କୁଜଙ୍ଗ,୬।୧୦(ମନୋଜ ପ୍ରଧାନ): ଜଗତ୍ସିଂହପୁର ଜିଲା ଏରସମା ବ୍ଲକର ବହୁଚର୍ଚ୍ଚିତ ଢିଙ୍କିଆ ପଞ୍ଚାୟତ ନିର୍ବାଚନର ଭୋଟ ଗଣତି ଶନିବାର କଡା ସୁରକ୍ଷା ବଳୟ ମଧ୍ୟରେ ବ୍ଲକ କାର୍ଯ୍ୟାଳୟରେ ଶେଷହୋଇଛି। ସରପଞ୍ଚ ପଦରେ ଶିଳ୍ପ ବିରୋଧୀ ଓ କଂଗ୍ରେସ ସମର୍ଥିତ ସ୍ବାଭିମାନ ମଞ୍ଚ ପ୍ରାର୍ଥିନୀ ପିଙ୍କି ଦାସ ବିଜୟୀ ହୋଇଛନ୍ତି। ସେ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ଶାନ୍ତିଲତା ବେହେରାଙ୍କୁ ୧୦୪୬ ଖଣ୍ଡ ଭୋଟ ବ୍ୟବଧାନରେ ପରାଜିତ କରିଛନ୍ତି। ଏହି ନିର୍ବାଚନରେ ବିଜେଡି ସମର୍ଥିତ ସରପଞ୍ଚ ପ୍ରାର୍ଥିନୀ ଶାନ୍ତିଲତା ବେହେରା, ଭାଜପା ସମର୍ଥିତ ପ୍ରାର୍ଥିନୀ ବାସନ୍ତୀ ଖଟୁଆ ଓ ସ୍ବାଭିମାନ ମଞ୍ଚ ପ୍ରାର୍ଥିନୀ ପିଙ୍କିଙ୍କ ମଧ୍ୟରେ ଲଢ଼େଇ ହୋଇଥିଲା। ପିଙ୍କି ୨୯୨୭ ଖଣ୍ଡ ଭୋଟ ପାଇ ବିଜୟୀ ହୋଇଥିବା ବେଳେ ନିକଟତମ ପ୍ରତିଦ୍ୱନ୍ଦ୍ୱୀ ଭାବେ ଶାନ୍ତିଲତା ୧୮୮୧ ଖଣ୍ଡ ଭୋଟ ପାଇଛନ୍ତି। ବାସନ୍ତୀ ୧୮୪୬ ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଛନ୍ତି। ପଞ୍ଚାୟତରେ ସରପଞ୍ଚ ପଦ ନିମନ୍ତେ ୬,୭୧୦ ଖଣ୍ଡ ଭୋଟ ବାକ୍ସରେ ପଡ଼ିଥିବା ବେଳେ ସେଥିରୁ ୫୬ ଖଣ୍ଡ ଭୋଟ ନାକଚ ହୋଇଥିବା ନିର୍ବାଚନ ଅଧିକାରୀ ତଥା ଏରସମା ବିଡିଓ ଲମ୍ବୋଦର ଖୁଣ୍ଟିଆ କହିଛନ୍ତି। ବାଲିକୁଦା ପୂର୍ବତନ ବିଧାୟକ ଲଲାଟେନ୍ଦୁ ମହାପାତ୍ର ବିଜୟୀ ପ୍ରାର୍ଥିନୀ ପିଙ୍କିଙ୍କୁ ଶୁଭେଚ୍ଛା ଜଣାଇଛନ୍ତି।
ପଞ୍ଚାୟତର ୨୩ ୱାର୍ଡ ମଧ୍ୟରୁ ୯ ନମ୍ବର ଅନୁସୂଚିତ ଜନଜାତି ବର୍ଗଙ୍କ ପାଇଁ ସଂରକ୍ଷିତ ରହିଛି। ମାତ୍ର ସେଠାରେ କୌଣସି ଅନୁସୂଚିତ ଜନଜାତି ବର୍ଗ ନ ଥିବାରୁ କେହି ପ୍ରାର୍ଥତ୍ପତ୍ର ଦାଖଲ କରି ନ ଥିଲେ। ତେବେ ୨୨ ୱାର୍ଡରେ ସଭ୍ୟପଦ ପାଇଁ ୬୪ ଜଣ ପ୍ରାର୍ଥୀ ସେମାନଙ୍କ ମନୋନୟନ ପତ୍ର ଦାଖଲ କରିଥିଲେ। ୨୨ ନମ୍ବର ୱାର୍ଡ ପାଇଁ ୨ ଜଣ ନାମାଙ୍କନପତ୍ର ଦାଖଲ କରିଥିଲେ। ଯାଞ୍ଚ ସମୟରେ ଜଣଙ୍କ ପ୍ରାର୍ଥିପତ୍ର ନାକଚ ହୋଇଯାଇଥିଲା। ଫଳରେ ଅନ୍ୟ ଜଣେ ପ୍ରାର୍ଥିନୀ ମମତା ଦଳାଇ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିଲେ। ତେଣୁ ୨୧ଟି ୱାର୍ଡରେ ସଭ୍ୟ ପଦବୀ ନିମନ୍ତେ ଭୋଟ ହୋଇଥିଲା।
