ଭୁବନେଶ୍ୱର,୧୭।୩(ବ୍ୟୁରୋ): ପିପିଲି ଉପନିର୍ବାଚନରେ ମତଦାନ କେନ୍ଦ୍ରସଂଖ୍ୟା ବଢ଼ିବ। ପୂର୍ବରୁ ୨୭୧ଟି ବୁଥ୍ ଥିଲା। ଏବେ ଏହାକୁ ବୃଦ୍ଧି କରାଯାଇଥିବା ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ ସୂଚନା ଦେଇଛନ୍ତି। ଅତିରିକ୍ତ ଭାବେ ୭୫ଟି ସହାୟକ ବୁଥ୍ କରାଯାଉଛି ବୋଲି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି। ପ୍ରତି ବୁଥ୍ରେ ହଜାରେ ଜଣ ଭୋଟର ମତଦାନ କରିପାରିବେ। କୋଭିଡ୍ କଟକଣା ମଧ୍ୟରେ ପିପିଲି ଭୋଟ ଗ୍ରହଣ କରାଯିବ।
ପ୍ରାର୍ଥୀ ନାମାଙ୍କନ ସମୟରେ ସାଙ୍ଗରେ ୨ ଜଣଙ୍କୁ ଆଣିବେ। ୨ଟି ଗାଡ଼ିରୁ ଅଧିକ ବ୍ୟବହାର କରିବେ ନାହିଁ। ମତଦାନ ବୁଥ୍ ସାନିଟାଇଜ୍ କରାଯିବ। ଥର୍ମାଲ ସ୍କ୍ରିନିଂ ସହ କରୋନା ସନ୍ଦିଗ୍ଧଙ୍କୁ ଟୋକନ ଦିଆଯିବ। ଏଥିପାଇଁ ଅଙ୍ଗନଓ୍ବାଡ଼ି କର୍ମୀ ଓ ଆଶାକର୍ମୀଙ୍କୁ ଦାୟିତ୍ୱ ଦିଆଯିବ।
ସୂଚନାଯୋଗ୍ୟ, ଆସନ୍ତା ଏପ୍ରିଲ ୧୭ରେ ପିପିଲି ଉପନିର୍ବାଚନ ଲାଗି ଭୋଟ ଗ୍ରହଣ ହେବାକୁ ଥିବା ବେଳେ ମେ’ ୨ରେ ଭୋଟ ଗଣତି ହେବ।
