ଦିଗପହଣ୍ଡି,୧୬।୬(ଅଶେଷ ନାଥ ମିଶ୍ର) : ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ନିସ୍ତିିପୁର ଗ୍ରାମର ୮ରୁ ଅଧିକ ଜଣ ପାଗଳ ମାଙ୍କଡ କାମୁଡ଼ାରେ ଆହାତ ହୋଇଛନ୍ତି। ସେମାନଙ୍କୁ ନିକଟସ୍ଥ ଆଡ଼ପଡ଼ା ଗ୍ରାମ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପରେ ଛାଡି ଦିଆଯାଇଛି। ମଙ୍ଗଳବାର ଭୋରରେ ଗ୍ରାମର କିଛି ବ୍ୟକ୍ତି ଶୌଚ ପାଇଁ ଯାଉଥିବାବେଳେ ମାଙ୍କଡଟି ଗୋଡ଼ାଇ ଗୋଡ଼ାଇ ସେମାନଙ୍କୁ କାମୁଡ଼ିଥିଲା। ଏନେଇ ଗ୍ରାମବାସୀ ପାଟପୁର ବନବିଭାଗ କାର୍ଯ୍ୟାଳୟ କର୍ମଚାରୀଙ୍କୁ ଜଣାଇଥିଲେ। ଫରେଷ୍ଟର ସନ୍ତୋଷ କୁମାର ସାହୁ,ଫରେଷ୍ଟ ଗାର୍ଡ ସାରଥି କାର୍ଜୀ,ଜି.ଦିଲ୍ଲୀପ ଏବଂ ପାରା ବନ କର୍ମଚାରୀ ବୃନ୍ଦ ଗାଁରେ ପହଞ୍ଚି ମାଙ୍କଡଟିକୁ କାବୁ କରିବାପାଇଁ ଚେଷ୍ଟା କରିଥିଲେ ମଧ୍ୟ ସଫଳ ହୋଇନାହାନ୍ତି। ମାଙ୍କଡଟି ଗୋଟିଏ ଗଛରୁ ଅନ୍ୟ ଗଛକୁ ଡେଇଁ ବନ କର୍ମଚାରୀମାନଙ୍କୁ ଗାଁ ସାରା ବୁଲାଇ ଦେଇଥିଲା। ବନ କର୍ମଚାରୀ ବୃନ୍ଦ ମାଙ୍କଡକୁ ଧରିବା ପାଇଁ ନୟାନ୍ତ ହୋଇପଡ଼ିଥିଲେ।ବନ ବିଭାଗ ପକ୍ଷରୁ ଗାଁରେ ପାଗଳ ମାଙ୍କଡ ଉପଦ୍ରବ କରୁଥିବାରୁ ସତର୍କ ରହିବା ପାଇଁ ମାଇକ ଯୋଗେ ପ୍ରଚାର କରାଯାଇଛି।ଏନେଇ ଫରେଷ୍ଟର ବନ ବିଭାଗ ଉପରିସ୍ଥ ଅଧିକାରୀମାନଙ୍କୁ ଘଟଣା ସମ୍ପର୍କରେ ଜଣାଇଛନ୍ତି। ତାଲିମ ପ୍ରାପ୍ତ ମାଙ୍କଡ ଧରାଳିଙ୍କୁ ଡକାଯାଇ ମାଙ୍କଡକୁ କାବୁ କରାଯିବ। କିମ୍ବା ବନବିଭାଗ ପକ୍ଷରୁ ମାଙ୍କଡକୁ ଟ୍ରାଙ୍କୁଲାଇଜ କରାଯିବା ପରେ ତାକୁ ଧରାଯିବ ବୋଲି ସେ କହିଛନ୍ତି। ଗତ ସୋମବାର ଅପରାହ୍ନରୁ ସା ମଧ୍ୟରେ ଗ୍ରାମର ମହିଳା,ଯୁବତୀ ଓ କିଛି ଶିଶୁଙ୍କୁ ମାଙ୍କଡ ଗୋଡ଼ାଇ ଗୋଡ଼ାଇ କାମୁଡ଼ିଥିଲା। ଲୋକେ ପାଗଳ ମାଙ୍କଡର ଉପଦ୍ରବ ନେଇ ଆତଙ୍କିତ ହୋଇପଡିଛନ୍ତି। ସକାଳୁ ଗାଁରେ ତାଟି କବାଟ ପଡିଛି। ରାସ୍ତାଘାଟ ଶୂନଶାନ ହୋଇପଡିଛି। କିଛି ଯୁବକ ଠେଙ୍ଗା ଧରି ଗାଁ ସାରା ପହଁରା ମାରୁଥିବା ଦେଖିବାକୁ ମିଳିଛି।ଏନେଇ ଦିଗପହଣ୍ଡି ବନବିଭାଗ ରେଞ୍ଜର ଦିବ୍ୟ ରଞ୍ଜନ ସାହୁ ଙ୍କୁ ପଚାରିବାରୁ ପାଗଳ ମାଙ୍କଡ ଉପଦ୍ରବ ନେଇ ସୂଚନା ପାଇବା ପରେ ସେ ବନ କର୍ମଚାରୀଙ୍କୁ ଘଟଣାସ୍ଥଳକୁ ପଠାଇଛନ୍ତି।ମାଙ୍କଡ କାମୁଡା ନେଇ ବନ ବିଭାଗ ପକ୍ଷରୁ କୌଣସି କ୍ଷତିପୂରଣ ଦିଆଯିବା ବ୍ୟବସ୍ଥା ନଥିବା କହିଛନ୍ତି।
