ବଇଣ୍ଡା, ୨୭।୨(ଡି.ଏନ୍.ଏ.): କରୋନାର ତୃତୀୟ ଲହର ନିୟନ୍ତ୍ରଣକୁ ଆସିବା ପରେ ଦୀର୍ଘ ଦୁଇବର୍ଷ ପରେ ସୋମବାରଠାରୁ ଆରମ୍ଭ ହେଉଛି ପ୍ରାଥମିକ ସ୍କୁଲ। ଶ୍ରେଣୀଗୃହରେ ପ୍ରତ୍ୟକ୍ଷ ଶିକ୍ଷାଦାନ ଲାଗି ସରକାରୀସ୍ତରରେ ନିର୍ଦ୍ଦେଶନାମା ଜାରି କରାଯିବା ପରେ ଶିକ୍ଷା ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି। ଶିକ୍ଷାନୁଷ୍ଠାନରେ ଶୈଖିକ ବାତାବରଣ ଫେରାଇ ଆଣିବାକୁ ବିଦ୍ୟାଳୟ କର୍ତ୍ତୃପକ୍ଷ ପ୍ରସ୍ତୁତି ଚଳାଇଛନ୍ତି। ତେବେ ଅନୁଗୋଳ ଜିଲା କିଶୋରନଗର ବ୍ଲକ ବଇଣ୍ଡାସ୍ଥିତ କିଶୋରଗଞ୍ଜ ସରକାରୀ ପ୍ରାଥମିକ ବିଦ୍ୟାଳୟରେ ଏହାର ବ୍ୟତିକ୍ରମ ଦେଖାଦେଇଛି। ବିପଦସଙ୍କୁଳ ଶ୍ରେଣୀଗୃହରେ ପାଠ ପଢ଼ାଇବାକୁ ପ୍ରସ୍ତୁତି ଚାଲିଥିବାବେଳେ ଏହାକୁ ନେଇ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି ଅଭିଭାବକ। ପିଲାଙ୍କ ଜୀବନ ପ୍ରତି ବିପଦ ଆଶଙ୍କା ଥିବାରୁ ପୁରୁଣା ଶ୍ରେଣୀଗୃହରେ ପାଠ ପଢ଼ାଇବା ଲାଗି ଛାଡ଼ିବାକୁ ସେମାନେ ଅମଙ୍ଗ ହେଉଛନ୍ତି।
ସମସ୍ୟା ନେଇ ଶନିବାର ବିଦ୍ୟାଳୟ ପରିସରରେ ବୈଠକ ଅନୁଷ୍ଠିତ ହୋଇଥିଲା। ପ୍ରଧାନ ଶିକ୍ଷକ ଅକ୍ଷୟ ବେହେରାଙ୍କ ସଭାପତିତ୍ୱରେ ଅଭିଭାବକ ତପନ ଦେହୁରୀ, ମନୋଜ ବେହେରା, ବିଭୁଦତ୍ତ ମହାପାତ୍ର, ସୁରେଶ ଚନ୍ଦ୍ର ସାହୁ, ପ୍ରାଣବନ୍ଧୁ ସାହୁ, ରାଜୁ ମହାପାତ୍ର, ମଞ୍ଜୁ ମୁଣ୍ଡା, ନମିତା ବେହେରା, ମିତା ସାହୁ, ସସ୍ମିତା ସାହୁ, ରୁନୁ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ଅଭିଭାବକମାନେ କହିଥିଲେ, ୫୫ନଂ. ଜାତୀୟ ରାଜପଥ କଡରେ ଥିବା କିଶୋରଗଞ୍ଜ ସରକାରୀ ପ୍ରାଥମିକ ବିଦ୍ୟାଳୟରେ ବହୁ ସମସ୍ୟା ଲାଗି ରହିଛି। ରାସ୍ତା ସମ୍ପ୍ରସାରଣ ଯୋଗୁ ବିଦ୍ୟାଳୟର ଏକାଧିକ ଶ୍ରେଣୀ ଗୃହ ଭଙ୍ଗାଯାଇଛି।
୫୦ ବର୍ଷ ପୁରୁଣା ଏହି ସ୍କୁଲର ୨ ଆଜବେଷ୍ଟସ ଏବଂ ୪ଟି ଛାତଘର ରହିଛି। ଛାତ ଘର ମଧ୍ୟରୁ ଗୋଟିଏ କାର୍ଯ୍ୟାଳୟ ଭାବେ ବ୍ୟବହୃତ ହେଉଛି। ସରକାରୀ ନିର୍ଦ୍ଦେଶ ପରେ ଅବଶିଷ୍ଟ ୩ ଶ୍ରେଣୀ ପ୍ରକୋଷ୍ଠରେ ପାଠ ପଢ଼ାଇବା ଲାଗି ନିଷ୍ପତ୍ତି ରହିଛି। ତେବେ ୧୨୬ ପିଲାଙ୍କ ଲାଗି ଏହା ଯଥେଷ୍ଟ ହେବ ନାହିଁ। ଫଳରେ ସମସ୍ୟା ଉପୁଜିବ ବୋଲି ଅଭିଭାବକମାନେ ଆଶଙ୍କା ବ୍ୟକ୍ତ କରିଛନ୍ତି।
ଅନ୍ୟପଟେ ସ୍କୁଲ ନିକଟ ସରକାରୀ ଜମିରେ ନୂତନ ଶ୍ରେଣୀଗୃହ ନିର୍ମାଣ ଲାଗି ବାରମ୍ବାର ଦାବି ସତ୍ତ୍ୱେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ବିଦ୍ୟାଳୟକୁ ବଇଣ୍ଡା ହାଇସ୍କୁଲ ନିକଟରେ ସ୍ଥାପନ କରିବାକୁ ଯୋଜନା କରାଯାଉଥିବାବେଳେ ଏହାକୁ ଗ୍ରାମବାସୀ ବିରୋଧ କରୁଛନ୍ତି। ଫଳରେ ନୂତନ ବିଦ୍ୟାଳୟ ନିର୍ମାଣ ହୋଇପାରୁନାହିଁ। ତେଣୁ ସ୍କୁଲ ପରିସରରେ ଥିବା ଜାଗାରେ ନୂତନ ଶ୍ରେଣୀ ପ୍ରକୋଷ୍ଠ ନିର୍ମାଣ କରିବାକୁ ଅଭିଭାବକମାନେ ଦାବି କରିଛନ୍ତି। ଏହା ନ ହେଲେ ଆନ୍ଦୋଳନ କରାଯିବ ବୋଲି ସେମାନେ ଚେତାବନୀ ଦେଇଛନ୍ତି। ଏ ନେଇ ବିଦ୍ୟାଳୟର ପ୍ରଧାନ ଶିକ୍ଷକ ଅକ୍ଷୟ କୁମାର ବେହେରା କହିଛନ୍ତି, ବିଦ୍ୟାଳୟର ସମସ୍ତ ସମସ୍ୟା ସମ୍ପର୍କରେ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଛି।