୧୯ ନମ୍ବର ୱାର୍ଡର ସଭ୍ୟା ପଦ ପାଇଁ ପ୍ରାର୍ଥିନୀ ହୋଇଥିବା ଅବନ୍ତୀ ଦାସଙ୍କ ପୁଅ ରଞ୍ଜୀବ ଗଣତି ସମୟରେ ତାଙ୍କ ପ୍ରତିନିଧି ଭାବେ ଉପସ୍ଥିତ ଥିଲେ। ମାତ୍ର ଭୋଟ ଗଣତି ସମୟରେ ଏକ ବାଲଟରେ ଦୁଇ ଜାଗା ଷ୍ଟାମ୍ପ ବାଜିଥିବା ଅଭିଯୋଗ କରି ସେ ବାଲଟକୁ ନାକଚ କରିବାକୁ ଦାବି କରିଥିଲେ। କିନ୍ତୁ ନିର୍ବାଚନ ଅଧିକାରୀ ତାଙ୍କ ଦାବିକୁ ଗ୍ରହଣ ନ କରିବାରୁ ଅବନ୍ତୀଙ୍କ ସ୍ବାମୀ ରମେଶ ଦାସ ଏରସମା ବ୍ଲକ କାର୍ଯ୍ୟାଳୟ ଫାଟକ ସମ୍ମୁଖରେ ଶୋଇରହିଛନ୍ତି। ନ୍ୟାୟ ନ ମିଳିବା ପର୍ଯ୍ୟନ୍ତ ସେ ଅନଶନ କରିବେ ବୋଲି କହିଛନ୍ତି। ଏନେଇ ପୋଲିସ ଓ ପ୍ରଶାସନର ଚିନ୍ତା ବଢ଼ିଯାଇଛି। ଏହି ଓ୍ବାର୍ଡରେ ୩ ଜଣ ପ୍ରାର୍ଥିନୀ ପ୍ରତିଦ୍ୱନ୍ଦ୍ୱିତା କରିଥିଲେ। ଅବନ୍ତୀ ୮୬ ଖଣ୍ଡ ଭୋଟ ପାଇଥିବା ବେଳେ ନିକଟତମ ପ୍ରତିଦ୍ୱନ୍ଦ୍ୱୀ ମମତା ଦାସ ୮୭ ଖଣ୍ଡ ଭୋଟ ପାଇ ବିଜୟୀ ହୋଇଛନ୍ତି। ଅନ୍ୟ ପ୍ରତିଦ୍ୱନ୍ଦ୍ୱୀ ଟୁକୁନି ଦାସ ୭୧ ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଛନ୍ତି।
ନିର୍ବାଚନରେ ଶିଳ୍ପ ସପକ୍ଷବାଦୀ ବିଜେଡିକୁ ଶକ୍ତ ଧକ୍କା ଲାଗିଥିବା କୁହାଯାଉଛି। ଅନ୍ୟପଟେ ବିଜେଡି ସମର୍ଥିତ ପ୍ରାର୍ଥିନୀ ଶାନ୍ତିଲତା ବେହେରାଙ୍କ ପରାଜୟ ପ୍ରଥମ କରି ବିଧାୟକ ହୋଇଥିବା ବିଜେଡି ନେତା ଶାରଦା ପ୍ରସନ୍ନ ଜେନାଙ୍କ ନେତୃତ୍ୱ ପ୍ରତି ଆହ୍ବାନ ସୃଷ୍ଟି ହୋଇଛି। ସେହିପରି ପ୍ରଥମ କରି ରାଜ୍ୟ ଶାସନ ଭାର ନେଇଥିବା ଭାଜପା ପାଇଁ ଢିଙ୍କିଆ ପଞ୍ଚାୟତ ନିର୍ବାଚନ ସମ୍ମାନର ପ୍ରଶ୍ନ ଥିଲା। ସାଧାରଣ ନିର୍ବାଚନ ପରେ ପ୍ରଥମ କରି ଅନୁଷ୍ଠିତ ପଞ୍ଚାୟତ ନିର୍ବାଚନରେ ଭାଜପାର ପରାଜୟକୁ ପୁରୁଣା କର୍ମୀମାନେ ସହଜରେ ଗ୍ରହଣ କରିପାରୁ ନାହାନ୍ତି। କୌଣସି ପୁରୁଣା ସଙ୍ଗଠକଙ୍କୁ ସାଙ୍ଗରେ ନ ନେବାରୁ ଦଳ ଶୋଚନୀୟ ଭାବେ ପରାଜିତ ହେଲା ବୋଲି ଭାଜପା ନେତା କ୍ଷୀରୋଦ ପରିଡ଼ା କହିଛନ୍ତି।
