ବଲାଙ୍ଗୀର ଅଫିସ, ୨୪ା୨: ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟରେ ସ୍ନାତକୋତ୍ତର (ପିଜି) ବିଭାଗ ଖୋଲିଛି। ଓଡିଶା ସରକାରଙ୍କ ଉଚ୍ଚଶିକ୍ଷା ବିଭାଗ ପକ୍ଷରୁ ଏନେଇ ବିଧିବଦ୍ଧ ଘୋଷଣା କରାଯାଇଛି। ସରକାରୀ ବିଭାଗୀୟ ଚିଠି ସଂଖ୍ୟା ୭୭୭୬/ଏଚ୍ଇ/୨୨/୨/୨୦୨୩ରେ ଏନେଇ ମହିଳା ମହାବିଦ୍ୟାଳୟ ଅଧ୍ୟକ୍ଷଙ୍କୁ ସୂଚନା ଦିଆଯାଇଛି। ତିନୋଟି ବିଷୟରେ ପିଜି ପାଠ୍ୟକ୍ରମ ଖୋଲିବାକୁ ଅନୁମତି ଦିଆଯାଇଛି। ଓଡିଆ, ଇତିହାସ ଏବଂ ସଂସ୍କୃତ ବିଷୟରେ ୩୨ଟି ଲେଖାଏ ସିଟ୍ରେ ପିଜି ପାଠ୍ୟକ୍ରମ ଶିକ୍ଷାବର୍ଷ ୨୦୨୩-୨୪ରୁ ଆରମ୍ଭ ହେବ। ଅଧ୍ୟକ୍ଷଙ୍କ ପାଖକୁ ବିଧିବଦ୍ଧ ସରକାରୀ ଚିଠି ଆସିଯିବା ପରେ କଲେଜ ଛାତ୍ରୀ, ଅଧ୍ୟାପକ ଏବଂ ଅଭିଭାବକ ମହଲରେ ଖୁସିର ଲହରି ଖେଳିଯାଇଛି। ଏହି କଲେଜରେ ପିଜି ପାଠ୍ୟକ୍ରମ ଚଳିତ ଶିକ୍ଷାବର୍ଷରୁ ଆରମ୍ଭ କରାଯିବା ପରେ ଏଠାରେ ଛାତ୍ରୀମାନେ ସ୍ନାତକୋତ୍ତର ପାଠ ପଢ଼ିପାରିବେ। ଅଧ୍ୟକ୍ଷ ମନୋରଞ୍ଜନ ମିଶ୍ରଙ୍କୁ ପଚରାଯିବାରୁ ଚଳିତ ଶିକ୍ଷାବର୍ଷରୁ ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟରେ ଓଡିଆ, ଇତିହାସ ଏବଂ ସଂସ୍କୃତ ତିନି ବିଷୟରେ ପିଜି ପାଠ ପଢ଼ା ପାଇଁ ଅନୁମତି ମିଳିଥିବା କହିଛନ୍ତି। ଦୀର୍ଘଦିନରୁ ଏହି ଦାବି ହୋଇଆସିଥିଲା। ଏବେ ଉଚ୍ଚଶିକ୍ଷା ବିଭାଗ ପକ୍ଷରୁ ଅନୁମତି ଦେଇଥିବାରୁ ସେ କୃତଜ୍ଞତା ଜଣାଇବା ସହ ଏହାଦ୍ୱାରା ଛାତ୍ରୀମାନେ ଉପକୃତ ହେବେ ବୋଲି କହିଛନ୍ତି।
୧୯୬୨ ମସିହାରେ ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟ ପ୍ରତିଷ୍ଠା କରାଯାଇଥିଲା। ଦୀର୍ଘ ୬୧ ବର୍ଷ ଅତିବାହିତ ହୋଇଯାଇଥିଲେ ମଧ୍ୟ ଜିଲା ମୁଖ୍ୟ ସଦର ମହକୁମାରେ ଥିବା ରାଜ୍ୟର ଅନ୍ୟତମ ପୁରୁଣା ମହିଳା ମହାବିଦ୍ୟାଳୟରେ ସ୍ନାତକୋତ୍ତର ପାଠ୍ୟକ୍ରମ ଖୋଲାଯାଇ ନ ଥିଲା। ଦୀର୍ଘଦିନରୁ ଏଠାରେ ପିଜି ପାଠ୍ୟକ୍ରମ ଖୋଲାଯିବାକୁ ଦାବି ହୋଇଆସୁଥିଲେ ମଧ୍ୟ ଉଚ୍ଚଶିକ୍ଷା ବିଭାଗ ଏହି ମହାବିଦ୍ୟାଳୟରେ ଖୋଲି ନ ଥିଲେ। ଏବେବି ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟରେ ଅନେକ ବିଭାଗରେ ଅଧ୍ୟାପକ ପଦବୀ ଖାଲି ରହିଛି। ଏଦିଗରେ ତୁରନ୍ତ ବିଭାଗୀୟ କର୍ତ୍ତୃପକ୍ଷ ଉଚିତ୍ ପଦକ୍ଷେପ ଗ୍ରହଣ କରି ତୁରନ୍ତ ପଦବୀ ପୂରଣ କରିବାକୁ ଦାବି କରାଯାଇଛି। ନାରୀ ଶିକ୍ଷା ଉପରେ ପ୍ରାଥମିକତା ଦିଆଯାଉଥିବାବେଳେ ଏଠାରେ ବିଭିନ୍ନ ବିଭାଗରେ ଅଧ୍ୟାପକ ନାହାନ୍ତି। ଅନେକ ବିଭାଗରେ ଅତିଥି ଅଧ୍ୟାପକରେ ପାଠ ପଢ଼ା ହେଉଛି। ସରକାରୀ ମହିଳା ମହାବିଦ୍ୟାଳୟ ଯୁକ୍ତ୨ ବିଜ୍ଞାନ ମହାବିଦ୍ୟାଳୟରେ ବିନା ଅଧ୍ୟାପକରେ ବର୍ଷ ବର୍ଷ ଧରି ପିଲାମାନେ ପାଠ ପଢୁଛନ୍ତି। ବିଜ୍ଞାନ ଭଳି ବିଷୟ କାମ ଚଲା ନୀତିରେ ଅତିଥି ଅଧ୍ୟାପକରେ ଚାଲିଛି। କଲେଜ ତରଖରୁ ବାରମ୍ବାର ଅଧ୍ୟାପକ ପଦବୀ ପୂରଣ କରିବାକୁ ଦାବି କରାଯାଉଥିଲେ ମଧ୍ୟ କର୍ଣ୍ଣପାତ କରାଯାଉନାହିଁ। ୬୧ ବର୍ଷ ପରେ ସ୍ନାତକୋତ୍ତର ବିଭାଗ ଖୋଲିବାକୁ ନେଇ ଛାତ୍ରୀମାନେ ଖୁସିବ୍ୟକ୍ତ କରିଛନ୍ତି। ହେଲେ ଅଧ୍ୟାପକ ପଦବୀ କେବେ ପୂରଣ ହେବ ଏବଂ ଅନ୍ୟ ବିଷୟରେ ପିଜି ଖୋଲିବାକୁ ଆଉ କେତେ ସମୟ ଲାଗିବ ତାକୁ ନେଇ କଳ୍ପଜଳ୍ପନା ପ୍ରକାଶ ପାଇଛି।
