ବରୀ,୯ା୫(ଡି.ଏନ୍.ଏ.): ଯାଜପୁର ଜିଲା ବରୀ ବ୍ଲକ ବିଞ୍ଝାରପୁର ଥାନା ଅଧୀନ ମଧୁସୂଦନପୁର ଗ୍ରାମର ପିହୁ ନାମ୍ନୀ ଜଣେ ୨ ବର୍ଷର ଶିଶୁ ୨୦୨୦ ଅଗଷ୍ଟ ୯ରେ ଗାଁ ଦାଣ୍ଡରେ ଖେଳୁଥିବାବେଳେ ନିଖୋଜ ହୋଇଯାଇଥିଲେ। ତାଙ୍କୁ ଅପହରଣ କରାଯାଇଥିବା ନେଇ ପିହୁଙ୍କ ମା’ ମୋନାଲିସା ନାୟକ ବିଞ୍ଝାରପୁର ଥାନାରେ ଉକ୍ତ ଦିନ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରି ନ ଥିଲା। ବାରମ୍ବାର ଥାନାକୁ ଦୌଡ଼ିବା ପରେ ଅଗଷ୍ଟ ୧୪ରେ ପୋଲିସ ଏକ ନିଖୋଜ ମାମଲା ରୁଜୁ କରି ଚୁପ୍ ବସି ପଡ଼ିଥିଲା। ଏହାପରେ ମୋନାଲିସା ନ୍ୟାୟ ପାଇଁ ଯାଜପୁର ଏସ୍ପି, ଜିଲାପାଳ, ପୋଲିସ ଡିଜି, ରାଜ୍ୟ ମହିଳା ଓ ଶିଶୁ ଆୟୋଗ, ରାଜ୍ୟପାଳଙ୍କ ନିକଟରେ ଗୁହାରି କରିଥିଲେ ମଧ୍ୟ ଆଜି ପର୍ଯ୍ୟନ୍ତ ପିହୁଙ୍କ ଅସ୍ତିତ୍ୱ ଜଣାପଡ଼ିନାହିଁ। ବିଞ୍ଝାରପୁର ପୋଲିସ ନ୍ୟାୟ ଦେବା ବଦଳରେ ମୋନାଲିସା ଓ ତାଙ୍କ ପରିବାର ଲୋକଙ୍କୁ ବାରମ୍ବାର ଥାନାକୁ ଡାକି ମାନସିକ ନିର୍ଯାତନା ଦେଉଛି। ଏନେଇ ଅଭିଯୋଗ କରିଥିଲେ ହେଁ କୌଣସି କାର୍ଯ୍ୟାନୁଷ୍ଠାନ ହେଲାନାହିଁ।
ତେଣୁ ସିବିଆଇ ଦ୍ୱାରା ପିହୁ ନିଖୋଜ ଘଟଣାର ତଦନ୍ତ କରାଯାଉ ନଚେତ ତାଙ୍କୁ ଇଚ୍ଛାମୃତ୍ୟୁ ପାଇଁ ଅନୁମତି ଦିଆଯାଉ ବୋଲି ମୋନାଲିସା ରବିବାର ମାତୃଦିବସରେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ନିବେଦନ କରିଛନ୍ତି। ଉକ୍ତ ଚିଠିର ନକଲ ରାଷ୍ଟ୍ରପତି, ସୁପ୍ରିମ୍କୋର୍ଟ ପ୍ରଧାନ ବିଚାରପତି, ଓଡ଼ିଶା ରାଜ୍ୟପାଳ ଏବଂ ହାଇକୋର୍ଟ ମୁଖ୍ୟ ବିଚାରପତିଙ୍କ ନିକଟକୁ ସେ ପଠାଇଛନ୍ତି।
