ଭଞ୍ଜନଗର,୨୧।୮(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗରସ୍ଥିତ କେନ୍ଦ୍ରୀୟ ବିଦ୍ୟାଳୟରେ ଶୁକ୍ରବାର ଅଭିଭାବକ ସମ୍ମିଳନୀ ଅନୁଷ୍ଠିତ ହୋଇଯାଇଛି। ବିଦ୍ୟାଳୟର ଅଧ୍ୟକ୍ଷ ପ୍ରଦୀପ କମାନୁଙ୍କ ଅଧ୍ୟକ୍ଷତାରେ ଆୟୋଜିତ ଏହି ସମ୍ମିଳନୀରେ ଛାତ୍ରୀଛାତ୍ରଙ୍କ ଶିକ୍ଷା, ମାନସିକ ବିକାଶ, ଶୃଙ୍ଖଳା ଓ ସର୍ବାଙ୍ଗୀନ ବିକାଶ ସମ୍ପର୍କରେ ଆଲୋଚନା ହୋଇଥିଲା।
ଅଧ୍ୟକ୍ଷ ଶ୍ରୀ କମାନୁ କହିଥିଲେ ଯେ, ଅଭିଭାବକ ହେଉଛନ୍ତି ଶିଶୁଙ୍କ ପ୍ରଥମ ଗୁରୁ। ଶିଶୁମାନେ ସବୁ କଥା ସବୁବେଳେ ଅଭିଭାବକଙ୍କୁ କହି ନ ଥାନ୍ତି। ତେଣୁ ସେମାନଙ୍କୁ ପର୍ଯ୍ୟାପ୍ତ ସମୟ ଦେବା, ଧୈର୍ଯ୍ୟର ସହ କଥା ଶୁଣିବା ଏବଂ ଆବଶ୍ୟକ ସମୟରେ ଉତ୍ସାହିତ କରିବା ଅଭିଭାବକଙ୍କ ଦାୟିତ୍ୱ। ଶିଶୁଙ୍କ ସମ୍ମୁଖରେ ଅଭିଭାବକମାନେ ନିଜ କଥାବାର୍ତ୍ତା ଓ ଆଚରଣ ଉପରେ ସଞ୍ଜମ ରଖିବା ଆବଶ୍ୟକ। ଘରେ ଚାପମୁକ୍ତ ଓ ସକାରାତ୍ମକ ପରିବେଶ ରହିଲେ ଶିଶୁଙ୍କ ଆତ୍ମବିଶ୍ୱାସ, ସୃଜନଶୀଳତା ଓ ଶିକ୍ଷା ପ୍ରତି ଆଗ୍ରହ ବୃଦ୍ଧି ପାଇବ ବୋଲି ସେ ପରାମର୍ଶ ଦେଇଥିଲେ। ବିଦ୍ୟାଳୟର ଶିକ୍ଷା ପରିବେଶର ଉନ୍ନତି, ଛାତ୍ରୀଛାତ୍ରଙ୍କ ସର୍ବାଙ୍ଗୀନ ବିକାଶ ଓ ଉନ୍ନତ ଫଳାଫଳ ପାଇଁ ବିଦ୍ୟାଳୟ ପକ୍ଷରୁ ନିଆଯାଉଥିବା ବିଭିନ୍ନ ପଦକ୍ଷେପ ସମ୍ପର୍କରେ ମଧ୍ୟ ଅଧ୍ୟକ୍ଷ ଅଭିଭାବକମାନଙ୍କୁ ଅବଗତ କରାଇଥିଲେ।
ଛାତ୍ରୀଛାତ୍ରଙ୍କ ଅଧ୍ୟୟନ ପ୍ରଗତି ସହିତ ସେମାନଙ୍କ ଆଚରଣ, ଉପସ୍ଥାନ, ଶୃଙ୍ଖଳା ଓ ବ୍ୟକ୍ତିତ୍ୱ ବିକାଶ ଉପରେ ଅଭିଭାବକ ଓ ଶିକ୍ଷକଙ୍କ ମିଳିତ ସହଯୋଗ ଆବଶ୍ୟକ ବୋଲି ଆଲୋଚନା ହୋଇଥିଲା। ସମ୍ମିଳନୀରେ ଷଷ୍ଠ ଓ ସପ୍ତମ ଶ୍ରେଣୀର ଶ୍ରେଣୀ ଶିକ୍ଷୟିତ୍ରୀ ସୁମନ କୁମାରୀ ଓ ଶିକ୍ଷକ ମଞ୍ଜିତଙ୍କ ସମେତ ଟିଜିଟି ସଂସ୍କୃତ ଶିକ୍ଷକ ଜ୍ୟୋତିପ୍ରକାଶ ସାହୁ, ପିଜିଟି ରସାୟନ ବିଜ୍ଞାନ ଶିକ୍ଷକ ଯଜ୍ଞଦତ୍ତ ନାହାକ, ପିଜିଟି ଜୀବବିଜ୍ଞାନ ଶିକ୍ଷୟିତ୍ରୀ ସୌମ୍ୟା ତ୍ରିପାଠୀ ପ୍ରମୁଖ ଆଲୋଚନାରେ ଅଂଶଗ୍ରହଣ କରି ଛାତ୍ରୀଛାତ୍ରଙ୍କ ଶିକ୍ଷା ଓ ବିଦ୍ୟାଳୟର ପ୍ରଗତି ସମ୍ପର୍କରେ ଅଭିଭାବକଙ୍କ ସହ ଆଲୋଚନା କରିଥିଲେ। ବହୁ ସଂଖ୍ୟକ ଅଭିଭାବକ ଯୋଗଦେଇ ନିଜ ମତାମତ ଓ ପରାମର୍ଶ ରଖିଥିଲେ। ଏହି ସମ୍ମିଳନୀ ମାଧ୍ୟମରେ ବିଦ୍ୟାଳୟ ଓ ଅଭିଭାବକଙ୍କ ମଧ୍ୟରେ ସମନୱୟ ଆହୁରି ସୁଦୃଢ଼ ହୋଇଥିବା ଅଭିଭାବକ ମାନେ କହିଥିଲେ।
Dharitri – Odisha’s No.1 Odia Daily
