ପାରଳାଖେମୁଣ୍ଡି, ୧୩।୮ (ଡି.ଏନ୍.ଏ): ଜିଲା ସଦର ମହକୁମା ପାରଳାଖେମୁଣ୍ଡି ସହରର ସବୁ ରାସ୍ତା ଅବସ୍ଥ୍ୟ ଏବେ ଶୋଚନୀୟ ହୋଇପଡ଼ିଛି। ସହରର ଦୁଇଟି ମୁଖ୍ୟ ରାସ୍ତା ରହିଥିବା ବେଳେ କୋଟି କୋଟି ଟଙ୍କା ବ୍ୟୟବରାଦ କରାଯାଇ ଦୁଇ ବର୍ଷ ପୂର୍ବେ ନିର୍ମାଣ କରାଯାଇଥିଲା। ହେଲେ ଯନ୍ତ୍ରୀ ଓ ଠିକାଦାରଙ୍କ ମଧୁଚନ୍ଦ୍ରିକା ଯୋଗୁ ଏହି ରାସ୍ତାର ଅବସ୍ଥା ବର୍ତ୍ତମାନ ଏପରି ଅବସ୍ଥା ହୋଇଥିବା ଲୋକେ ଅଭିଯୋଗ କରିଛନ୍ତି। ରାଣୀପେଣ୍ଠ ତଥା ଗୁମ୍ମାଗଡା ଠାରୁ ରାମସାଗର ଓ ପୁରୁଣା କୋର୍ଟ ଛକ ଠାରୁ ମେଡିକାଲ ଛକ ରାସ୍ତାକୁ ଦେଖିଲେ କେତେ କଦର୍ଯ୍ୟ କର୍ଦ୍ଦମାନ୍ତ ହୋଇଛି ତାହା ନଦେଖିଲେ ବିଶ୍ୱାସ କରିହେବ ନାହିଁ। ପୁରୁଣା କୋର୍ଟ ଛକ ଠାରୁ ମେଡିକାଲ ଛକ ପ୍ରାୟ ୪କିମି ରାସ୍ତା ୨ବର୍ଷ ପୂର୍ବେ ର୍ନିମିତ ହୋଇଥିଲ। କିନ୍ତୁ ବର୍ତ୍ତମାନ ଏହାର ଅବସ୍ଥା ବହୁ ଶୋଚନୀୟ। ରାସ୍ତା ସାରା ଖାଲଖମାରେ ଭର୍ତ୍ତି ଯୋଗୁଁ ପ୍ରତିଦିନ ଛୋଟ ବଡ଼ ଦୁର୍ଘଟଣା ଘଟୁଛି। ଦୁଇ ଚକିଆ ଯାନବାହାନ ଚଳାଚଳ କରିବା ବି ମୁସ୍କିଲ ହୋଇପଡୁଛି। ସେହିଭଳି ପୋଲିସ ଷ୍ଟେସନ ଛକଠାରୁ ପୁରୁଣା କୋର୍ଟ ଛକ ପର୍ଯ୍ୟନ୍ତ ରାସ୍ତାରେ ଅଗଣିତ ଖାଲଖମା ରହିଛି । ମୁଖ୍ୟତଃ ୧୪ନମ୍ବର ୱାର୍ଡ ଅନ୍ତର୍ଗତ ଷ୍ଟେଟ୍ ବ୍ୟାଙ୍କ ରାସ୍ତାରୁ ବାଟଗୌଡ ସାହି ଛକ ରାସ୍ତା କଦର୍ଯ୍ୟ ହୋଇପଡିଛି। ରାସ୍ତାର ପ୍ରଶସ୍ତିକରଣ ନାମରେ ମୁଖ୍ୟ ନାଳଗୁଡିକୁ ପୋତି ଦିଆଯାଇଛି। ନାଳ ନଥିବାରୁ ବାଧ୍ୟ ହୋଇ ଲୋକେ ଘରର ପାଇଖାନା ଠାରୁ ଆରମ୍ଭ କରି କର୍ଦ୍ଦମାକ୍ତ ପାଣି ମୁଖ୍ୟରାସ୍ତାକୁ ଛାଡ଼ୁଛନ୍ତି। ଫଳରେ ମୁଖ୍ୟରାସ୍ତାଟି ସଦାସର୍ବଦା ପୂତ୍ତିଗନ୍ଧମୟ ପରିବେଶ ସୃଷ୍ଟି କରୁଛି। ଏହି ୱାର୍ଡରେ ବଡ ବଡ ନେତାମାନେ ରହୁଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି। ତେଣୁ ପୂର୍ତ୍ତ ବିଭାଗ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଜନସାଧାରଣ ଦାବି କରିଛନ୍ତି।
