ନୂଆଦିଲ୍ଲୀ,୨୦ା୭: ନରେନ୍ଦ୍ର ମୋଦିଙ୍କ କେନ୍ଦ୍ର ସରକାର ୨୦୧୯ରେ କର୍ନାକଟରେ ନିର୍ବାଚିତ କଂଗ୍ରେସ ସରକାରକୁ ଭାଙ୍ଗିବା ପାଇଁ ଇସ୍ରାଏଲର ସ୍ପାଇଓ୍ବେର ପ୍ରୋଗ୍ରାମ ପେଗାସସ୍ ବ୍ୟବହାର କରିଥିଲା। ଏଭଳି ସଙ୍ଗିନ ଅଭିଯୋଗ ଆଣିଛନ୍ତି ସିଦ୍ଦରମୟା, ଡି କେ ଶିବକୁମାର ଓ ମାଲିକାର୍ଜୁନ ଖାର୍ଗେଙ୍କ ଭଳି ବରିଷ୍ଠ କଂଗ୍ରେସ ନେତା।
୨୭ ବର୍ଷ ଧରି ମୋ ପିଏ ଦାୟିତ୍ୱରେ ଥିବା ଭେଙ୍କଟେଶଙ୍କ ଫୋନକୁ ପେଗାସସ୍ ଦ୍ୱାରା ଟ୍ୟାପ କରାଯାଇଥିଲା। ପୂର୍ବତନ ମୁଖ୍ୟମନ୍ତ୍ରୀ କୁମାରସ୍ବାମୀଙ୍କ ପିଏ ସଥିଶ ଓ ପୂର୍ବତନ ପ୍ରଧାନମନ୍ତ୍ରୀ ଦେବ ଗୌଡ଼ାଙ୍କ ଓ୍ବାଚମ୍ୟାନ ମଞ୍ଜୁନାଥଙ୍କ ଫୋନକୁ ଟ୍ୟାପ କରିବା ପାଇଁ ସମାନ ସ୍ପାଇଓ୍ବେର ବ୍ୟବହାର କରାଯାଇଥିବା ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦରମୟା ଅଭିଯୋଗ କରିଛନ୍ତି।
ଉଲ୍ଲେଖଯୋଗ୍ୟ, କଂଗ୍ରେସ-ଜେଡି(ଏସ୍) ୨୦୧୯ରେ ସଂଖ୍ୟା ଗରିଷ୍ଠତା ହରାଇବା ପରେ ବି ଏସ୍ ୟେଦିୟୁରପ୍ପାଙ୍କ ନେତୃତ୍ୱାଧୀନ ଭାଜପା ସରକାରକୁ ଆସିଥିଲା। ୨୦୧୮ ବିଧାନସଭା ନିର୍ବାଚନରେ ଭାଜପା ସର୍ବାଧିକ ୧୦୪ ଆସନ ହାତେଇଥିବାବେଳେ କଂଗ୍ରେସ ୮୦ଟି ଓ ଜେଡି(ସ୍) ୩୬ଟି ଜିତିଥିଲା। ପ୍ରଥମେ ଭାଜପା ସରକାର କରିଥିଲା। କିନ୍ତୁ ସଂଖ୍ୟା ଗରିଷ୍ଠତା ପ୍ରମାଣ ଦେଇ ନ ପାରିବାରୁ ସରକାରକୁ ଗଢ଼ିଥିଲା କଂଗ୍ରେସ-ଜେଡି(ଏସ୍) ମେଣ୍ଟ। ବର୍ଷେ ୨ ମାସ ପରେ ଭୁଶୁଡ଼ି ପଡ଼ିଥିଲା ଏହି ସରକାର।
ଭାଜପା ଭଳି ସାମ୍ପ୍ରଦାୟିକ ଦଳକୁ ରୋକିବା ପାଇଁ ଆମେ ଜେଡି(ଏସ୍)କୁ ସମର୍ଥନ କରିଥିଲୁ। କିନ୍ତୁ ବର୍ଷକ ପରେ ଘୋଡ଼ା ବେପାର ଆରମ୍ଭ କରିଥିଲେ ୟେଦିୟୁରପ୍ପା। ଫଳରେ ୭ କଂଗ୍ରେସ ବିଧାୟକ ଭାଜପାରେ ମିଶିଯାଇଥିଲେ। ସେମାନେ ସ୍ବଇଚ୍ଛାରେ ଯାଇ ନ ଥିଲେ। ସେମାନଙ୍କ ଫୋନ ଟ୍ୟାପ କରାଯାଇ ଗୁପ୍ତ ତଥ୍ୟ ବାହାର କରାଯାଇଥିଲା। ମୋ ପାଖରେ ମୋବାଇଲ ନାହିଁ। ସେଥି ପାଇଁ ସେ ମୋ ପିଏଙ୍କ ଫୋନକୁ ଟ୍ୟାପ କରିଥିଲେ। ଏଭଳି ଡାର୍ଟି ଗେମ୍ ବନ୍ଦ ହେବା ଦରକାର ବୋଲି ସିଦ୍ଦରମୟା କହିଛନ୍ତି।
