ନୂଆଦିଲ୍ଲୀ,୧୭ ।୯: ପ୍ରଧାନମନ୍ତ୍ରୀଙ୍କୁ ଗତ ବର୍ଷ ମିଳିଥିବା ଉପହାର ଗୁଡିକର ନିଲାମ ଶନିବାର ଅର୍ଥାତ୍ ୧୭ ସେପ୍ଟେମ୍ବରରୁ ଆରମ୍ଭ ହେବ । ଏହା ୨ ଅକ୍ଟୋବର ଅର୍ଥାତ୍ ଗାନ୍ଧୀ ଜୟନ୍ତି ପର୍ଯ୍ୟନ୍ତ ଚାଲିବ । ପ୍ରାୟ ୧୨୦୦ ଉପହାରର ନିଲାମ କରାଯିବ । ଏହି ଉପହାର ଗୁଡିକର ଦାମ ଓ ଏ ସମ୍ପର୍କରେ ସମସ୍ତ ତଥ୍ୟ ଅନଲାଇନରେ ଉପଲବ୍ଧ ରହିଛି । ଏହାର ଆରକ୍ଷିତ ମୂଲ୍ୟ ବି ନିର୍ଦ୍ଧାରଣ କରାଯାଇଛି । ଏହା ୧୦୦ଟଙ୍କାରୁ ଆରମ୍ଭ କରି ଲକ୍ଷ ଲକ୍ଷ ଟଙ୍କା ହେବ ।
ପ୍ରଧାନମନ୍ତ୍ରୀ ମୋଦିଙ୍କୁ ମିଳିଥିବା ଉପହାରର ଏହା ଚତୁର୍ଥ ନିଲାମ । ଏହି ୧୨୦୦ ଉପହାର ମଧ୍ୟରୁ ୩୦୦ ନ୍ୟାଶନାଲ ଗ୍ୟାଲେରି ଅଫ ମର୍ଡନ ଆର୍ଟରେ ପ୍ରଦର୍ଶିତ କରାଯାଇ ସାରିଛି । ଏହି ନିଲାମରୁ ମିଳିବାକୁ ଥିବା ଅର୍ଥ ‘ନମାମି ଗଙ୍ଗେ’ କର୍ଯ୍ୟକ୍ରମରେ ଖର୍ଚ୍ଚ କରାଯିବ । ନମାମୀ ଗଙ୍ଗେ ଜୁନ ୨୦୧୪ରେ ମୋଦି ସରକାରଙ୍କ ଦ୍ୱାରା ଆରମ୍ଭ କରାଯାଇଥିବା ଏକ ଏକିକୃତ ସଂରକ୍ଷଣ କାୟାକଳ୍ପ କାର୍ଯ୍ୟକ୍ରମ ଅଟେ । ଏହାର ଉଦ୍ଦେଶ୍ୟ ଗଙ୍ଗାର ପ୍ରଦୂଷଣକୁ କମ କରିବା ।
ନିଲାମ ହେବାକୁ ଥିବା ଉପହାର ମଧ୍ୟରେ ମଧୁବନି ପେଣ୍ଟିଂଠାରୁ ଆରମ୍ଭ କରି ଏବେ ଚେନ୍ନାଇ ସତରଞ୍ଜ ଅଲମ୍ପିୟାଡରେ ମିଳିଥିବା ଏକ ସତରଞ୍ଜ ସେଟ ସାମିଲ ହୋଇଛି । ଏହି ମଧୁବେନି ପେଣ୍ଟିଂରେ କରୋନା ମହାମାରୀ ସମୟର ଦୁଃଖ ଓ ମହାମାରୀ ବିରୋଧରେ ଟିକାକରଣକୁ ଚିତ୍ରିତ କରାଯାଇଛି ।
