ଇସ୍ଲାମାବାଦ,୧୭।୬: ପାକିସ୍ତାନକୁ ଏକ ବଡ଼ ଆଶ୍ୱସ୍ତି ମିଳିଛି। ଏଫ୍ଏଟିଏଫ୍ ଗ୍ରେ’ ତାଲିକାରୁ ବର୍ତ୍ତମାନ ପାକିସ୍ତାନର ନାମକୁ ହଟାଇ ଦିଆଯାଇଛି। ଶୁକ୍ରବାର ଜର୍ମାନୀର ବର୍ଲିନରେ ଚାଲିଥିବା ଏକ ବୈଠକରେ ପାକିସ୍ତାନକୁ ଗ୍ରେ’ ତାଲିକାରୁ ହଟାଇବା ପାଇଁ ନିଷ୍ପତ୍ତି ନିଆଯାଇଛି। ଶୁକ୍ରବାର ବୈଠକର ଶେଷ ଦିନ ହୋଇଥିବା ବେଳେ ପ୍ରଥମରୁ ହିଁ ପାକିସ୍ତାନକୁ ଆଶ୍ୱସ୍ତି ମିଳିବ ବୋଲି ଆଶା କରାଯାଉଥିଲା। ତେବେ ଏହା ସମ୍ବନ୍ଧୀୟ ସମସ୍ତ ସୂଚନା ବର୍ତ୍ତମାନ ଫାଇନାନ୍ସିଆଲ ଆକ୍ସନ ଟାସ୍କ ଫୋର୍ସ(ଏଫ୍ଏଟିଏଫ୍)ର ୱେବସାଇଟରେ ଅପଡେଟ୍ କରାଯିବ। ଅକ୍ଟୋବରରେ ହେବାକୁ ଥିବା ଏକ ବୈଠକରେ ପାକିସ୍ତାନକୁ ଗ୍ରେ’ ତାଲିକାରୁ ହଟାଇବା ନେଇ ସରକାରୀ ଘୋଷଣା କରାଯିବ ବୋଲି ସୂଚନା ରହିଛି। ଏଫ୍ଏଟିଏଫ୍ ହେଉଛି ଏକ ସଂସ୍ଥା ଯାହା ଅନ୍ତର୍ଜାତୀୟ ସ୍ତରରେ କାମ କରେ। ଆତଙ୍କବାଦକୁ ବଢ଼ାଇବା ପାଇଁ କରାଯାଉଥିବା ଅନ୍ତର୍ଜାତୀୟ ଆର୍ଥିକ ଅପରାଧକୁ ରୋକିବା ପାଇଁ ଏହା ଚେଷ୍ଟା କରିଥାଏ। ସୂଚନା ମୁତାବକ, ମାର୍ଚ୍ଚ ୨୦୨୨ ସୁଦ୍ଧା ମୋଟ ୨୩ଟି ଦେଶ ଏହି ଗ୍ରେ’ ତାଲିକାରେ ରହିଥିଲେ। ଏଥିରେ ପାକିସ୍ତାନ, ସିରିଆ, ତୁର୍କୀ, ମିଆଁମାର, ଫିଲିପାଇନ୍ସ, ଦକ୍ଷିଣ ସୁଡାନ, ଉଗାଣ୍ଡା ଏବଂ ୟେମେନ ମଧ୍ୟ ସାମିଲ ରହିଛି।
