ଜଳେଶ୍ୱର, ୧୧।୫(ଡି.ଏନ.ଏ.) – ଗତ କିଛିବର୍ଷ ଧରି ରବି ଓ ଖରିଫ ଧାନ ଅମଳ ସମୟରେ ସରକାରୀ ମଣ୍ଡି ଖୋଲୁ ନ ଥିବାରୁ ଚାଷୀମାନେ ଅଭାବୀ ବିକ୍ରିର ସମ୍ମୁଖୀନ ହେଉଛନ୍ତି। ପଶ୍ଚିମବଙ୍ଗର ଦଲାଲମାନେ କୁଇଣ୍ଟାଲ ପ୍ରତି ପ୍ରାୟ ୭ଶହ ଟଙ୍କାରୁ କମ୍ ଦେଉଥିଲେ ମଧ୍ୟ ଚାଷୀମାନେ ବାଧ୍ୟ ହୋଇ ବିକ୍ରି କରି ଦେଉଛନ୍ତି। ଖର୍ଚ୍ଚ ଭରଣା ଲାଗି ଧାନବିକ୍ରି ଚାଷୀର ଏକମାତ୍ର ବିକଳ୍ପ ହୋଇଥିବାରୁ ଏଭଳି ପରିସ୍ଥିତି ଉପୁଜୁଛି।
ଗତ ଖରିଫ ଋତୁରେ ଅଧିକ ବର୍ଷା, ପଶ୍ଚିମବଙ୍ଗର ଉଦ୍ବୃତ୍ତ ବର୍ଷାପାଣି ଓ ସୁବର୍ଣ୍ଣରେଖା ନଦୀର ବାରମ୍ବାର ବନ୍ୟା ଯୋଗୁ ଧାନଚାଷ ବ୍ୟାହତ ହୋଇଥିଲା। ରବି ଧାନଚାଷକୁ ନଜରରେ ରଖି ଜଳେଶ୍ୱର, ଭୋଗରାଇ, ବାଲିଆପାଳ ଚାଷୀମାନେ ଅଣ୍ଟା ଭିଡ଼ିଥିଲେ ା ବାଲେଶ୍ୱର ଜିଲାରେ ୨୪, ୫୦୦ ହେକ୍ଟର ଜମିରେ ଚଳିତବର୍ଷ ରବିଧାନ ଚାଷ ହେବା ଲାଗି ଜିଲା ଆକଳନ କମିଟି ସ୍ଥିର କରିଥିଲା। ବାସ୍ତବରେ ଏହାଠାରୁ ବହୁ ଅଧିକ ରହିଛି। ସରକାରୀ ତଥ୍ୟ ଅନୁଯାୟୀ ଚଳିତବର୍ଷ ଜଳେଶ୍ୱରରେ ୬୫୦୦ ହେକ୍ଟର, ଭୋଗରାଇରେ ୧୦ହଜାର ହେକ୍ଟର ଓ ବାଲିଆପାଳରେ ୨୦୦୦ ହେକ୍ଟର ଧାନଚାଷ ହେବା ଲାଗି ଜିଲା କମିଟି ଆକଳନ କରିଥିଲା ା ଏହାଠାରୁ ଅଧିକ ଜମିରେ ଧାନଚାଷ ହୋଇଛି। ଏବେ ଧାନ ଅମଳ ସମୟ ା ବାତ୍ୟା ‘ଅସାନି’ର ଭୟରେ ଗତ ୭ଦିନ ଧରି ଧାନ ଅମଳ ଜୋରସୋର୍ରେ ଚାଲିଛି ା ସରକାରୀ ମଣ୍ଡିଗୁଡ଼ିକ ଆସନ୍ତା ୨୦ତାରିଖରୁ ଖୋଲିବ ବୋଲି ପ୍ୟାକ୍ସ ସୂତ୍ରରୁ ଜଣାପଡିଛି। ସରକାରୀ ମଣ୍ଡିରେ ଧାନ କୁଇଣ୍ଟାଲ ପ୍ରତି ୧୮୬୫ଟଙ୍କାରେ କିଣିବାକୁ ଥିବା ବେଳେ ଏବେ ପଶ୍ଚିମବଙ୍ଗର ଧାନ ବ୍ୟବସାୟୀଙ୍କ ଦଲାଲମାନେ ୧୧୦୦ ଟଙ୍କାରେ କିଣୁଛନ୍ତି। ଫଳରେ ଚାଷୀମାନେ କୁଇଣ୍ଟାଲ ପ୍ରତି ୭୬୫ଟଙ୍କା କ୍ଷତି ସହିବାକୁ ବାଧ୍ୟ ହେଉଛନ୍ତି ା ଏବେ ଧାନ କଟା, ବୁହା, ଅମଳ ସହିତ ବିଗତ ଦିନରେ ସାର, କୀଟନାଶକ, ଅଣୁସାର ଏବଂ ମଜୁରି ଲାଗି ଚାଷୀମାନେ ଧାରକରଜ କରି ଧାନ ରୁଆପୋତା କରିଥିଲେ। ତେଣୁ ଚାଷୀଙ୍କୁ ଧାନ ବିକ୍ରି କରିବା ହିଁ ଏକମାତ୍ର ବିକଳ୍ପ ା ଜଳେଶ୍ୱର ବ୍ଲକରେ ୧୯, ଭୋଗରାଇ ବ୍ଲକରେ ୧୯ ଓ ବାଲିଆପାଳରେ ୧୬ଟି ପ୍ୟାକ୍ସ ଦ୍ୱାରା ଧାନ କ୍ରୟ ଆରମ୍ଭ ହୋଇ ନ ଥିବାରୁ ଚାଷୀ ଅଭାବୀ ବିକ୍ରିର ସମ୍ମୁଖୀନ ହେଉଛନ୍ତି ା ଅନ୍ୟପକ୍ଷରେ ବାତ୍ୟା ଆସିବାକୁ ଥିବାରୁ ଚାଷୀମାନେ ଆଗୁଆ ଧାନ ଅମଳ କରିବାକୁ ବାଧ୍ୟ ହେଉଛନ୍ତି। ଫଳରେ ଧାନକଟା ମେଶିନ୍, ବୋହିବା ଲାଗି ଟ୍ରାକ୍ଟର ଖର୍ଚ୍ଚ ଅଧିକ କରିବାକୁ ପଡୁଛି ା ଅନ୍ୟପକ୍ଷରେ ପଶ୍ଚିମବଙ୍ଗ ବ୍ୟବସାୟୀଙ୍କ ଦଲାଲମାନେ ବିଭିନ୍ନ ସ୍ଥାନରେ ପସରା ମେଲାଇ ଧାନ କ୍ରୟ କରିବାରେ ବ୍ୟସ୍ତ। ପ୍ରତିଦିନ ଏହି ୩ଟି ବ୍ଲକରୁ ପ୍ରାୟ ୩୦୦ ଟ୍ରକ୍ ଧାନ ପଶ୍ଚିମବଙ୍ଗକୁ ଚାଲାଣ ହେଉଛ। ଧାନକ୍ରୟ ଲାଗି ଯୋଗାଣ ବିଭାଗ ଓ ସମବାୟ ବିଭାଗର ସହମତିରେ କ୍ରୟ ହେଉଥିବାରୁ ଅତିଶୀଘ୍ର ଧାନ ସରକାରୀ ମଣ୍ଡିରେ କିଣିବାକୁ ବହୁ ଚାଷୀ, ଚାଷୀ ପ୍ରତିନିଧି, କୃଷକ କ୍ଲବ, କୃଷକ ସଭା ଓ ବରିଷ୍ଠ ଚାଷୀମାନେ ଦାବି ଜଣାଇଛନ୍ତି ା
