କେନ୍ଦୁଝର,୨୮ା୩ (ସ୍ବ.ପ୍ର.): ଦୀର୍ଘ ବର୍ଷ ହେଲା କେନ୍ଦୁଝର କର୍ମଚାରୀ ଭବିଷ୍ୟନିଧି ସଂଗଠନ କ୍ଷେତ୍ରୀୟ କାର୍ଯ୍ୟାଳୟ ଭଡ଼ା ଘରେ ଚାଲି ଆସୁଛି। ଏହାର ନିଜସ୍ବ ନୂତନ ବିଲ୍ଡିଂ ଘୁଟୁରୁଠାରେ ନିର୍ମାଣ ହୋଇଥିଲେ ହେଁ ଅଫିସ ସ୍ଥାନାନ୍ତରଣ ହେଉ ନ ଥିବାରୁ କୋଟିରୁ ଊର୍ଦ୍ଧ୍ୱ ଟଙ୍କାରେ ନିର୍ମିତ କୋଠା କାମରେ ଲାଗିପାରୁନାହିଁ। ଫଳରେ ଇତିମଧ୍ୟରେ ଭଡ଼ା ବାବଦକୁ ଭାରତ ସରକାରଙ୍କ ଶ୍ରମ ଓ ରୋଜଗାର ମନ୍ତ୍ରାଳୟର ମାସକୁ ୧ଲକ୍ଷ ଟଙ୍କା ପ୍ରଦାନ କରୁଛନ୍ତି। ନିର୍ମାଣ କାର୍ଯ୍ୟ ସରୁ ନ ଥିବାରୁ ସ୍ଥାନାନ୍ତର ହୋଇପାରୁ ନ ଥିବା ବିଭାଗ ପକ୍ଷରୁ କୁହାଯାଉଛି।
ସୂଚନାଯୋଗ୍ୟ, କେନ୍ଦୁଝର ଜିଲା ଏବଂ ମୟୂରଭଞ୍ଜ ଜିଲାକୁ ନେଇ କେନ୍ଦୁଝରଠାରେ ଆଞ୍ଚଳିକ ଭବିଷ୍ୟନିଧି କାର୍ଯ୍ୟାଳୟ ୨୦୦୬ ଅକ୍ଟୋବର ୧୭ରୁ ପ୍ରତିଷ୍ଠା ହୋଇଥିଲା। ଏହା କେନ୍ଦୁଝର ପବିତ୍ରଡ଼ିହା ମୌଜାର କରଞ୍ଜିଆ ବସ୍ଷ୍ଟାଣ୍ଡ ନିକଟରେ ମାସିକ ୧ଲକ୍ଷ ଟଙ୍କା ଦେୟ ଭଡ଼ା ଘରେ ଚାଲିଆସୁଛି। ତେବେ ଭଡ଼ା ବାବଦକୁ ଖର୍ଚ୍ଚ ରୋକିବା ପାଇଁ ଘୁଟୁରୁଠାରେ କ୍ଷେତ୍ରୀୟ କାର୍ଯ୍ୟାଳୟର ନିଜସ୍ବ ଗୃହ ନିର୍ମାଣ କାମ ଚାଲିଛି। ତେବେ ବିଭିନ୍ନ ଆଳରେ କାମ ସରି ନ ଥିବା ଦର୍ଶାଇ ସ୍ଥାନାନ୍ତରଣ କରାଯାଉ ନ ଥିବାରୁ ଭଡ଼ା ବାବଦକୁ ଅଯଥାରେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି। କେଉଁ କାରଣରୁ ସ୍ଥାନାନ୍ତରଣ ହୋଇପାରୁନାହିଁ। ସରକାରୀ ରାଜସ୍ବହାନୀ ପଛରେ କିଏ ଦାୟୀ, ତାହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଶ୍ରମିକ ନେତା ମହେଶ୍ୱର ରାଉତ ଦାବି କରିଛନ୍ତି। ଅସ୍ଥାୟୀ ଭାବେ ଭଡ଼ା ଘରେ କାମ କରିବା ପାଇଁ ସଠିକ୍ ପରିବେଶ ନଥିବାବେଳେ ଆସୁଥିବା ପିଏଫ୍ ଉପଭୋକ୍ତମାନଙ୍କ ପାଇଁ ଯଥେଷ୍ଟ ସ୍ଥାନ କିମ୍ବା ସୁବିଧା ନଥିବା, ପାର୍କିଂ ସ୍ଥାନ ନଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି। କୋଠାର ନିର୍ମାଣ ଆରମ୍ଭ, ଶେଷ ଏବଂ ବ୍ୟୟ ଅଟକଳ ଏବଂ କାର୍ଯ୍ୟ କରୁଥିବା ସଂସ୍ଥା ନାମର ସୂଚନା ଫଳକ ନ ଥିବାରୁ ଲୋକମାନେ ଅନ୍ଧାରରେ ରହିଛନ୍ତି।
ତେବେ ନିର୍ମାଣ ଅବଧି ସରିବା ବିଶେଷ ସୂତ୍ରରୁ ଜଣାପଡ଼ିଛି। ଅନ୍ୟପକ୍ଷରେ ୨କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ନିର୍ମିତ ନୂତନ କୋଠାରେ ସମସ୍ତ ସୁବିଧା ରହିଥିବାବେଳେ କାହିଁକି ସ୍ଥାନାନ୍ତରଣ କରାଯାଉନାହିଁ ତାହା ସନ୍ଦେହ ଘେରରେ।
