ସାଓପଲୋ, ୨୩ା୧୦ (ଏପି)-ବ୍ରାଜିଲର ମହାନ ଫୁଟ୍ବଲର ପେଲେ ଶୁକ୍ରବାର ୮୦ ବର୍ଷରେ ପଦାର୍ପଣ କରିବେ। ୩ଥର ବିଶ୍ୱବିଜେତା କିନ୍ତୁ ତାଙ୍କ ଜନ୍ମଦିନକୁ ଜାକଜମକରେ ନ ପାଳି ପରିବାରର କେତେଜଣ ହାତଗଣତି ସଦସ୍ୟଙ୍କ ସହ ସାଓପଲୋ ବାହାରେ ଅତିବାହିତ କରିବେ। ଏହାସତ୍ତ୍ୱେ ଖେଳାଳି, ସମର୍ଥକ, ସେଲିବ୍ରିଟି ଓ ରାଜନେତାଙ୍କଠାରୁ ତାଙ୍କ ନିକଟକୁ ଶୁଭେଚ୍ଛା ବାର୍ତ୍ତାର ସୁଅ ଛୁଟିବ। ତାଙ୍କ ଦୀର୍ଘକାଳୀନ ମୁଖପାତ୍ର ପେପିଟୋ ଫର୍ନସ୍ କହିଛନ୍ତି ପେଲେଙ୍କର ସାଓପଲୋ ନିକଟବର୍ତ୍ତୀ ଗୁଆରୁଜା ସହରସ୍ଥିତ ସମୁଦ୍ରକୂଳରେ ଏକ ଅଟ୍ଟାଳିକା ରହିଛି। ସେହିଠାରେ ହିଁ ସେତାଙ୍କ ଜନ୍ମଦିନ ପାଳିବେ। ସେଠାରେ ସେ କୋଭିଡ୍-୧୯ ଆରମ୍ଭ ପୂର୍ବରୁ ଅବସ୍ଥାନ କରି ଆସୁଛନ୍ତି। ତାଙ୍କର ସାଓପଲୋ ଏବଂ ସାଣ୍ଟୋସଠାରେ ମଧ୍ୟ ବାସଭବନ ରହିଛି। ପେଲେ କେବଳ ତାଙ୍କ ପରିବାର ସହ ରହିବେ। କୌଣସି ପାର୍ଟି ହେବ ନାହିଁ। ଫ୍ରାଙ୍କୋ କହିଛନ୍ତି, ପେଲେଙ୍କ ଭାଇ ଜାଇର୍ ମାର୍ଚ୍ଚରେ କର୍କଟ ରୋଗରେ ପ୍ରାଣ ହରାଇଛନ୍ତି। ଏହି ଦୁଖଦଃ ଘଟଣାକୁ ଫୁଟ୍ବଲ କିମ୍ବଦନ୍ତୀ ଆଦୌ ପାସୋରୀ ପାରୁ ନାହାନ୍ତି। ଏଥିପାଇଁ ସାଧାରଣରେ କୌଣସି ବକ୍ତବ୍ୟ ଦେବାକୁ ଚାହୁ ନାହାନ୍ତି। ପେଲେ ହେଉଛନ୍ତି ବ୍ରାଜିଲର ସର୍ବକାଳୀନ ଅଗ୍ରଣୀ ସ୍କୋରର। ସେ ୭୭ଟି ଗୋଲ ସ୍କୋର କରିଥିବାବେଳେ ତାଙ୍କ ପଛରେ ନେମାର ଏପର୍ଯ୍ୟନ୍ତ ସୁଦ୍ଧା ୬୪ ଗୋଲ କରି ସାରିଲେଣି। କିନ୍ତୁ ଯଦି ବିଶ୍ୱକପ୍ ଟାଇଟଲ କଥା ବିଚାର କରାଯାଏ ତେବେ ପ୍ୟାରିସ ସେଣ୍ଟ୍ ଜର୍ମେନ ଷ୍ଟ୍ରାଇକର ତାଙ୍କଠାରୁ ବହୁ ପଛରେ ରହିଛନ୍ତି। ପେଲେ ୧୯୫୮, ୧୯୬୨ ଏବଂ ୧୯୭୦ ବିଶ୍ୱକପ୍ ଜିତିଛନ୍ତି। ଅନ୍ୟ କୌଣସି ଖେଳାଳି ଏହି ସଫଳତା ହାସଲ କରିପାରି ନାହାନ୍ତି।
