ଲଣ୍ଡନ, ୬ା୬ (ପି.ଟି.): ଭାରତ ଓ ଅଷ୍ଟ୍ରେଲିଆ ମଧ୍ୟରେ ଜୁନ୍ ୭ ତାରିଖରେ ଓଭାଲରେ ଖେଳାଯିବ ବିଶ୍ୱ ଟେଷ୍ଟ ଚାମ୍ପିୟନଶିପ୍(ଡବ୍ଲ୍ୟୁଟିସି) ଫାଇନାଲ ମ୍ୟାଚ। ଏହି ମ୍ୟାଚରେ ଭାରତ ଦୁଇ ସ୍ପିନରଙ୍କ ସହିତ ଖେଳିବା ଉଚିତ୍ ବୋଲି ପୂର୍ବାନୂମାନ କରିଛନ୍ତି ଇଂଲଣ୍ଡର ପୂର୍ବତନ ସ୍ପିନର ମଣ୍ଟି ପାନେସର। ଅଷ୍ଟ୍ରେଲିଆ ବିପକ୍ଷ ଫାଇନାଲ ପାଇଁ ଭାରତ ଉଭୟ ରବିଚନ୍ଦ୍ରନ ଅଶ୍ୱିନ ଓ ରବୀନ୍ଦ୍ର ଜାଡେଜାଙ୍କୁ ଖେଳାଇବା ଉଚିତ୍। ୧୪୦ ବର୍ଷର ଟେଷ୍ଟ ଇତିହାସରେ ପ୍ରଥମ ଥର ପାଇଁ ଓଭାଲରେ ଜୁନ୍ ମାସରେ ଏକ ଟେଷ୍ଟ ମ୍ୟାଚ୍ ଖେଳାଯିବ। ପିଚ୍ରେ ପ୍ରଚୁର ପରିମାଣରେ ଘାସ ରହିଥିବା ବେଳେ ଏହା କିଭଳି ବ୍ୟବହାର କରିବ ସମସ୍ତଙ୍କ ମନରେ ଦ୍ୱନ୍ଦ୍ୱ ରହିଛି। ସାଧାରଣତଃ ଏଠାରେ ଅଗଷ୍ଟ ଓ ସେପ୍ଟେମ୍ବର ମାସରେ ଟେଷ୍ଟ ମ୍ୟାଚ୍ ଖେଳାଯାଇଥାଏ। ତେବେ ଏହା ଏକମାତ୍ର ଭେନ୍ୟୁ ଯେଉଁଠାରେ ଇଂଲଣ୍ଡ ଦୁଇ ଜଣ ସ୍ପିନରଙ୍କ ସହିତ ଖେଳିବାକୁ ପସନ୍ଦ କରିଥାଏ। ଯଦି ବଲ ଟର୍ନ ହୁଏ ତେବେ ଏହି ପିଚ୍ ବ୍ୟାଟରଙ୍କ ପାଇଁ ମାରାତ୍ମକ ସାବ୍ୟସ୍ତ ହେବ। ଅଷ୍ଟ୍ରେଲିଆ ବ୍ୟାଟର ସର୍ବଦା ସ୍ପିନରଙ୍କ ସମ୍ମୁଖରେ ଖରାପ ଖେଳିଥାନ୍ତି ବିଶେଷ କରି ଭାରତୀୟ ସ୍ପିନରଙ୍କ ବିପକ୍ଷରେ ଅଷ୍ଟ୍ରେଲୀୟଙ୍କ ଟ୍ରାକ୍ ରେକର୍ଡ ଖରାପ। ଏହାକୁ ଦୃଷ୍ଟିରେ ରଖି ଭାରତ ଉଭୟ ଅଶ୍ୱିନ୍-ଜାଡେଜାଙ୍କୁ ଖେଳାଇବା ଉଚିତ୍ ବୋଲି ଇଂଲଣ୍ଡ ପକ୍ଷରୁ ୫୦ ଟେଷ୍ଟ ଖେଳିଥିବା ପାନେଶର କହିଛନ୍ତି। ସାଉଥାମ୍ପଟନରେ ଖେଳା ଯାଇଥିବା ଫାଇନାଲରେ ଭାରତ ଦୁଇ ଜଣ ସ୍ପିନର ଖେଳାଇଥିବା ବେଳେ ଏହା ବୁମେରାଙ୍ଗ ସାବ୍ୟସ୍ତ ହୋଇଥିଲା। ତେବେ ଓଭାଲରେ ଏହାର ଫାଇଦା ମିଳି ପାରିବ ବୋଲି କହିଛନ୍ତି ପାନେସର। ଏହା ସହିତ ତୃତୀୟ ପେସ୍ ବୋଲର ଭାବେ ସେ ଉମେଶ ଯାଦବଙ୍କୁ ପସନ୍ଦ କରିଛନ୍ତି। ଉମେଶଙ୍କ ନିକଟରେ ଗତି ରହିଥିବା ବେଳେ ସେ ବଲ୍କୁ ସୁଇଙ୍ଗ କରିବାରେ ମାହିର। ଏହା ସହିତ ଓଭାଲରେ ବଲ୍ ରିଭର୍ସ ସୁଇଙ୍ଗ ହେବାର ସମ୍ଭାବନା ଥିବାରୁ ଭାରତୀୟ ବୋଲର ଫାଇଦାରେ ରହିବେ।
ଭାରତୀୟ ଟପ୍ ଅର୍ଡର ବ୍ୟାଟର ଚେତେଶ୍ୱର ପୂଜାରା ଦଳ ପାଇଁ ଏକ୍ସ ଫ୍ୟାକ୍ଟର ସାବ୍ୟସ୍ତ ହେବେ ବୋଲି ପାନେସର ପୂର୍ବାନୂମାନ କରିଛନ୍ତି। ନିୟମିତ ଭାବରେ କାଉଣ୍ଟି କ୍ରିକେଟ ଖେଳୁଥିବା ପୂଜାରା ଇଂଲିଶ ପରିବେଶ ସହିତ ଅଭ୍ୟସ୍ତ। ଏହା ସହିତ ସସେକ୍ସ ଅଧିନାୟକ ଭାବରେ ବିଗତ ଦୁଇ ସିଜନ ଧରି ସେ ରନ୍ର ପାହାଡ ଛିଡା କରିଛନ୍ତି। ସେ ଅଷ୍ଟ୍ରେଲିଆ ବୋଲରଙ୍କ ସୁଇଂକୁ ସହଜରେ ଖେଳି ପାରିବେ। ଏହା ସହିତ ଉଇକେଟ କିପର ଭାବରେ ଇଶାନ କିଶନ ତାଙ୍କର ପ୍ରଥମ ପସନ୍ଦ ବୋଲି ପାନେସର କହିଛନ୍ତି।
ଅଷ୍ଟ୍ରେଲିଆ ପାଇଁ ମିଚେଲ୍ ଷ୍ଟାର୍କ ଏକ୍ସ ଫ୍ୟାକ୍ଟର ସାବ୍ୟସ୍ତ ହୋଇ ପାରନ୍ତି। ବାମହାତୀ ଷ୍ଟାର୍କଙ୍କ ସମ୍ମୁଖରେ ଭାରତୀୟ ବ୍ୟାଟରଙ୍କୁ ସତର୍କତାର ସହିତ ଖେଳିବାକୁ ପଡିବ ବୋଲି କହିଛନ୍ତି ପାନେସର। ଷ୍ଟାର୍କଙ୍କ ଗତି ଓ ଲେଟ୍ ମୁଭମେଣ୍ଟ ଭାରତୀୟ ଖେଳାଳିଙ୍କୁ ଅଡୁଆରେ ପକାଇପାରେ।
