ନୂଆଦିଲ୍ଲୀ,୧୩ ।୭: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଯୁଗ୍ମ ସଚିବ ଲଭ ଅଗ୍ରୱାଲ ମଙ୍ଗଳବାର କହିଛନ୍ତି ଲୋକେ କରୋନାର ତୃତୀୟ ଲହରୀକୁ ମୌସୁମୀର ଅପଡେଟ୍ ଭଳି ଗ୍ରହଣ କରୁଛନ୍ତି । ଏହାକୁ କେହି ଗମ୍ଭିରତାର ସହ ଗ୍ରହଣ କରୁ ନାହାନ୍ତି । ଏହାପ୍ରତି ଥିବା ଆମର କର୍ତ୍ତବ୍ୟକୁ ଏମାନେ ଭୁଲି ଯାଉଛନ୍ତି । କୋଭିଡ ନିୟମର ଉଲ୍ଲଂଘନ ବହୁ ସ୍ଥାନରେ ଦେଖାଯାଉଛି । ଯାହାର ପରିଣତି ଭୟଙ୍କର ହୋଇପାରେ । ଏହା ବ୍ୟତୀତ ଏପର୍ଯ୍ୟନ୍ତ କରୋନାକୁ ଦୂରେଇବା ପାଇଁ ଯେଉଁସବୁ କାମ କରାଯାଇଛି ଏହାଦ୍ୱାରା ସେସବୁ ବିଫଳ ହେବା ଭଳି ମନେ ହେଉଛି । ସେହିପରି ନୀତି ଆୟୋଗର ସଦସ୍ୟ ଡା. ବିକେ ପଲ କହିଛନ୍ତି ଏବେ ସାରା ବିଶ୍ୱ କରୋନା ତୃତୀୟ ଲହରର ସାମ୍ନା କଲାଣି । ହେଲେ ଭାରତରେ କିପରି ଏହାକୁ ରୋଗାଯାଇ ପାରିବ ସେ ଦିଗରେ ଆମେ ଚିନ୍ତା କରୁଛୁ ଓ କାର୍ଯ୍ୟ କରୁଛୁ । ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ କରୋନାର ତୃତୀୟ ଲହର କେବେ ଆସିବ ତାହା ଚିନ୍ତା କରିବା ପୂର୍ବରୁ ଏଥିପାଇଁ ଆମେ କେତେ ପ୍ରସ୍ତୁତ ଅଛୁ ତାହା ଦେଖିବା ଆବଶ୍ୟକ । ଆଉ କେମିତି ଏହାକୁ ଦୂରେଇ ଦେଇ ହେବ । ସୂଚନାଯୋଗ୍ୟ, କରୋନାର ଦ୍ୱିତୀୟ ଲହର ଦେଶରେ କମି ଯାଇଥିବା ବେଳେ କିଛି ରାଜ୍ୟରେ କିନ୍ତୁ ଏବେବି ସ୍ଥିତି ଚିନ୍ତାଜନକ ରହିଛି । ତେଣୁ ତୃତୀୟ ଲହର ଭୟଙ୍କର ହେବ ବୋଲି ବିଶେଷଜ୍ଞମାନେ ଅନୁମାନ ଲଗାଇଥିବାରୁ ଏଥିପ୍ରତି ଆମେ ଯଥେଷ୍ଟ ସତର୍କ ରହିବା ଦରକାର ।
