ନିରାକାରପୁର,୧୮ା୨(ଡି.ଏନ୍.ଏ.): ଖୋର୍ଦ୍ଧା ଜିଲାରେ ଧାନକିଣାରେ ଅବ୍ୟବସ୍ଥା ଲାଗି ରହିଛି। ଚାଷୀ ଖରା, ଶୀତ କାକରରେ ମଣ୍ଡିରେ ଧାନ ଧରି ବସିରହିଛି, କିନ୍ତୁ ଧାନ କିଣାଯାଉନାହିଁ। ବିଭିନ୍ନ ଆଳ ଦେଖାଇ ମିଲର୍ସ ଧାନ ଉଠାଉ ନାହାନ୍ତି। ଟୋକନ ଅବଧି ଶେଷ ହେବାକୁ ବସିଥିବା ବେଳେ ଧାନ ବିକ୍ରି ନେଇ ଚାଷୀଙ୍କୁ ଚିନ୍ତା ଘାରିଛି। ଏଭଳି ଦୃଶ୍ୟ ଗୋଳବାଇ ସେବା ସମବାୟ ସମିତିରେ ଦେଖିବାକୁ ମିଳଛି। ଅନ୍ୟପକ୍ଷରେ ଟାର୍ଗେଟ୍ ଆସୁ ନ ଥିବାରୁ ଧାନ କିଣାଯାଉନି ବୋଲି ସମିତି ସମ୍ପାଦକ ପରମାନନ୍ଦ ନାୟକ କହିଛନ୍ତି।
ପ୍ରକାଶ ଯେ, ଏହି ସେବା ସମବାୟ ସମିତି ଗୋଲବାଇ, ଜଙ୍କିଆ ଓ ଗୋଡିପଡା ପଞ୍ଚାୟତକୁ ନେଇ ଗଠିତ। ଚଳିତ ବର୍ଷ ୪୦୦ଚାଷୀ ୧୩ହଜାର କୁଇଣ୍ଟାଲ ଧାନ ବିକ୍ରି କରିବା ପାଇଁ ପଞ୍ଜୀକରଣ କରିଥିଲେ। ଏଯାବତ୍ ୧୨୦ଚାଷୀଙ୍କ ଠାରୁ ୩୯୯୯ କୁଇଣ୍ଟାଲ ଧାନ ମିଲର୍ସ ନେଇଛନ୍ତି। ଫଳରେ ଅବଶିଷ୍ଟ ଧାନ ଖରା କାକରରେ, ବାରି ଓ ଘର ବାରଣ୍ଡାରେ ପଡିରହିଛି। ଏହି ଧାନ ନେବା ପାଇଁ ଛଣଗିରି ପଞ୍ଚାୟତ ରମାବିଲି ଠାରେ ଥିବା ଗଣେଶ ରାଇସ୍ ମିଲକୁ ସମବାୟ ସମିତି ପକ୍ଷରୁ ଧାନ ସଂଗ୍ରହ ନିମନ୍ତେ ଚୁକ୍ତି ହୋଇଛି। ତେବେ ଟୋକନ ଅନୁସାରେ ଧାନ ଉଠୁନଥିବା ଚାଷୀ ଅଭିଯୋଗ କରିଛନ୍ତି। ଆସନ୍ତା ୨୦ତାରିଖ ସୁଦ୍ଧା ମିଲର୍ସ ଧାନ ନ ନେଲେ ପ୍ରାୟ ୧୦୦ରୁ ଊର୍ଦ୍ଧ୍ୱ ଟୋକନ ଅବଧି ଶେଷ ହୋଇଯିବ ବୋଲି ଚାଷୀମାନେ ଅଭିଯୋଗ କରିଛନ୍ତି। ମଣ୍ଡି ଠିକ୍ରେ ଖୋଲୁ ନ ଥିବାରୁ ଆନ୍ଧ୍ରପ୍ରଦେଶ ବେପାରୀମାନେ ଗଁାରେ ପଶି କମ୍ ମୂଲ୍ୟରେ ଧାନ କିଣୁଛନ୍ତି। ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।
