ପାରଳାଖେମୁଣ୍ଡି, ୯।୫(ଗିରିଧାରୀ ପରିଚ୍ଛା): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡି ସହରରେ ଏବେ ପାଇପ ମିଟର ଚୋରଙ୍କ ପ୍ରାଦୁର୍ଭାବ ବୃଦ୍ଧି ପାଇବାରେ ଲାଗିଛି । ଜନସ୍ବାସ୍ଥ୍ୟ ବିଭାଗ ପକ୍ଷରୁ ଘରକୁ ଘର ଲଗାଯାଇଥିବା ପାନୀୟ ଜଳ ମିଟରଗୁଡ଼ିକୁ ଦୁର୍ବୃତ୍ତମାନେ କାଟି ନେଇ ଯାଉଥିବା ବେଳେ ଏହା ପ୍ରଶାସନ ଓ ସାଧାରଣ ଲୋକଙ୍କ ପାଇଁ ଚିନ୍ତାର କାରଣ ସାଜିଛି ।
ସୂଚନା ଅନୁଯାୟୀ, ଗତ ଡିସେମ୍ବର ମାସରେ ସହରର କରଣସାହିରେ ପ୍ରଥମେ ଏହି ଚୋରି ନଜରକୁ ଆସିଥିଲା । ଗତ ୬ ମାସ ମଧ୍ୟରେ ସହରର ବିଭିନ୍ନ ସାହିରେ ଚୋରି ଜାରି ରହିଥିବା ବେଳେ ଗତକାଲି ରାଜନହର ନିକଟସ୍ଥ ରବି କ୍ଲିନିକ ଏବଂ ଦୋଳ ପୋଖରୀ ସାହିରେ ମିଟର ଚୋରି ହୋଇଛି । ଆଜି ପାହାନ୍ତିଆ ପ୍ରାୟ ୩ଟା ସମୟରେ ଜଣେ ଦୁର୍ବୃତ୍ତ ପାଇପ ମିଟର କାଟୁଥିବାର ଦୃଶ୍ୟ ସ୍ଥାନୀୟ ସିସିଟିଭି (CCTV) କ୍ୟାମେରାରେ କଏଦ ହୋଇଛି ।
ମିଟର କାଟିବା ପରେ ପାଇପରୁ ପାନୀୟ ଜଳ ଅପଚୟ ହୋଇ ରାସ୍ତାରେ ଭାସୁଥିବା ଦେଖିବାକୁ ମିଳୁଛି । ଏହି ମିଟରଗୁଡ଼ିକୁ ଚୋର ମାନେ କେଉଁ କାର୍ଯ୍ୟରେ ବ୍ୟବହାର କରୁଛନ୍ତି କିମ୍ବା କେଉଁଠି ବିକ୍ରି କରୁଛନ୍ତି, ତାହା ଏବେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ବିଭାଗୀୟ ଅଧିକାରୀଙ୍କୁ ଜଣାଇବା ପରେ ସାମୟିକ ଭାବେ ପାଇପ ସଂଯୋଗ କରାଯାଉଥିଲେ ମଧ୍ୟ ଚୋରି ରୋକିବାରେ ସଫଳତା ମିଳିନାହିଁ ।
ଏ ସମ୍ପର୍କରେ ଜନସ୍ବାସ୍ଥ୍ୟ ବିଭାଗର ଯନ୍ତ୍ରୀ ବିଷ୍ଣୁ ପ୍ରସାଦ ଅଗ୍ରୱାଲ କହିଛନ୍ତି ଯେ, ଗତ ୬ ମାସ ପୂର୍ବରୁ ପାରଳାଖେମୁଣ୍ଡି ଥାନାରେ ଏନେଇ ଅଭିଯୋଗ କରାଯାଇଛି । ତଥାପି ଆଜି ପର୍ଯ୍ୟନ୍ତ କୌଣସି ଦୁର୍ବୃତ୍ତ ଧରାପଡ଼ି ନାହାନ୍ତି । ଉଚ୍ଚ ପଦାଧିକାରୀଙ୍କୁ ଏନେଇ ଅବଗତ କରାଯାଇଛି ଏବଂ ସେମାନଙ୍କ ନିର୍ଦ୍ଦେଶ ପରେ ଯେଉଁମାନଙ୍କ ମିଟର ଚୋରି ହୋଇଛି, ସେମାନଙ୍କୁ ନୂତନ ମିଟର ପ୍ରଦାନ ପାଇଁ ବ୍ୟବସ୍ଥା କରାଯିବ ବୋଲି ସେ ଜଣାଇଛନ୍ତି । ସିସିଟିଭି ଫୁଟେଜ ଆଧାରରେ ପୋଲିସ ତଦନ୍ତ ଜୋରଦାର କରି ଚୋରଙ୍କୁ ତୁରନ୍ତ ଗିରଫ କରିବାକୁ ସହରବାସୀ ଦାବି କରିଛନ୍ତି ।
