ଇସଲାମାବାଦ,୨୭।୩ : ଜି -୨୦ ଉପରେ ଅଧ୍ୟକ୍ଷତା କରୁଥିବା ଭାରତ ଆସନ୍ତା ମାସରେ ଜମ୍ମୁ-କଶ୍ମୀରରେ ସଂସ୍କୃତି ଉପରେ ଜି-୨୦ ବୈଠକ ଆୟୋଜନ କରିବ। ତେବେ ଭାରତ ପାଇଁ ବୈଠକ ଆୟୋଜନ ଟିକେ କଷ୍ଟସାଧ୍ୟ ହୋଇପାରେ। କାରଣ ପାକିସ୍ତାନ ପୂର୍ବରୁ ଭାରତ ସରକାରଙ୍କ ଏହି ପଦକ୍ଷେପକୁ ବିରୋଧ କରୁଛି । ବର୍ତ୍ତମାନ ପାକିସ୍ତାନ କଶ୍ମୀର ପ୍ରସଙ୍ଗରେ ଚାଇନ, ତୁର୍କୀ ଏବଂ ସୌଦି ଆରବର ସହାୟତା ଲୋଡିଛି।
ଯାହାଦ୍ୱାରା ଜମ୍ମୁ- କଶ୍ମୀରରେ ଅନୁଷ୍ଠିତ ହେବାକୁ ଥିବା ଜି -୨୦ ବୈଠକ ବାତିଲ ହୋଇପାରିବ। ମିଳିତ ଜାତିସଂଘରେ ଥିବା ଭାରତର ରାଷ୍ଟ୍ରଦୂତ ରୁଚିରା କାମ୍ବୋଜ ସୂଚନା ଦେଇଥିଲେ ଦେଶର ସମସ୍ତ ୨୮ ଟି ରାଜ୍ୟ ତଥା ୭ ଟି କେନ୍ଦ୍ର ଶାସିତ ଅଞ୍ଚଳରେ ଭାରତ ଜି -୨୦ ବୈଠକ କରିବ।
ପାକିସ୍ତାନ ଚିନ୍ତା କରୁଛି ଯଦି ଜମ୍ମୁ-କଶ୍ମୀରରେ ଜି-୨୦ ଶିଖର ସମ୍ମିଳନୀ ଆୟୋଜିତ ହୁଏ, ତେବେ ବିଶ୍ୱକୁ ଏକ ବାର୍ତ୍ତା ଆସିବ ଯେ କଶ୍ମୀର ଉପରେ ଭାରତର ସ୍ଥିତି ଅନ୍ତର୍ଜାତୀୟ ସ୍ତରରେ ଗ୍ରହଣୀୟ ଏବଂ ଏଠାରେ ସବୁକିଛି ସ୍ବାଭାବିକ ରହିଛି ।
ଏନେଇ ପାକିସ୍ତାନୀ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅସୀମ ଇଫିତହାର କହିଥିଲେ ଯେ ଗତ ସାତ ଦଶନ୍ଧି ଧରି ମିଳିତ ଜାତିସଂଘ ସୁରକ୍ଷା ପରିଷଦରେ ଏହା ଏକ ଅସମ୍ପୂର୍ଣ୍ଣ ଏଜେଣ୍ଡା। ଜମ୍ମୁ-କଶ୍ମୀର ବିବାଦୀୟ ଅଞ୍ଚଳ ହୋଇଥିବାବେଳେ ଅନ୍ତର୍ଜାତୀୟ ସମୁଦାୟ ଏହି ଶିଖର ସମ୍ମିଳନୀ ପାଇଁ ପ୍ରସ୍ତୁତ ହୋଇପାରିବ ନାହିଁ।
ଏହା ବ୍ୟତୀତ ପାକିସ୍ତାନ କହିଛି ଯେ ଆମେରିକା, ବ୍ରିଟେନ ଏବଂ ଅନ୍ୟାନ୍ୟ ଜି-୨୦ ଦେଶ ସହିତ ଭାରତର ଏହି ପଦକ୍ଷେପ ବିଷୟରେ ଆଲୋଚନା କରିବ।
