ନୂଆଦିଲ୍ଲୀ, ୨୫ା୧: ୨୦୨୬ ଟି-୨୦ ବିଶ୍ୱକପ୍ ପୂର୍ବରୁ କ୍ରିକେଟ ଜଗତରେ ଏକ ବଡ଼ ଧରଣର ବିବାଦ ଦେଖାଦେଇଛି। ବାଂଲାଦେଶକୁ ସମର୍ଥନ କରି ବିଶ୍ୱକପ୍ ବୟକଟ୍ କରିବାକୁ ଧମକ ଦେଇଥିବା ପାକିସ୍ତାନ ଶେଷ ମୁହୂର୍ତ୍ତରେ ନିଜର ଆଭିମୁଖ୍ୟ ବଦଳାଇ ଦଳ ଘୋଷଣା କରିଛି। ଏହାକୁ ନେଇ ସୋସିଆଲ ମିଡିଆ ଓ କ୍ରିକେଟ ପ୍ରେମୀଙ୍କ ମଧ୍ୟରେ ଚର୍ଚ୍ଚା ହେଉଛି ଯେ ପାକିସ୍ତାନ ନିଜ ବନ୍ଧୁ ରାଷ୍ଟ୍ର ବାଂଲାଦେଶକୁ ‘ଧୋକା’ ଦେଇଛି।
ଭାରତରେ ଖେଳାଯିବାକୁ ଥିବା ମ୍ୟାଚ୍ଗୁଡ଼ିକୁ ସୁରକ୍ଷା କାରଣ ଦର୍ଶାଇ ବାଂଲାଦେଶ ଖେଳିବାକୁ ମନା କରିଥିଲା। ପରେ ଆଇସିସି ସେମାନଙ୍କୁ ବିଶ୍ୱକପ୍ରୁ ବାଦ୍ ଦେଇ ସ୍କଟଲ୍ୟାଣ୍ଡକୁ ସାମିଲ କରିଛି। ଏହାକୁ ବିରୋଧ କରି ପାକିସ୍ତାନ କ୍ରିକେଟ ବୋର୍ଡ (PCB) ପ୍ରଥମେ ବିଶ୍ୱକପ୍ ଖେଳିବ ନାହିଁ ବୋଲି ଧମକ ଦେଇଥିଲା। କିନ୍ତୁ ରବିବାର ହଠାତ୍ ନିଜର ୧୫ ଜଣିଆ ଦଳ ଘୋଷଣା କରି ସମସ୍ତଙ୍କୁ ଚକିତ କରିଦେଇଛି।
ବାଂଲାଦେଶ ଏବଂ ପାକିସ୍ତାନ ମିଳିତ ଭାବେ ଆଇସିସି ବିରୋଧରେ ସ୍ୱର ଉତ୍ତୋଳନ କରିଥିଲେ। ପାକିସ୍ତାନ କ୍ରିକେଟ ବୋର୍ଡ ଅଧ୍ୟକ୍ଷ ମୋହସିନ ନାକଭି ପୂର୍ବରୁ କହିଥିଲେ ଯେ ବାଂଲାଦେଶ ପ୍ରତି ଅନ୍ୟାୟ ହୋଇଛି ଏବଂ ସେମାନେ ନ ଖେଳିଲେ ପାକିସ୍ତାନ ମଧ୍ୟ ବିଚାର କରିବ। କିନ୍ତୁ ଆଇସିସି ପକ୍ଷରୁ କଠୋର କଟକଣା ଓ ଆର୍ଥିକ କ୍ଷତିର ଚେତାବନୀ ମିଳିବା ପରେ ପାକିସ୍ତାନ ନିଜର ଦଳ ଘୋଷଣା କରିଛି, ଯାହାକି ବାଂଲାଦେଶକୁ ଏକାକୀ କରିଦେଇଛି।
ପାକିସ୍ତାନର ୧୫ ଜଣିଆ ସ୍କ୍ୱାଡ୍: ସଲମାନ୍ ଅଲି ଆଘା (ଅଧିନାୟକ), ଆବ୍ରାର ଅହମ୍ମଦ, ବାବର ଆଜମ, ଫହିମ୍ ଅସରଫ୍, ଫକର ଜମାନ, ଖ୍ୱାଜା ମହମ୍ମଦ ନାଫେ, ମହମ୍ମଦ ନୱାଜ, ମହମ୍ମଦ ସଲମାନ ମିର୍ଜା, ନସିମ୍ ଶାହ, ସାହିବଜାଦା ଫରହାନ, ସଇମ୍ ଆୟୁବ, ଶାହୀନ ଶାହ ଆଫ୍ରିଦି, ଶାଦାବ ଖାନ୍, ଉସମାନ ଖାନ୍ ଏବଂ ଉସମାନ ତାରିକ।
ଭାରତ ଓ ପାକିସ୍ତାନ ମଧ୍ୟରେ ହାଇଭୋଲଟେଜ୍ ମ୍ୟାଚ୍ ଫେବୃଆରୀ ୧୫ ତାରିଖରେ କଲମ୍ବୋରେ ଖେଳାଯିବ।
