କେନ୍ଦୁଝର ଜିଲାର ଘଞ୍ଚ ଜଙ୍ଗଲ ଓ ପାହାଡ ପରିବେଷ୍ଟିତ ଖଣିଖାଦାନ ଯୋଡ଼ା ବ୍ଲକରେ ରହିଛି ବହୁ ପ୍ରାକୃତିକ ସୌନ୍ଦର୍ଯ୍ୟପୂର୍ଣ୍ଣ ଛୋଟ ବଡ଼ ଜଳପ୍ରପାତ। ଏଠାକାର ପ୍ରକୃତିଦତ୍ତ ଚିରସ୍ରୋତା ଝରଣା, ସବୁଜ ପାହାଡ, ଘଞ୍ଚ ଜଙ୍ଗଲ ତଥା ଥଣ୍ଡା ପରିବେଶ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ। ଏହି ବ୍ଲକର ବଡକାଳିମାଟି ପଞ୍ଚାୟତରେ ରହିଛି ଜଙ୍ଗଲ ଓ ପାହାଡ ଘେରା ହାଣ୍ଡିଭଙ୍ଗା ଜଳପ୍ରପାତ। ଏହି ଜଳପ୍ରପାତ ବର୍ଷ ତମାମ ପର୍ଯ୍ୟଟକଙ୍କୁ ଆକୃଷ୍ଟ କରୁଥିଲେ ହେଁ ବିଶେଷ କରି ଶୀତ ଋତୁରେ ଅଧିକ ପର୍ଯ୍ୟଟକ ବୁଲିବାକୁ ଓ ଭୋଜିଭାତ କରିବାକୁ ଆସିଥାନ୍ତି। ଏଠାରେ ଥିବା ଦୁଇ ପାହାଡର ସଂଯୋଗ ସ୍ଥଳିରୁ ଏବଂ ପ୍ରାୟ ୨୦୦ ଫୁଟ ଉପରୁ ଖସିଆସୁଥିବା ଏହି ଜଳ ଧାରର ପ୍ରପାତ ପାଲଟିଛି ସମସ୍ତଙ୍କ ଆକର୍ଷଣର କେନ୍ଦ୍ର ବିନ୍ଦୁ।
ଏଠାରେ ରହିଛି ବୀର ହନୁମାନ ମନ୍ଦିର ଓ ପଦ୍ମେଶ୍ୱର ମହାଦେବ ମନ୍ଦିର। ଶାନ୍ତସରଳ ପରିବେଶ ମଧ୍ୟରେ ଥିବା ଏହି ଜଳପ୍ରପାତ ପାଖକୁ ଯିବାକୁ ହେଲେ ଚାଲି ଚାଲି ଯିବାକୁ ପଡିଥାଏ। ଭଲ ରାସ୍ତା ନ ଥିବାରୁ ଝରଣାର ଉପର ପାଖକୁ ଯିବା ସୁବିଧାଜନକ ହୁଏ ନାହିଁ। ତେବେ ତଳୁ ଥାଇ ଝରଣା ଓ ଜଳପ୍ରପାତର ମନୋରମ ଦୃଶ୍ୟକୁ ଅନେକ ଉପଭୋଗ କରିଥାନ୍ତି। ବିଭିନ୍ନ ଜାତିପ୍ରଜାତିର ଗଛଲତା, ଜୀବଜନ୍ତୁ ଓ ସରିସୃପ ଏଠାରେ ଦେଖିବାକୁ ମିଳେ। ଏଠାରେ ପର୍ଯ୍ୟଟକ ଥଣ୍ଡା ଜଳରେ ଗାଧୋଇବାର ମଜା ଉଠାଇଥାନ୍ତି। ପର୍ଯ୍ୟଟନ, ଜିଲା ପ୍ରଶାସନ ତଥା ସ୍ଥାନୀୟ ଲୋକଙ୍କ ସହାୟତାରେ ଉନ୍ନତି ମୂଳକ କାର୍ଯ୍ୟ କରାଯାଇଛି। ଏହି ଜଳପ୍ରପାତର ପାଣି ତଳକୁ ବୋହି ଯାଉଥିବାବେଳେ ଏହି ଝରଣା କୂଳରେ ଭୋଜିଭାତ ଓ ନାଚଗୀତ କରି ପର୍ଯ୍ୟଟକ ମଜାକରିଥାନ୍ତି। ରାଜ୍ୟ ତଥା ରାଜ୍ୟ ବାହାରୁ ଏଠାକୁ ପର୍ଯ୍ୟଟକ ଆସି ବୁଲି ପ୍ରକୃତିର ମନୋରମ ସୌନ୍ଦର୍ଯ୍ୟକୁ ଉପଭୋଗ କରିବା ସହ ବଣଭୋଜି କରି ନିଆରା ଅନୁଭୂତି ସାଉଁଟି ନେଇ ଯାଇଥାନ୍ତି। ଯିଏ ଥରେ ଆସିଛି ସେ ଆଉ ଥରେ ଆସିବାକୁ ମନା ବଳାଇଥାଏ। ଏହି ସ୍ଥାନକୁ ପାହାଡିଆ ରାସ୍ତାରେ ଯିବା ବେଳେ ଜଙ୍ଗଲ, ଝରଣା ଆଦି ମନରୋମ ଦୃଶ୍ୟ ସମସ୍ତଙ୍କୁ ବିମୋହିତ କରିଥାଏ।
