ଟୋକିଓ: ଘରେ ପାଳିତ ପଶୁ ରଖିବା ଏବେ ଅନେକ ଲୋକଙ୍କ ସଉକ ପାଲଟିଛି। ବର୍ତ୍ତମାନର ଅଧୁନିକ ଯୁଗରେ ଏହା ଏକ ଟ୍ରେଣ୍ଡ ପାଲଟିଛି। ପ୍ରତ୍ୟେକ ଦେଶର ଲୋକେ ଘରେ ପାଳିତ ପଶୁ ରଖିବାର ଚାହିଦା ବଢ଼ିଥିବାବେଳେ ଜାପାନରେ ଏହାର ପ୍ରଭାବ ଅଧିକ ଦେଖିବାକୁ ମିଳିଛି। ପ୍ରକାଶିତ ଖବର ଅନୁସାରେ ଜାପାନର ପ୍ରତ୍ୟେକ ଲୋକଙ୍କ ଘରେ ଗୋଟିଏ କିମ୍ବା ଦୁଇଟି ବିଲେଇ ଅବା କୁକୁର ଦେଖିବାକୁ ମିଳିବେ। ତେବେ ଏହି ପଶୁଙ୍କ ସଂଖ୍ୟା ଦେଶରେ ଥିବା ଶିଶୁଙ୍କଠୁ ବଳିଯାଇଛି। ପ୍ରଦତ୍ତ ରିପୋର୍ଟ ମୁତାବକ ଜାପାନରେ ୧୬ ବର୍ଷରୁ କମ୍ ୧୭ ନିୟୁତ ପିଲା ରହିଥିବାବେଳେ ୨୦ ନିୟୁତ ବିଲେଇ ଓ କୁକୁର ରହିଛନ୍ତି। ଜାପାନରେ ଶତାୟୁ ବ୍ୟକ୍ତିଙ୍କ ସଂଖ୍ୟା କ୍ରମାଗତ ବଢ଼ିବା ସହ ଦେଶରେ ଜନ୍ମହାର କମିଛି।
ଛୋଟ ପିଲାଙ୍କୁ ଅଧିକ ଯତ୍ନର ଆବଶ୍ୟକତା ଥିବାବେଳେ ପାଳିତ ପଶୁମାନଙ୍କୁ ଏହାର ଆବଶ୍ୟକତା ନ ଥିବା କାରଣରୁ ଜାପାନ ଲୋକେ ଏପରି କରୁଥିବା କୁହାଯାଉଛି। ଅନ୍ୟପକ୍ଷେ ଯେଉଁ ବ୍ୟକ୍ତିମାନେ ଘରେ ପଶୁ ପାଳନ କରୁୁଛନ୍ତି ସେମାନେ ତାଙ୍କୁ ନିୟମିତ ଟିକା ଦେବା ସହ ପ୍ରତି ସପ୍ତାହରେ ବାହାରକୁ ବୁଲେଇ ନେଉଥିବା ଦେଖାଯାଇଛି। ଖାଲି ସେତିକି ନୁହେଁ ଦାମୀ ଖାଦ୍ୟ ତାଙ୍କୁ ଖାଇବାକୁ ଦିଆଯାଉଥିବା ସହ ସେମାନଙ୍କୁ ଡିଜାଇନର ଡ୍ରେସ୍ ପିନ୍ଧାଇ ବୁଲାଉଥିବାର ଦେଖାଯାଉଛି। ଅନ୍ୟପକ୍ଷେ କର୍ମକ୍ଷେତ୍ରରେ ଅଧିକ ଚାପରୁ ସମୟର ଅଭାବ ଯୋଗୁ ଜାପାନର ଦମ୍ପତି ଶିଶୁ ଜନ୍ମ କରିବା ଅପେକ୍ଷା ପାଳିତ ପଶୁ ରଖିବା ଉଦ୍ଦିଷ୍ଟ ବୋଲି ମନେ କରୁଛନ୍ତି।
