ନୂଆଦିଲ୍ଲୀ,୨୪।୪: ପହଲଗାମ ଆକ୍ରମଣ ପରେ, ଇସଲାମାବାଦରୁ ଦିଲ୍ଲୀ ପର୍ଯ୍ୟନ୍ତ ପାକିସ୍ତାନ ଉପରେ ସର୍ଜିକାଲ ଷ୍ଟ୍ରାଇକ ବିଷୟରେ ଆଲୋଚନା ହେଉଥିଲା। କିନ୍ତୁ ଭାରତ ସିନ୍ଧୁ ଜଳ ଚୁକ୍ତିନାମା ଉପରେ ରୋକ୍ ଲଗାଇ ଆତଙ୍କବାଦୀଙ୍କ ପେଣ୍ଠସ୍ଥଳୀ ପାକିସ୍ତାନ ବିରୁଦ୍ଧରେ ଆହୁରି ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହାକୁ ନେଇ ପାକିସ୍ତାନର ବଡ଼ ବଡ଼ ନେତାମାନେ ପ୍ରତିକ୍ରିୟା ଦେଇଛନ୍ତି। ପ୍ରକୃତରେ, ଭାରତ ୧୯୬୦ ମସିହାର ସିନ୍ଧୁ ଜଳ ଚୁକ୍ତିନାମା ଉପରେ ରୋକ୍ ଳଗାଇବାକୁ ନିଷ୍ପତ୍ତି ନେଇଛି। ଏହି ନିଷ୍ପତ୍ତି ପାକିସ୍ତାନରେ ହଇଚଇ ସୃଷ୍ଟି କରିଛି।
ହାଇଦ୍ରାବାଦସ୍ଥିତ ସିନ୍ଧ ତାରକ୍କି ପସନ୍ଦ ପାର୍ଟିର ଅଧ୍ୟକ୍ଷ ଡକ୍ଟର କାଦିର ମାଗସି କହିଛନ୍ତି ଯେ ଏହି ନିଷ୍ପତ୍ତି ପାକିସ୍ତାନରେ ଗୃହଯୁଦ୍ଧ ଆରମ୍ଭ କରିବ। ଭାରତ ସର୍ଜିକାଲ ଷ୍ଟ୍ରାଇକ ନକରି ଏହି ନିଷ୍ପତ୍ତି ନେଇଛି, ଯାହା ପାକିସ୍ତାନକୁ ଅଧିକ କ୍ଷତି ପହଞ୍ଚାଇବ।
ମାଗସିଙ୍କ ଅନୁଯାୟୀ, ସିନ୍ଧୁ ନଦୀର ଜଳକୁ ନେଇ ପାକିସ୍ତାନର ଦୁଇଟି ବଡ଼ ପ୍ରଦେଶ, ସିନ୍ଧ ଏବଂ ପଞ୍ଜାବ, ପୂର୍ବରୁ ମୁହାଁମୁହିଁ ଅଛନ୍ତି। ଲୋକମାନେ ରାସ୍ତାରେ ଲଢ଼ୁଛନ୍ତି ଏବଂ ଏବେ ଭାରତ ଏହି ନିଷ୍ପତ୍ତି ନେଇ ପାକିସ୍ତାନରେ ଚହଳ ପଡିଛି। ଜଳ ସଙ୍କଟର ସମ୍ମୁଖୀନ ହେଉଥିବା ପାକିସ୍ତାନର ଲୋକମାନେ ଏବେ ନିଜ ଲୋକଙ୍କ ମଧ୍ୟରେ ଲଢ଼ିବେ। ପାକିସ୍ତାନର ପଞ୍ଜାବର ଜନସଂଖ୍ୟା ୧୨ କୋଟି ଏବଂ ସିନ୍ଧର ଜନସଂଖ୍ୟା ୫ କୋଟି।
