ନୂଆଦିଲ୍ଲୀ,୨୪।୪: କାଶ୍ମୀରର ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ୨୬ରୁ ଅଧିକ ଭାରତୀୟଙ୍କ ଜୀବନ ଯିବା ପରେ ସାରା ଦେଶରେ ଆକ୍ରୋଶ ଦେଖିବାକୁ ମିଳୁଛି। ଏହି କ୍ରମରେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ବଡ଼ ବୟାନ ଦେଇଛନ୍ତି। ଭାରତ ପାକିସ୍ତାନ ସହିତ କୌଣସି ଦ୍ୱିପାକ୍ଷିକ କ୍ରିକେଟ ଖେଳିବ ନାହିଁ ବୋଲି ସେ କହିଛନ୍ତି।
ଶେଷ ଥର ପାଇଁ ଭାରତ ଏବଂ ପାକିସ୍ତାନ ୨୦୧୨-୨୦୧୩ରେ ଏକ ଦ୍ୱିପାକ୍ଷିକ ସିରିଜ ଖେଳିଥିଲେ, ଯେତେବେଳେ ପାକିସ୍ତାନ ଏକ ସୀମିତ ଓଭର ସିରିଜ ଖେଳିବା ପାଇଁ ଭାରତ ଗସ୍ତରେ ଆସିଥିଲା। ଭାରତ ଶେଷ ଥର ପାଇଁ ୨୦୦୮ ମସିହାରେ ପାକିସ୍ତାନ ଗସ୍ତ କରିଥିଲା, ଯେତେବେଳେ ସେମାନେ ଏସିଆ କପ୍ ଖେଳିଥିଲେ। ହେଲେ ଏବେ ଶୁକ୍ଲା ସ୍ପଷ୍ଟ କରିଛନ୍ତ ଯେ ଆମେ ଆଗକୁ ପାକିସ୍ତାନ ସହିତ ଦ୍ୱିପାକ୍ଷିକ ମ୍ୟାଚ ଖେଳିବୁ ନାହିଁ।
ସେ ସ୍ପୋର୍ଟସ ଟକ୍କୁ କହିଛନ୍ତି, ‘ଆମେ ପୀଡିତଙ୍କ ସହିତ ଅଛୁ ଏବଂ ଏହାକୁ ନିନ୍ଦା କରୁଛୁ। ଆମ ସରକାର ଯାହା କହିବ, ଆମେ ତାହା କରିବୁ। ସରକାରଙ୍କ ମନୋଭାବ ଯୋଗୁ ଆମେ ପାକିସ୍ତାନ ସହିତ ଦ୍ୱିପାକ୍ଷିକ ସିରିଜ ଖେଳୁନାହୁଁ ଏବଂ ଭବିଷ୍ୟତରେ ମଧ୍ୟ ଆମେ ପାକିସ୍ତାନ ସହିତ ଦ୍ୱିପାକ୍ଷିକ ସିରିଜ ଖେଳିବୁ ନାହିଁ। କିନ୍ତୁ ଯେତେବେଳେ ICC ଇଭେଣ୍ଟଗୁଡ଼ିକର କଥା ଆସେ, ଆମେ ICCର ସମ୍ପୃକ୍ତି ଯୋଗୁ ଖେଳୁ। ICC ମଧ୍ୟ ଜାଣେ ଯେ ଯାହା ଘଟୁଛି, ସେମାନେ ଏହାର ମୁକାବିଲା କରିବେ।”
ବିସିସିଆଇ ସଚିବ ଦେବଜିତ ସାଇକିଆ ମଧ୍ୟ ନିରୀହ ପର୍ଯ୍ୟଟକଙ୍କ ଉପରେ ହୋଇଥିବା ଏହି ଭୟଙ୍କର ଆକ୍ରମଣ ପାଇଁ ଶୋକ ପ୍ରକାଶ କରିଛନ୍ତି। ସେ କହିଛନ୍ତି, “ଗତକାଲି ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ନିର୍ଦ୍ଦୋଷମାନେ ଜୀବନ ହରାଇବା ଘଟଣାରେ କ୍ରିକେଟ ସମ୍ପ୍ରଦାୟ ଗଭୀର ଭାବରେ ମର୍ମାହତ ଏବଂ ଦୁଃଖିତ। ବିସିସିଆଇ ପକ୍ଷରୁ, ଏହି ଭୟଙ୍କର ଏବଂ କାପୁରୁଷତାପୂର୍ଣ୍ଣ କାର୍ଯ୍ୟକୁ ଦୃଢ଼ ନିନ୍ଦା କରିବା ସହିତ, ମୁଁ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ମୋର ସମବେଦନା ଜଣାଉଛି ଏବଂ ଦିବଙ୍ଗତ ଆତ୍ମାଙ୍କ ପାଇଁ ପ୍ରାର୍ଥନା କରୁଛି। ସେମାନଙ୍କ ଯନ୍ତ୍ରଣା ଏବଂ ଦୁଃଖକୁ ବାଣ୍ଟି ଏହି ଦୁଃଖଦ ସମୟରେ ଆମେ ସେମାନଙ୍କ ସହିତ ଠିଆ ହୋଇଛୁ।”
