ଇସଲାମାବାଦ,୧୦ ।୩: ପାକିସ୍ତାନ ମୁସଲିମ ଲିଗ(ଏନ)ର ନେତା ମରିୟମ ନୱାଜ ଗୁରୁବାର ତାଙ୍କର ଏକ ରାଲିରେ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ଉପରେ ଖୁବ ବର୍ଷିଛନ୍ତି । ମରିୟମ ନୱାଜ ତାଙ୍କର ଏକ ସମ୍ବୋଧନରେ ଇମ୍ରାନ ଖାଁଙ୍କ ଉପରେ ‘ନାନୀ’ ଟିପ୍ପଣିକୁ ନେଇ ଖୁବ ବର୍ଷିଛନ୍ତି । ମରିୟମ ଇମ୍ରାନଙ୍କ ନାଁ ନ ନେଇ କହିଛନ୍ତି, ମୋତେ ନାନୀ ବୋଲି ସମ୍ବୋଧନ କରୁଥିବା ବ୍ୟକ୍ତି ମୋ ପିତା ନୱାଜ ଶରିଫଙ୍କ ବୟସର । ଯଦି ସେ ଠିକ୍ ନିଷ୍ପତ୍ତି ନେଇଥାଆନ୍ତେ ତେବେ ଆଜି ଦାଦା ହୋଇସାରିଥାଆନ୍ତେ ।
ସୂଚନାଯୋଗ୍ୟ, କିଛିଦିନ ପୂର୍ବରୁ ଇମ୍ରାନ ଖାଁ ତାଙ୍କର ଏକ ରାଲିରେ ମରିୟମ ନୱାଜଙ୍କୁ ‘ନାନୀ’ ବୋଲି କହିଥିଲେ । ଜିଲା ଯୁବ ସମନ୍ୱୟକଙ୍କ ଏକ ସଭାରେ ମରିୟମ ନୱାଜ ଇମ୍ରାନ ଖାଁଙ୍କ ଉପରେ ଦେଶର ଆର୍ଥିକ ସଙ୍କଟ ପାଇଁ ସେ ଦାୟୀ ବୋଲି ଅଭିଯୋଗ କରିଛନ୍ତି । କୋର୍ଟରେ ଇମ୍ରାନ ହାଜର ନ ହେବାକୁ ନେଇ ବି ମରିୟମ ତାଙ୍କୁ ସମାଲୋଚନା କରିଛନ୍ତି । ମରିୟମ କହିଛନ୍ତି, ଯେତେବେଳେ ଇମ୍ରାନଙ୍କୁ କୋର୍ଟରୁ ଡାକରା ଆସିଲା, ସେତେବେଳେ ସେ କହିଲେ ମୋ ଜୀବନ ପ୍ରତି ବିପଦ ରହିଛି ।
ସେହିପରି ଇମ୍ରାନ ପ୍ରଧାନମନ୍ତ୍ରୀ ଥିବା ସମୟରେ ତାଙ୍କୁ ମିଳିଥିବା ଉପହାର ଗୁଡିକୁ ବିକ୍ରି କରିବାକୁ ନେଇ ବି ମରିୟମ ତାଙ୍କୁ ସମାଲୋଚନା କରିଛନ୍ତି । ସେ କହିଛନ୍ତି ମୋ ପିତା ନୱାଜ ଶରିଫଙ୍କ ଶାସନ କାଳରେ ଦେଶର ଅର୍ଥନୀତି ୬ ପ୍ରତିଶତ ହାରରେ ବୃଦ୍ଧି ହୋଇଥିଲା । ଆଉ ଇମ୍ରାନ ଆସିବା ପରେ ଦେଶକୁ ଆର୍ଥିକ ସଙ୍କଟ ମଧ୍ୟକୁ ଠେଲି ଦେଇଛନ୍ତି ।