ପ୍ରତିବର୍ଷ ସିନ୍ଧୁ ନଦୀ ଦେଇ ହାରାହାରି ୧୮୦ ବିଲିୟନ ଘନ ମିଟର ପାଣି ପ୍ରବାହିତ ହୁଏ, ଯାହାର ୮୦ ପ୍ରତିଶତ ପାକିସ୍ତାନ ବ୍ୟବହାର କରେ। ଭାରତ ୨୦ ପ୍ରତିଶତ ପାଣି ବ୍ୟବହାର କରେ। ଆଜିକାଲି ପାକିସ୍ତାନରେ ଜଳ ସଙ୍କଟ ଦେଖାଦେଇଛି। ପାକିସ୍ତାନ ପାଖରେ ମାତ୍ର 30 ଦିନର ପାଣି ସଂରକ୍ଷଣ ଅଛି। ପାଣି ବଣ୍ଟନକୁ ନେଇ ପଞ୍ଜାବ ଏବଂ ସିନ୍ଧ ପରସ୍ପର ବିରୁଦ୍ଧରେ ମୋର୍ଚ୍ଚା ଖୋଲି ସାରିଛନ୍ତି।
ପାକିସ୍ତାନର ୪.୭ କୋଟି ଏକର ଜମି ସିନ୍ଧୁ ନଦୀର ପାଣି ଦ୍ୱାରା ଜଳସେଚନ କରାଯାଏ। ପାକିସ୍ତାନ ମଧ୍ୟ ସିନ୍ଧୁ ନଦୀର ଜଳ ମାଧ୍ୟମରେ ବିଦ୍ୟୁତ ଉତ୍ପାଦନ କରେ। ଏପରି ପରିସ୍ଥିତିରେ, ଯଦି ସିନ୍ଧୁ ଜଳ ଉପରେ ପ୍ରତିବନ୍ଧକ ଲଗାଯାଏ, ତେବେ ପାକିସ୍ତାନରେ ଏକ ବଡ଼ ସଙ୍କଟ ସୃଷ୍ଟି ହେବ। ଋଣଗ୍ରସ୍ତ ପାକିସ୍ତାନ ପାଇଁ ଆଗକୁ ରାସ୍ତା ସହଜ ହେବ ନାହିଁ। ଏହି କାରଣରୁ ପାକିସ୍ତାନର ଶୀର୍ଷ ନେତାମାନେ ଏହାକୁ ଏକ ବଡ଼ ଝଟ୍କା ବୋଲି କହିଛନ୍ତି।
ଭାରତ ୨୦୧୬ ଏବଂ ୨୦୧୯ରେ ପାକିସ୍ତାନ ଉପରେ ସର୍ଜିକାଲ ଷ୍ଟ୍ରାଇକ କରିଛି। ୨୦୧୬ର ସର୍ଜିକାଲ ଷ୍ଟ୍ରାଇକ୍ରେ ଭାରତ ୨୪୫ ଜଣ ପାକିସ୍ତାନୀ ଆତଙ୍କବାଦୀଙ୍କୁ ନିହତ କରିଥିଲା। ୨୦୧୯ ମସିହାରେ ପୁଲୱାମା ପରେ କରାଯାଇଥିବା ସର୍ଜିକାଲ ଷ୍ଟ୍ରାଇକ୍ରେ ଭାରତୀୟ ସେନା ୩୦୦ ରୁ ଅଧିକ ଆତଙ୍କବାଦୀଙ୍କୁ ନିହତ କରିଥିଲା।
ଏଥର ମଧ୍ୟ ପହଲଗାମ ପରେ ସର୍ଜିକାଲ ଷ୍ଟ୍ରାଇକ ବିଷୟରେ ଆଲୋଚନା ହୋଇଥିଲା। ଅନ୍ୟପକ୍ଷରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ଆତଙ୍କବାଦୀମାନଙ୍କୁ ଏପରି ଦଣ୍ଡ ଦିଆଯିବ ଯେ ସେମାନେ ଏହା କଳ୍ପନା ମଧ୍ୟ କରିପାରିବେ ନାହିଁ। ପ୍ରଧାନମନ୍ତ୍ରୀ ମୋଦି ଆତଙ୍କବାଦୀଙ୍କୁ ନିପାତ କରିବା ବିଷୟରେ କହିଛନ୍ତି।
