଚାମ୍ପିୟନ ମ୍ୟାଡ୍ସ ପେଡରସନଙ୍କ ଆଗରେ ଲାଇନ୍ ଅତିକ୍ରମ କରିଥିଲେ। ବେନେଟ ପଏଣ୍ଟ କ୍ଲାସିଫିକେଶନରେ ବିଜୟ ହାସଲ କରିଥିଲେ। ଆୟର୍ଲାଣ୍ଡର ଦ୍ୱିତୀୟ ବ୍ୟକ୍ତି ଭାବେ ସେ ଗ୍ରୀନ୍ ଜର୍ସି ହାସଲ କରିଥିଲେ। ପୂର୍ବରୁ ସିନ୍ କେଲି ୧୯୮୨ରୁ ୧୯୮୯ ମଧ୍ୟରେ ୪ଥର ଗ୍ରୀନ୍ ଜର୍ସି ଲାଭ କରିଥିଲେ। ୧୩ ଦିନ ଧରି ୟଲୋ ଜର୍ସିକୁ କବ୍ଜାରେ ରଖି ଆସିଥିବା ୩୦ ବର୍ଷୀୟ ରଗଲିକ୍ ୫୯ ସେକେଣ୍ଡ ପଛରେ ଦ୍ୱିତୀୟ ହୋଇଥିଲେ। ଅଷ୍ଟ୍ରେଲିଆର ୩୫ ବର୍ଷୀୟ ରିଚିି ପୋର୍ଟ ୩ ମିନିଟ୍ ୩୦ ସେକେଣ୍ଡ ପଛରେ ତୃତୀୟ ହୋଇଥିଲେ। ଏହାଥିଲା ତାଙ୍କର ପ୍ରଥମ ଗ୍ରାଣ୍ଡ ଟୁର୍ ପୋଡିୟମ ଫିନିଶ। ରଗଲିକ୍ ଷ୍ଟେଜ୍ ୯ରେ ୟଲୋ ଜର୍ସି ଅକ୍ତିଆର କରିବା ପୂର୍ବରୁ ବ୍ରିଟେନର ଆଡାମ ୟେଟ୍ସ ୪ ଦିନ ପାଇଁ ୟଲୋ ଜର୍ସି ପାଇଥିଲେ। ଫାଇନାଲ ଷ୍ଟେଜ୍ରେ ସେ ୯ ମିନିଟ୍ ୨୫ ସେକେଣ୍ଡ ପଛରେ ଓଭରାଲ ୯ମ ସ୍ଥାନରେ ରହିଥିଲେ। ପୁରସ୍କାର ଗ୍ରହଣ ପାଇଁ ପୋଗାକାର ସ୍ଲୋଭେନିଆ ଜାତୀୟ ପତାକା ସହ ଫୋଡିୟମକୁ ଉଠିଥିଲେ। ପୁରସ୍କାର ବିତରଣ ଉତ୍ସବରେ ତାଙ୍କ ପିତାମାତା ଉପସ୍ଥିତ ଥିଲେ। ସେ କହିଛନ୍ତି, ଏଠାରେ ଟାଇଟଲ ଜିତିବା ମୋ କଳ୍ପନା ବାହାରେ ଥିଲା। ୩ ସପ୍ତାହ ଧରି ଅନୁଷ୍ଠିତ ଏହି ଦୁଃସାହସିକ ସାଇକେଲ ରେସ୍ ବେଶ୍ ରୋମାଞ୍ଚକ ଥିଲା।
