ରାଫାହ,୧୭।୧୨: ଗାଜା ଷ୍ଟ୍ରିପ୍ ଉପରେ ଇସ୍ରାଏଲ୍ ଆକ୍ରମଣ ୧୧ ସପ୍ତାହରେ ପହଞ୍ଚତ୍ଥିବାବେଳେ ଗୁରୁବାରଠାରୁ ଟେଲିଫୋନ୍ ଏବଂ ଇଣ୍ଟରନେଟ୍ ସେବା ବନ୍ଦ ହୋଇଯାଇଛି। ଏହା ସାଙ୍ଗକୁ ଖାଇବାକୁ ନ ପାଇ ଲୋକେ ଛଟପଟ ହେଉଥିବା ଜାତିସଂଘର ଏକ ସଂସ୍ଥା ସୂଚନା ଦେଇଛି। ଫଳରେ ଗାଜାବାସୀ ଅତ୍ୟନ୍ତ ଦୟନୀୟ ସ୍ଥିତିରେ ରହିଛନ୍ତି। ଯୋଗାଯୋଗ ବିଚ୍ଛିନ୍ନ ହୋଇଯାଇଥିବାରୁ ପାଲେଷ୍ଟିନୀୟମାନଙ୍କ ନିକଟରେ ସହାୟତା ପହଞ୍ଚତ୍ବାରେ ବାଧା ସୃଷ୍ଟି ହୋଇଛି। ସେହିପରି ଉଦ୍ଧାରକାରୀ ଟିମ୍ ମଧ୍ୟ ଆବଶ୍ୟକ ସ୍ଥଳେ ପହଞ୍ଚତ୍ପାରୁ ନାହିଁ। ଦୁଇ ମାସରୁ ଊର୍ଦ୍ଧ୍ୱ ଯୁଦ୍ଧ ଅବଧି ମଧ୍ୟରେ କ୍ରମାଗତ ଏତେଦିନ ଟେଲିଫୋନ୍ ଏବଂ ଇଣ୍ଟରନେଟ୍ ସେବା ବ୍ୟାହତ ହୋଇ ନ ଥିଲା। ଗାଜା ଦକ୍ଷିଣ ଭାଗରେ ଟେଲିକମ୍ୟୁନିକେଶନ ଲାଇନ କ୍ଷତିଗ୍ରସ୍ତ ହୋଇଥିବାରୁ ଫୋନ୍ ସଂଯୋଗ ହୋଇପାରୁ ନ ଥିବା ଜାତିସଂଘ ମାନବୀୟ ବ୍ୟାପାର ବିଭାଗ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ ସାମରିକ କାର୍ଯ୍ୟାନୁଷ୍ଠାନ କମାଇ କେବଳ ହମାସ୍ ନେତାଙ୍କୁ ଟାର୍ଗେଟ କରିବା ପାଇଁ ଆମେରିକାର ପରାମର୍ଶ ସତ୍ତ୍ୱେ ଶନିବାର ଇସ୍ରାଏଲ୍ର ବୋମାମାଡ଼ରେ ଗାଜାର ୧୪ରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ଜବାଲିଆର ପୁରୁଣା ଗାଜା ଷ୍ଟିଟ୍ରେ ଥିବା ଦୁଇଟି ଘର ଉପରେ ଇସ୍ରାଏଲ୍ ସେନା ବୋମାମାଡ଼ କରିଥିଲା। ଘରଗୁଡ଼ିକର ଭଗ୍ନାବଶେଷ ତଳେ ବହୁ ଲୋକ ପୋତିହୋଇଯାଇଥିବା ଆଶଙ୍କା କରାଯାଉଛି। ଇସ୍ରାଏଲ୍ ସେନା ଗାଜା ସିଟିର ଦୁଇଟି ସ୍କୁଲ୍ ଉପରେ ଆକ୍ରମଣ କରିବାରୁ କେତେଜଣ ଆତଙ୍କବାଦୀ ନିହତ ହୋଇଥିବା ବେଳେ ହମାସ୍ ଅସ୍ତ୍ରଶସ୍ତ୍ର ରଖିଥିବା ଖାନ୍ ୟୁନିସ୍ର ଏକ ଆପାର୍ଟମେଣ୍ଟ ଉପରେ ଇସ୍ରାଏଲ୍ ସୈନ୍ୟ ଚଢ଼ାଉ କରିଛନ୍ତି।
ଅକ୍ଟୋବର ୭ରେ ହମାସ୍ ଆତଙ୍କବାଦୀ ଇସ୍ରାଏଲ୍ ଉପରେ ଆକ୍ରମଣ କରିବା ପରେ ଏହାର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଗାଜା ବିରୋଧରେ ଯୁଦ୍ଧ ଘୋଷଣା କରିଥିଲେ। ଇସ୍ରାଏଲ୍ ଆକ୍ରମଣ ପରେ ଗାଜାର ୨୩ ଲକ୍ଷ ଲୋକଙ୍କ ମଧ୍ୟରୁ ୮୫ ପ୍ରତିଶତ ଘରଦ୍ୱାର ଛାଡ଼ି ପଳାଇଛନ୍ତି। ସେମାନେ ଦକ୍ଷିଣ ଭାଗରେ ଥିବା ଆଶ୍ରୟସ୍ଥଳଗୁଡ଼ିକରେ ଦୟନୀୟ ସ୍ଥିତିରେ ରହିଥିବାବେଳେ ମାନବୀୟ ସଙ୍କଟ ବଢ଼ିବାରେ ଲାଗିଛି। ଗତ ଶୁକ୍ରବାର ଇସ୍ରାଏଲ ସୈନ୍ୟ ଭୁଲ୍ବଶତଃ ୩ ଜଣ ଇସ୍ରାଏଲୀ ପଣବନ୍ଦୀଙ୍କୁ ହମାସ୍ ଆତଙ୍କବାଦୀ ଭାବି ହତ୍ୟା କରିଥିଲେ। ସେପଟେ ନେତାନ୍ୟାହୁ ସରକାର ପଣବନ୍ଦୀମାନଙ୍କୁ ଫେରାଇ ଆଣିବାରେ ବିଫଳ ହୋଇଥିବାରୁ ତେଲ୍ ଆଭିଭ୍ ମୁଖ୍ୟ ରାଜପଥରେ ଶୁକ୍ରବାର ହଜାର ହଜାର ଲୋକ ବିକ୍ଷୋଭ ପ୍ରଦର୍ଶନ କରିଥିଲେ। ସେମାନଙ୍କୁ ଫେରାଇ ଆଣିବା ଦିଗରେ ସରକାର ଅଧିକ ପଦକ୍ଷେପ ନେବା ଦାବିରେ ପଣବନ୍ଦୀଙ୍କ ପରିବାର ଲୋକେ ଅଭିଯାନ ଚଳାଇଛନ୍ତି। ଭୁଲ୍ରେ ପଣବନ୍ଦୀଙ୍କୁ ହତ୍ୟା ଘଟଣାରେ ଉତ୍ତେଜନା ବୃଦ୍ଧି ପାଇବା ସହ ସରକାରଙ୍କ ଉପରେ ଚାପ ବଢ଼ିଛି।
