ସୋର,୯।୫(ଡି.ଏନ.ଏ.): ବାଲେଶ୍ୱର ଜିଲା ସୋର ଥାନା ତଳନଗର ପଞ୍ଚାୟତ ଅଧୀନ ଏକ ରାସ୍ତାକୁ ରାଜନୈତିକ ଆକ୍ରୋଶରୁ ଜେସିବି ଲଗାଇ ୪ଟି ସ୍ଥାନରେ ଖୋଳି ଦିଆଯାଇଥିବା ଅଭିଯୋଗ ହୋଇଛି। ନିର୍ବାଚନ ଫଳାଫଳ ପରେ ଜନୈକ ପରାଜିତ ପ୍ରାର୍ଥୀଙ୍କ ସହ ତାଙ୍କ ସମର୍ଥକ ଏହି ପଞ୍ଚାୟତର ବରଡାସାହି ବାସିନ୍ଦାଙ୍କୁ ପରିଣାମ ଭୋଗିବାକୁ ଧମକଚମକ ଦେଇ ଆସୁଥିଲେ। ଶୁକ୍ରବାର ଏହି ସାହିକୁ ସଂଯୋଗ କରୁଥିବା ରାସ୍ତାର ୪ଟି ଜାଗାରେ ଜେସିବି ଲଗାଇ ୧୦ଫୁଟ୍ ଓସାର ରାସ୍ତା ବିଚ୍ଛିନ୍ନ କରିଥିବା ଅଭିଯୋଗରେ ଦର୍ଶାଯାଇଛି। ଏନେଇ ଗ୍ରାମର ମୀନତିରାଣୀ ନାୟକ, ଶରତ ବିଶ୍ୱାଳ, ଶାନ୍ତିଲତା ବିଶ୍ୱାଳ, ଶାନ୍ତିଲତା ନାୟକ, କମଳା ନାୟକ, ଜାନକୀ ଜେନା, ସରୋଜିନୀ ନାୟକ, ଶ୍ରୀମୟା ନାୟକ, ଗୀତାଞ୍ଜଳି ମହାନ୍ତି ପ୍ରମୁଖଙ୍କ ସହ ଗ୍ରାମର ଅନ୍ୟ ମହିଳା ଥାନାରେ ଲିଖିତ ଅଭିଯୋଗ କରି ଧାରଣାରେ ବସିଥିଲେ। ପୋଲିସ ଅଭିଯୋଗ ପାଇ ଘଟଣାର ତଦନ୍ତ କରୁଛି। ଏହି ଗ୍ରାମରେ ବସବାସ କରୁଥିବା ୨୦ରୁ ଊର୍ଦ୍ଧ୍ୱ ପରିବାର ପୁରୁଷାନୁକ୍ରମେ ଗ୍ରାମକୁ ସଂଯୋଗ କରୁଥିବା ଏହି ଏକମାତ୍ର ରାସ୍ତାରେ ଯାତାୟାତ କରୁଥିଲେ।
