ଜେରୁଜେଲମ୍/କାଏରୋ/ଓ୍ବାଶିଂଟନ୍,୧୦ା୧୦(ରଏଟର୍ସ/ଏ.ପି.):ଇସ୍ରାଏଲ୍ରେ ୨୪ ମାସ ଧରି କ୍ଷୋଭ, ଅନିଶ୍ଚିତତା ଓ ପୀଡ଼ା ଲାଗିରହିଥିଲା। କିନ୍ତୁ ଗୁରୁବାର ସକାଳେ ହୋଷ୍ଟେଜ୍ ସ୍କୋୟାର ରୂପେ ପରିଚିତ କେନ୍ଦ୍ରୀୟ ତେଲ୍ ଆଭିଭ୍ ଅଞ୍ଚଳ ହଠାତ୍ ଉତ୍ସବମୟ ହୋଇଯାଇଥିଲା। ଭିଡ଼ ଭିତରେ ଏକ ଶେମ୍ପେନ୍ ବୋତଲ ଖୋଲାଯାଇଥିଲା, ମିଷ୍ଟାନ୍ନ ବଣ୍ଟନ କରାଯାଇଥିଲା। ହସ ସହ ମିଳେଇ ଯାଇଥିଲା ଆନନ୍ଦର ଅଶ୍ରୁ। ସମସ୍ତେ ପରସ୍ପରକୁ ଆଲିଙ୍ଗନ କରିବାରେ ଲାଗିଲେ, ଯେତେବେଳେ ଖବର ଆସିଲା- ହମାସ୍ କବଳରେ ଥିବା ପଣବନ୍ଦୀମାନେ ମୁକ୍ତ ହେବେ। ଗାଜା ଷ୍ଟ୍ରିପ୍ରୁ ସେମାନେ ନିଜ ଘରକୁ ଫେରିବେ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଗାଜା ଶାନ୍ତି ଯୋଜନା ମୁତାବକ ହମାସ୍ ନିଜ କବଳରେ ରଖିଥିବା ୨୦ ଜୀବିତ ପଣବନ୍ଦୀଙ୍କୁ ମୁକ୍ତ କରିବ। ଏହା ବଦଳରେ ଇସ୍ରାଏଲ୍ ନିଜ ଜେଲଗୁଡ଼ିକରେ ରଖିଥିବା ପାଲେଷ୍ଟିନୀୟ କଏଦୀମାନଙ୍କୁ ଖଲାସ କରିବା ସହ ଗାଜାର ଅଧିକାଂଶ ଭୂଖଣ୍ଡରୁ ନିଜ ସେନା ପ୍ରତ୍ୟାହାର କରିନେବ। ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ସୋସିଆଲ ମିଡିଆରେ କହିଛନ୍ତି, ଭଗବାନଙ୍କ ସହଯୋଗରେ ଆମେ ସମସ୍ତ ପଣବନ୍ଦୀଙ୍କୁ ମୁକ୍ତ କରି ଘରକୁ ଫେରାଇ ଆଣିବୁ। ସେହିପରି ହମାସ୍ କହିଛି, ସଦ୍ୟ ସମ୍ପାଦିତ ଏହି ଡିଲ୍ ଇସ୍ରାଏଲୀ ସୈନ୍ୟ ପ୍ରତ୍ୟାହାରକୁ ସୁନିଶ୍ଚିତ କରିବା ସହ ପାଲେଷ୍ଟିନୟଙ୍କ ନିକଟରେ ସହାୟତା ପହଞ୍ଚାଇବା ଏବଂ ପଣବନ୍ଦୀ ଓ ବନ୍ଦୀଙ୍କ ବିନିମୟକୁ ଅନୁମତି ଦେବ। ବରିଷ୍ଠ ହମାସ୍ ଅଧିକାରୀ ଓସାମା ହମ୍ଦାନଙ୍କ ମତରେ ଗାଜାକୁ ମାନବୀୟ ସହାୟତା ପ୍ରବେଶ ଲାଗି ୫ ସୀମା ଫାଟକ ଖୋଲାଯିବ। ଆମେରିକା ମଧ୍ୟସ୍ଥତାରେ ହୋଇଥିବା ଡିଲ୍ ଅନୁଯାୟୀ ଗାଜା ସିଟି, ଖାନ୍ ୟୁନିସ୍, ରାଫାହ ଓ ଉତ୍ତର ଗାଜା ଭଳି ସବୁଠୁ ଜନବହୁଳ ଅଞ୍ଚଳରୁ ଇସ୍ରାଏଲୀ ସେନା ଫେରିଯିବ। ଇସ୍ରାଏଲ୍ ନିଜ ସଶସ୍ତ୍ର ବଳକୁ ଗୁରୁବାର ରାତି କିମ୍ବା ଶୁକ୍ରବାରଠାରୁ ପ୍ରତ୍ୟାହାର ଆରମ୍ଭ କରିପାରେ ବୋଲି