ଇସଲାମାବାଦ,୯।୫: ପାକିସ୍ତାନ ପ୍ରଧାନମନ୍ତ୍ରୀ ଶେହଓ୍ବାଜ୍ ଶରିଫ ଦେଶର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଚେତାବନୀ ଦେଇଛନ୍ତି। ଦେଶରେ ଗୃହଯୁଦ୍ଧ ପାଇଁ ଷଡଯନ୍ତ୍ର କରୁଥିବା ଅଭିଯୋଗ କରି ଆଇନଗତ କାର୍ଯ୍ୟାନୁଷ୍ଠାନ ପାଇଁ ସେ ଏହି ଚେତାବନୀ ଦେଇଛନ୍ତି। ଇମ୍ରାନ ଏବଟାବାଦ୍ରେ ଦେଇଥିବା ଭାଷଣ ପାକିସ୍ତାନ ବିରୋଧରେ ଏକ ଷଡଯନ୍ତ୍ର ବୋଲି ଶେହଓ୍ବାଜ୍ କହିଛନ୍ତି।
ଇମ୍ରାନଙ୍କୁ କଡା ଚେତାବନୀ ଦେଇ ଶେହଓ୍ବାଜ୍ କହିଛନ୍ତି, ପାକିସ୍ତାନର ୨୨ କୋଟି ଲୋକ, ଦେଶର ସମ୍ବିଧାନ ତଥା ଜାତୀୟ ଅନୁଷ୍ଠାନ ଜଣେ ବ୍ୟକ୍ତିଙ୍କ ଅହଂକାରର ଦାସ ନୁହଁନ୍ତି। ଇମ୍ରାନ ଦେଶର ଲୋକଙ୍କୁ ଦାସ ଭାବରେ ରଖିବାକୁ ଚାହୁଁଛନ୍ତି, କିନ୍ତୁ ଆମେ ତାଙ୍କୁ ପାକିସ୍ତାନର ହିଟଲର ହେବାକୁ ଦେବୁ ନାହିଁ। ଇମ୍ରାନ ଅନେକ ମିଥ୍ୟା କହିଛନ୍ତି, କିନ୍ତୁ ବର୍ତ୍ତମାନ ତାଙ୍କୁ ସତ୍ୟର ସାମ୍ନା କରିବାକୁ ପଡିବ। ସେ କେବଳ ରାଜନୈତିକ ଷଡଯନ୍ତ୍ର କରୁନାହାଁନ୍ତି, ବରଂ ସେ ଦେଶ ବିରୋଧରେ ଷଡଯନ୍ତ୍ର କରୁଛନ୍ତି। ପ୍ରଥମେ ସେ ଦେଶର ଅର୍ଥନୀତିକୁ ବୁଡ଼ାଇ ଦେଇଥିଲେ ଏବଂ ଏବେ ସେ ଗୃହଯୁଦ୍ଧ ଆରମ୍ଭ କରିବାକୁ ଷଡଯନ୍ତ୍ର କରୁଛନ୍ତି।
ସୂଚନାଯୋଗ୍ୟ, ଇମ୍ରାନ ଖାନ ଏବଟାବାଦ୍ରେ ଏକ ପିଟିଆଇ ରାଲିରେ ଦେଇଥିବା ଭାଷଣରେ ପ୍ରଧାନମନ୍ତ୍ରୀ ଶେହଓ୍ବାଜ୍ ଶରିଫଙ୍କୁ ଟାର୍ଗେଟ୍ କରି ତାଙ୍କୁ ‘ଭିକାରୀ, ଚାକର ଏବଂ ଚୋର ବୋଲି କହିଥିଲେ। ଶରିଫ ପରିବାର ଦେଶର ଲୋକଙ୍କୁ ଏତେ ମିଛ କହିଛନ୍ତି, ଆଜି ପର୍ଯ୍ୟନ୍ତ ମୁଁ ଏଭଳି ମିଛ ଶୁଣି ନାହିଁ ବୋଲି ଇମ୍ରାନ କହିଛନ୍ତି।
