କଟକ ଅଫିସ/ନୂଆଦିଲ୍ଲୀ,୧୩ା୮: ମହାନଦୀ ଶଯ୍ୟାରେ ବେଆଇନଭାବେ ନିର୍ମାଣ ହୋଇଥିବା ପଞ୍ଚମୁଖୀ ହନୁମାନ ମନ୍ଦିର ଉଚ୍ଛେଦ ପ୍ରସଙ୍ଗରେ ରାଜ୍ୟ ସରକାରଙ୍କ ବିଫଳତାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ନ୍ୟାଶନାଲ ଗ୍ରୀନ ଟ୍ରିବ୍ୟୁନାଲ(ଏନ୍ଜିଟି)। ଏଥିସହିତ ପଞ୍ଚମୁଖୀ ମନ୍ଦିର ଉଚ୍ଛେଦ ନେଇ କ’ଣ ସବୁ ପଦକ୍ଷେପ ନିଆଯାଇଛି, ସେନେଇ ଏକ ରିପୋର୍ଟ ଆସନ୍ତା ୨ସପ୍ତାହ ମଧ୍ୟରେ ଦାଖଲ କରିବାକୁ ଏନ୍ଜିଟି ବୁଧବାର କଟକ ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର ୩ରେ ହେବ। ମାମଲାର ଶୁଣାଣି ସମୟରେ ରାଜ୍ୟ ସରକାର ଯେଉଁ ଯୁକ୍ତି ବାଢ଼ିଥିଲେ, ତାହା ସମ୍ପୂର୍ଣ୍ଣ ପ୍ରଶାସନିକ ବିଫଳତା। ବେଆଇନ ମନ୍ଦିର ଉଚ୍ଛେଦ ସମୟରେ ଲୋକଙ୍କ ବିରୋଧ ଯୋଗୁ ଉଚ୍ଛେଦ କାର୍ଯ୍ୟ ହୋଇ ନ ପାରିବା କହିବା ଅଯୌକ୍ତିକ। ଆଇନ୍ ଶୃଙ୍ଖଳା ସ୍ଥିତିକୁ ନିୟନ୍ତ୍ରଣ କରି କିପରି ମନ୍ଦିର ଉଚ୍ଛେଦ କରାଯିବ ତାହା ଜିଲା ପ୍ରଶାସନର କାର୍ଯ୍ୟ। ଲୋକଙ୍କ ପ୍ରତିବାଦକୁ କାରଣ ଦର୍ଶାଇ ଜିଲାପାଳ ଏଥିରୁ ଓହରିବା ଠିକ୍ ନୁହେଁ ବୋଲି ଏନ୍ଜିଟି କହିଛନ୍ତି। ମଙ୍ଗଳବାର ସୁପ୍ରିମ୍କୋର୍ଟ ମଧ୍ୟ ପଞ୍ଚମୁଖୀ ହନୁମାନ ମନ୍ଦିର ଉଚ୍ଛେଦ ସମ୍ପର୍କରେ ଟ୍ରିବ୍ୟୁନାଲ ପୂର୍ବରୁ ଦେଇଥିବା ରାୟକୁ କାଏମ ରଖିବା ସହ ମନ୍ଦିର ଟ୍ରଷ୍ଟ ପକ୍ଷରୁ ହୋଇଥିବା ଆବେଦନକୁ ଖାରଜ କରିଛନ୍ତି। ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ ଏବଂ ଏମ୍.ଆର୍ ଶାହା ଉକ୍ତ ଆବେଦନର ଶୁଣାଣି କରି ମନ୍ଦିର ଉଚ୍ଛେଦ ସମ୍ପର୍କରେ ଏନ୍ଜିଟି ଦେଇଥିବା ନିର୍ଦ୍ଦେଶକୁ ଯଥାର୍ଥ ବୋଲି ଦର୍ଶାଇଥିଲେ।
ସୂଚନାଯୋଗ୍ୟ କଟକ ଜିଲାରେ ମହାନଦୀପଠାକୁ ଜବର ଦଖଲ କରାଯାଇ ବିଭିନ୍ନ ଧାର୍ମିକ ଅନୁଷ୍ଠାନ, ମାର୍କେଟ କମ୍ପ୍ଲେକ୍ସ, ପାଇଖାନା, କଲ୍ୟାଣମଣ୍ଡପ ଓ ଘର ନିର୍ମାଣ କରାଯାଉଛି। ଏଥିଯୋଗୁ ପରିବେଶ ଦୂଷିତ ହେବା ସହିତ ନଦୀଶଯ୍ୟା ସଙ୍କୁଚିତ ହେଉଛି। ଏନେଇ ଦିଲୀପ କୁମାର ସାମନ୍ତରାୟ ଏନ୍ଜିଟିଙ୍କ ଦ୍ୱାରସ୍ଥ ହେଇଥିଲେ। ୨୦୨୦ ଡିସେମ୍ବରରେ ଏନ୍ଜିଟି ମହାନଦୀ ଶଯ୍ୟାରେ କୋଣସି ନିର୍ମାଣକୁ ଅନୁମତି ଦିଆଯିବାକୁ ରୋକ୍ ଲଗାଇବା ସହ ସେଠାରେ ବେଆଇନଭାବେ ନିର୍ମାଣକୁ ଉଚ୍ଛେଦ ପାଇଁ ରାଜ୍ୟ ସରକାର ଏବଂ ଜିଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ। ଏନ୍ଜିଟିଙ୍କ ନିର୍ଦ୍ଦେଶ ଅନୁସାରେ ଜଳ ସମ୍ପଦ ବିଭାଗର ଇଞ୍ଜିନିୟର ଇନ୍ ଚିଫ୍, ଫ୍ଲଡ୍ କଣ୍ଟ୍ରୋଲ ଆଣ୍ଡ ବେସିନ୍ ମ୍ୟାନେଜର, ଲୋୟର ମହାନଦୀ ବେସିନ୍ ଚିଫ୍ ଇଞ୍ଜିନିୟର, କଟକ ଜିଲାପାଳ ଓ କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ ପ୍ରତିନିଧିଙ୍କୁ ନେଇ ଏକ କମିଟି ଗଠନ ହୋଇଥିଲା। ନଦୀ ଶଯ୍ୟାରେ ଜବର ଦଖଲ ଓ ନିର୍ମାଣ ଦ୍ୱାରା ବନ୍ୟାଜଳ ପ୍ରବାହିତ ହେବା ଆଶଙ୍କା ରହିଛି। ନଦୀ ଜଳ ପ୍ରବାହର ଗତିପଥ ପରିବର୍ତ୍ତନ ହେବା ସହିତ ଭବିଷ୍ୟତରେ ଆଖପାଖ ଗ୍ରାମ ଓ ଅଞ୍ଚଳରେ ବନ୍ୟାଜଳ ପ୍ରବେଶର ସମ୍ଭାବନା ରହିଥିବା ଉକ୍ତ କମିଟି ରିପୋର୍ଟରେ ଉଲ୍ଲେଖ କରିଥିଲା। ଉକ୍ତ ରିପୋର୍ଟ ଆଧାରରେ ମନ୍ଦିର ଉଚ୍ଛେଦ ପାଇଁ ଦିନ ଧାର୍ଯ୍ୟ ହୋଇଥିଲା। ମାତ୍ର ଶତାଧିକ ଲୋକଙ୍କ ବିରୋଧ ଯୋଗୁ ଉଚ୍ଛେଦ କାର୍ଯ୍ୟ ସ୍ଥଗିତ ରହିଥିଲା।