ଆଶା କରାଯାଉଛି। ସେହିପରି ଇସ୍ରାଏଲ୍ ପ୍ରାୟ ୨,୦୦୦ ବନ୍ଦୀଙ୍କୁ ମୁକ୍ତ କରିବ। ସେମାନଙ୍କ ମଧ୍ୟରୁ ୨୫୦ ଜଣ ଦୀର୍ଘ ବର୍ଷ ପାଇଁ ଜେଲରେ ଦଣ୍ଡ ଭୋଗୁଥିବାବେଳେ ୧,୭୦୦ ଜଣଙ୍କୁ ଗାଜା ଯୁଦ୍ଧ ସମୟରେ ଇସ୍ରାଏଲ୍ ବନ୍ଦୀ କରିଥିଲା। ଆମେ ଚାହୁଁଥିବା କମାଣ୍ଡରମାନଙ୍କ ନାମ ତାଲିକା ସେମାନଙ୍କ ମୁକ୍ତି ପାଇଁ ଇସ୍ରାଏଲ୍କୁ ଦେଇସାରିଛୁ ବୋଲି ସେ କହିଛନ୍ତି।
ଇଜିପ୍ଟର ବିଚ୍ ରିସର୍ଟ ଶାର୍ମ ଏଲ୍-ଶେଖ୍ରେ ୦୯୦୦ ଜିଏମ୍ଟି ସମୟରେ ଇସ୍ରାଏଲ୍ ଓ ହମାସ୍ ଶାନ୍ତିଚୁକ୍ତିରେ ସ୍ବାକ୍ଷର କରିବା ପାଇଁ ଧାର୍ଯ୍ୟ ହୋଇଥିଲା। ତେବେ ସେଥିରେ କେଉଁମାନେ ସ୍ବାକ୍ଷର କରିଛନ୍ତି ସେନେଇ ଆନୁଷ୍ଠାନିକ ଭାବେ କିଛି କୁହାଯାଇ ନାହିଁ। ଅନ୍ୟପକ୍ଷେ ଯୁଦ୍ଧବିରତି ପାଇଁ ଉଭୟ ପକ୍ଷ ପ୍ରଥମ ପର୍ଯ୍ୟାୟ ଡିଲ୍ରେ ସ୍ବାକ୍ଷର କରିଥିବା ନେଇ ରାଷ୍ଟ୍ରପତି ଟ୍ରମ୍ପ୍ ଘୋଷଣା କରିବା ପରେ ଇସ୍ରାଏଲୀ ଓ ପାଲେଷ୍ଟିନୀୟଙ୍କ ମଧ୍ୟରେ ଖୁସିର ଲହର ଦେଖିବାକୁ ମିଳିଛି। ଉଭୟ ଶତ୍ରୁପକ୍ଷ ଉକ୍ତ ଡିଲ୍କୁ ଖୋଲାଖୋଲି ସମର୍ଥନକରି ଉତ୍ସବ ପାଳୁଛନ୍ତି। ଇସ୍ରାଏଲ୍ ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ଅଫିସ ପକ୍ଷରୁ କୁହାଯାଇଛି ଯେ, ଇସ୍ରାଏଲୀ ସରକାର ସୁରକ୍ଷା ସମ୍ପର୍କିତ କ୍ୟାବିନେଟ୍ ବୈଠକରେ ଡିଲ୍କୁ ଅନୁଧ୍ୟାନ କରିବା ପରେ ଏନେଇ ଅଙ୍ଗୀକାର ପ୍ରକାଶ କରିବ। ଇସ୍ରାଏଲୀ ହୋଷ୍ଟେଜ୍ କୋଅର୍ଡିନେଟର ଗଲ୍ ହିର୍ସ୍କ କହିଛନ୍ତି, ପାଲେଷ୍ଟିନୀୟ ଜେଲଗୁଡ଼ିକରୁ କେଉଁ ବନ୍ଦୀମାନଙ୍କୁ ଛଡ଼ାଯିବ ତାହା ଉପରେ କାର୍ଯ୍ୟ ଜାରି ରହିଛି। ଇତିମଧ୍ୟରେ ଡିଲ୍ ସ୍ବାକ୍ଷର ପାଇଁ ଧାର୍ଯ୍ୟ ହୋଇଥିବା ସମୟରେ ଇସ୍ରାଏଲ୍ ପକ୍ଷରୁ ଆକାଶମାର୍ଗରୁ ଗାଜା ଉପରେ ଲଗାତର ରକେଟ ମାଡ଼ କରାଯାଇଥିବା ଗାଜାବାସୀ ଅଭିଯୋଗ ଆଣିଛନ୍ତି। ତେବେ ଏହି ଚୁକ୍ତି କେବଳ ଗାଜା ପାଇଁ ସୀମିତ ନୁହେଁ, ବରଂ ଏଥିଯୋଗୁ ସମଗ୍ର ମଧ୍ୟପ୍ରାଚ୍ୟକୁ ଶାନ୍ତି ଫେରିବ ବୋଲି ରାଷ୍ଟ୍ରପତି ଟ୍ରମ୍ପ୍ ଘୋଷଣା କରିଛନ୍ତି।
Dharitri – Odisha’s No.1 Odia Daily
