ରାୟଗଡା ଅଫିସ, ୨୮।୯: ଓଡ଼ିଶା ପ୍ରଦେଶ କଂଗେସ କମିଟି ସଭାପତି ଶରତ ପଟ୍ଟନାୟକ ଦିନିକିଆ ରାୟଗଡ଼ର ଜିଲା ଗସ୍ତରେ ଆସି ଅଶୋକ କଲ୍ୟାଣ ମଣ୍ଡପରେ ଆୟୋଜିତ ସଭାରେ ଯୋଗ ଦେଇଥିଲେ। ଆଗାମୀ ସାଧାରଣ ନିର୍ବାଚନରେ କଂଗ୍ରେସ ୯୦ ସିଟ୍ ହାତେଇବା ଲକ୍ଷ୍ୟ କରି କାମ କରୁଛି ବୋଲି ସେ କହିଛନ୍ତି। ଏଥିପାଇଁ କର୍ମୀ, ନିର୍ବାଚନ ପ୍ରତିନିଧି, କଂଗ୍ରେସ ପ୍ରେମୀ ସମସ୍ତେ ଉଦ୍ୟମ କରନ୍ତୁ ବୋଲି ସେ ଆହ୍ବାନ ଦେଇଛନ୍ତି। ଗତ ୧୯ ତାରିଖରେ କଂଗ୍ରେସ ରାୟଗଡା ବ୍ଲକ ସଭାପତିଙ୍କୁ ବିରୋଧୀ ଆକ୍ରମଣ କରିଥିବା ଅଭିଯୋଗ କରି ସେ ଶେଷଖାଲ ଥାନାରେ ଏତଲା ଦେଇଛନ୍ତି। ପୋଲିସ ଏହି ଘଟଣାର ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ହେଲେ ଥାନା ଘେରାଉ କରାଯିବ ବୋଲି ସେ କହିଛନ୍ତି।
ପିସିସି ସଭାପତି ସକାଳୁ ମାଁ ମଝି ଘରିଆଣିଙ୍କ ମନ୍ଦିରରେ ଦର୍ଶନ ସାରିବା ପରେ ଏକ ପଦଯାତ୍ରାରେ ତାଙ୍କୁ ଅଶୋକ କଲ୍ୟାଣ ମଣ୍ଡପ ପର୍ଯ୍ୟନ୍ତ ଅଣାଯାଇଥିଲା। ସେଠାରେ ଏକ ବୈଠକ କରାଯାଇଥିଲା। ଆୟୋଜିତ ବୈଠକରେ ଜିଲା କଂଗ୍ରେସ କମିଟି ସଭାପତି ଦୁର୍ଗା ପ୍ରସାଦ ପଣ୍ଡା, କୋରାପୁଟ ଏମ୍ପି ସପ୍ତଗିରି ଶଙ୍କର ଉଲ୍ଲାକା, ମହିଳା କଂଗ୍ରେସ ଷ୍ଟେଟ ସଭାପତି ବନ୍ଦିତା ପରିଡା, ପିସି ସି ଭାଇସପ୍ରେସିଡେଣ୍ଟ ରତ୍ନମଣି ଉଲାକା, କିଶୋର ଚନ୍ଦ୍ର ଜେନା, ସିମାଞ୍ଚଳ ଉଲାକା, ଆପଲ ସ୍ବାମୀ କାଡ୍ରାକାଙ୍କ ସହ ଅନ୍ୟକର୍ମୀ ମାନେ ଉପସ୍ଥିତ ଥିଲେ। ୨୨ ବର୍ଷର ବିଜେଡି ସରକାର ମହିଳା ସଶକ୍ତିକରଣ ନାମରେ ଭୋଟ ହାତଉଛି ବୋଲି କଂଗ୍ରେସ କମିଟି ସଭାପତି ଦୁର୍ଗା ପ୍ରସାଦ ପଣ୍ଡା କହିଛନ୍ତି। ଦୁର୍ଗମ ଅଞ୍ଚଳରେ ଟାୱାର ନିର୍ମାଣ ପାଇଁ ପାର୍ଲାମେଣ୍ଟରେ ବାରମ୍ବାର ଦାବୀ ପରେ ଟାୱାର ନିର୍ମାଣ ହୋଇଛି। କିନ୍ତୁ ମୁଁ କଂଗେସ ଦଳ ନେତା ବୋଲି ମୋତେ ଉଦ୍ଘାଟନ ପାଇଁ ଡକାଯାଉ ନାହିଁ ବୋଲି ସେ କହିଛନ୍ତି। ମୁଁ କେବଳ କଂଗ୍ରେସର ନୁହେଁ ଅବିଭକ୍ତ କୋରାପୁଟ ଜିଲାର ନେତା ବୋଲି ସେ କହିଛନ୍ତି। ରାୟଗଡ଼ା ବ୍ଲକ ବିଜେଡି ସଂଗଠକ ନବୀନ ଚନ୍ଦ୍ର ନାୟକ ଦଳ ଛାଡି କଂଗ୍ରେସରେ ମିଶିଥିଲେ ।
