ପ୍ରାକୃତିକ ପରିବେଶରେ କିପରି ବିଭିନ୍ନ ବୃକ୍ଷଲତାର ସୁରକ୍ଷା ହୋଇପାରିବ ସେଥିପାଇଁ ସେ ପ୍ରୟାସ କରିଛନ୍ତି। ଏଥିଲାଗି ୨୦୧୯ମସିହାରୁ ବିଭିନ୍ନ ସ୍ଥାନରେ ସେ ବୃକ୍ଷରୋପଣ କାର୍ଯ୍ୟ ଜାରିରଖିଛନ୍ତି। ସେ ହେଲେ ସୁବାସ ନାୟକ। ଜଣେ ସାମାଜିକ କର୍ମୀ। ନୟାଗଡ଼ ଜିଲା ଓଡ଼ଗଁା ବ୍ଲକ ଆଙ୍ଗିସିଙ୍ଗି ଗଁାରେ ଘର। ସୁବାସ କୁହନ୍ତି, ପରିବେଶ ପାଇଁ ବର ଓ ଅଶ୍ୱତ୍ଥ ଗଛ ଦରକାର ମାତ୍ର ଏହି ଗଛସଂଖ୍ୟା ଆସ୍ତେ ଆସ୍ତେ କମିବାରେ ଲାଗିଛି। ବର ଓ ଅଶ୍ୱତ୍ଥ ଗଛକୁ ଲୋକେ ପୂଜା କରୁଥିଲେ ହେଁ ନୟାଗଡ଼ ଜିଲାରେ ଧୀରେ ଧୀରେ ଏହାର ସଂଖ୍ୟା ହ୍ରାସ ପାଇ ଚାଲିଥିଲା ।
ଏଭଳି ସମୟରେ ବର ଓ ଅଶ୍ୱତ୍ଥ ଗଛ ଲଗାଇବା ପାଇଁ ନିଷ୍ପତ୍ତି ନେଇଥିଲି। ପ୍ରତିଦିନ ସକାଳୁ ସକାଳୁ ଚାରା ସଂଗ୍ରହ ପାଇଁ ବାଇକରେ ବାହାରି ପଡ଼ିଥାଏ। ଏଥିପାଇଁ କେଉଁ ଦିନ କେଉର୍ଁ ଅଞ୍ଚଳ ଆଡ଼େ ଯାଏ ଠିକ୍ ଭାବେ ନିର୍ଦ୍ଦିଷ୍ଟ କରି ନ ଥାଏ। ମାତ୍ର ପ୍ରତିଦିନ କିଛି ନା କିଛି ବର ଓ ଅଶ୍ୱତ୍ଥ ଚାରା ସଂଗ୍ରହ କରି ଫେରିଥାଏ। ଆଉ ସଂଗ୍ରହ କରିଥିବା ଚାରାଗୁଡ଼ିକ ପୋତିବା ପାଇଁ ଆମ ଅଞ୍ଚଳର ଆଖପାଖ ଗାଁର ମଶାଣି ପାଖ ଜାଗା ଓ ରାସ୍ତାକଡ଼କୁ ବାଛିଥାଏ। ଆଗରୁ ଅନ୍ୟ ଗଛ ଳଗାଉଥିଲେ ବି ୨୦୧୯ରୁ ବର ଓ ଅଶ୍ୱତ୍ଥ ବୃକ୍ଷରୋପଣ କାର୍ଯ୍ୟକ୍ରମ ଆରମ୍ଭ କରିଛି। ନୟାଗଡ଼ ଜିଲାର ଗୁଞ୍ଜବାରଣ, ଗୋଡ଼ିପଡ଼ା, ବାଉଁଶିଆ, ଦୁର୍ଗାପ୍ରସାଦ, କରଡ଼ାଶାସନ, ଅସୁରଢ଼ିପା, ଆଙ୍ଗିସିଙ୍ଗି, ବଡ଼ଗୋରଡ଼ା ଗାଁର ବିଭିନ୍ନ ଶ୍ମଶାନରେ ବର ଓ ଅଶ୍ୱତ୍ଥ ଗଛ ଲଗାଇବାର ପ୍ରୟାସ ଚାଲୁରହିଛି। ଓଡ଼ଗଁା ବ୍ଲକର ବିଭିନ୍ନ ଗଁାର ରାସ୍ତାକଡ଼ରେ ମଧ୍ୟ ବୃକ୍ଷରୋପଣ ହୋଇଛି। ଏମିତିରେ ବିଭିନ୍ନ ଶ୍ମଶାନ, ନଦୀକୂଳ, ରାସ୍ତାକଡ଼ରେ ୪ ବର୍ଷ ଭିତରେ ପ୍ରାୟ ୧,୧୨୨ଟି ଗଛ ଲଗାଇସାରିଲିଣି। ବର ଓ ଅଶ୍ୱତ୍ଥ ଗଛକୁ ଥାନା, ଫାଣ୍ଡି ଓ ବିଭିନ୍ନ ସରକାରୀ କାର୍ଯ୍ୟାଳୟର ଅଧିକାରୀ, କର୍ମଚାରୀଙ୍କୁ ଉପହାର ରୂପେ ଦିଏ ।
ଗଛ ଲଗାଇବାକୁ ପରାମର୍ଶ ଦିଏ । ଗଛର ଉପକାରିତା ବୁଝାଏ । ବର ଓ ଅଶ୍ୱତ୍ଥ ପରି ଉପକାରୀ ଗଛକୁ ନଷ୍ଟ ନ କରିବାକୁ ଅନୁରୋଧ କରେ। ବର ଓ ଅଶ୍ୱତ୍ଥ ଗଛ ଗୋଟିଏ ଗୋଟିଏ ଜୈବ ବିବିଧତାର ଗନ୍ତାଘର । ପରିବେଶ ପାଇଁ ଏହି ଗଛର ନିହାତି ଆବଶ୍ୟକତା ରହିଛି ।
-ଲୋକନାଥ ମିଶ୍ର
