ବଲାଙ୍ଗୀର ଅଫିସ,୮ା୧୧: ବଲାଙ୍ଗୀର ସହରରେ ଦିନକୁ ଦିନ ଅପରାଧିକ ଗତିବିଧି ବୃଦ୍ଧି ପାଇବାରେ ଲାଗିଛି । ବଲାଙ୍ଗୀର ପୋଲିସକୁ ଅଭିଯୁକ୍ତମାନେ ଖୋଲାଖୋଲି ଚ୍ୟାଲେଞ୍ଜ କରୁଛନ୍ତି । ଏଭଳି ସମୟରେ ପୋଲିସ ମଧ୍ୟ ତତ୍ପରତା ଦେଖାଇଛି। ବଲାଙ୍ଗୀର ଟାଉନ ଥାନା ପୋଲିସ ପ୍ରାଟ୍ରୋଲିଂ ଟିମ ସହରର ମାଲଗୋଦାମପଡା ଅଞ୍ଚଳରୁ ସୋମବାର ସନ୍ଧ୍ୟାରେ ୬ ଜଣ ଯୁବକଙ୍କୁ ଉଠାଇ ଆଣିଥିଲା। ଏହି ଯୁବକମାନେ ବଡଧରଣର ଡକାୟତି ଯୋଜନା କରୁଥିଲେ ବୋଲି ଜଣାପଡ଼ିଛି। ମଙ୍ଗଳବାର ସଦର ଏସ୍ଡିପିଓ ତୋଫାନ ବାଗ ଟାଉନ ଥାନା ପରିସରରେ ଏକ ଖବରଦାତା ସମ୍ମିଳନୀ କରି ଉପରୋକ୍ତ ୬ ଜଣ ଯୁବକଙ୍କୁ ଗିରଫ କରାଯାଇଥିବା ନେଇ ସୂଚନା ଦେଇଛନ୍ତି । ଗିରଫ ୬ ଅଭିଯୁକ୍ତମାନେ ହେଲେ ଶ୍ରୀକାନ୍ତ ସୁନା (୨୪), ନିତେଇ ନନ୍ଦ (୨୪), ଅଭିନାଶ ଓରଫ ସୁମନ ବାଗ (୧୯), ସୁଦାମ ସୁନା (୨୫), ଧନେଶ୍ୱର ନାଗ (୨୬), ତେଜରାଜ ନନ୍ଦ (୨୬) । ସେମାନେ ବଲାଙ୍ଗୀର ସହରର ମାଲଗୋଦାମପଡ଼ା ଏବଂ ବିଷ୍ଣୁମୁଣ୍ଡା ଅଞ୍ଚଳର ବୋଲି ସେ କହିଛନ୍ତି।
ସେମାନଙ୍କ ଠାରୁ ଖଣ୍ଡା, ଭୁଜାଲି, ଲୁହାରଡ, ପିସ୍ତଲ ଭଳି ମାରଣାସ୍ତ୍ର ଜବତ କରାଯାଇଛି । ସୋମବାର ସାରେ ସମସ୍ତ ୬ ଯୁବକଙ୍କୁ ପୋଲିସ ଉଠାଇ ଆଣି ଟାଉନ ଥାନାରେ ରଖିଥିଲା। ସେଠାରେ ଏସ୍ପି ନୀତିନ କୁଶଲକର ଅଭିଯୁକ୍ତମାନଙ୍କୁ ଜେରା କରିଥିଲେ । ଅଭିଯୁକ୍ତମାନଙ୍କ ଠାରୁ ତଥ୍ୟ ପାଇବା ପରେ ସହରର ବିଭିନ୍ନ ସ୍ଥାନକୁ ନେଇ ଅଭିଯୁକ୍ତଙ୍କୁ ସ୍ପଟ ଭେରିଫିକେଶନ କରାଯାଇଥିବା ଜଣାପଡିଛି । ୬ ଅଭିଯୁକ୍ତ ବିଭିନ୍ନ ସମୟରେ ଅନେକ ଡକାୟତି ଏବଂ ଅପରାଧିକ ଘଟଣାରେ ସମ୍ପୃକ୍ତ ଅଛନ୍ତି । ଏହି ଅଭିଯୁକ୍ତମାନଙ୍କୁ ବିକ୍ରମ ଛକ, ବିଷ୍ଣୁମୁଣ୍ଡା, ରେଲୱେ ଷ୍ଟେସନ, ମାଲଗୋଦାମପଡା ଓ ଅନ୍ୟ କିଛି ସ୍ଥାନକୁ ନେଇ ପୋଲିସ ତଥ୍ୟ ସଂଗ୍ରହ କରିଥିଲା । ବଲାଙ୍ଗୀର ସହର ଏବଂ ଆଖପାଖ ଅଞ୍ଚଳରେ ଏହି ଡାକାୟତ ଦଳ ବଡଧରଣ ଏକାଧିକ ଡକାୟତି ଯୋଜନା କରିଥିଲେ । ବିଭିନ୍ନ ସ୍ଥାନରେ ଏହି ଅଭିଯୁକ୍ତମାନଙ୍କ ନାଁରେ ଅନେକ ଅପରାଧିକ ମାମଲା ରହିଛି । ସରକାରୀ ଜମି ଜବରଦଖଲ ଏମାନେ ବିଭିନ୍ନ ଅପରାଧିମୂଳକ କାର୍ଯ୍ୟ କରିଛନ୍ତି । ସରକାରୀ ଜମିରୁ ଏମାନଙ୍କୁ ବେଦଖଲ କରିବାକୁ ପୋଲିସ ଉଦ୍ୟମ କରିବ ବୋଲି ଏସ୍ଡିପିଓ ବାଗ ଖବରଦାତା ସମ୍ମିଳନୀରେ କହିଛନ୍ତି । ଉପରୋକ୍ତ ଅଭିଯୁକ୍ତଙ୍କ ବିରୁଦ୍ଧରେ ଜାତୀୟ ନିରାପତ୍ତା ଆଇନ ଲଗାଇବା ଦିଗରେ ପୋଲିସ ଚିନ୍ତା କରୁଛି ବୋଲି ଏସ୍ଡିପିଓ ବାଗ କହିଛନ୍ତି।
