ଦିଗପହଣ୍ଡି,୩।୮(ଡି.ଏନ୍.ଏ.): ଚଳିତ ବର୍ଷ ଦିଗପହଣ୍ଡି ଅଞ୍ଚଳର ଚାଷୀଙ୍କୁ ଧୋକାଦେଇଛି ମୌସୁମୀ ବର୍ଷା। ମୁଖ୍ୟତଃ ଖରିଫ ଧାନ ଚାଷ ମୌସୁମୀ ବର୍ଷା ଉପରେ ନିର୍ଭର କରାଯାଇଥାଏ। କିନ୍ତୁ ଅଗଷ୍ଟ ପ୍ରଥମ ସପ୍ତାହ ସୁଦ୍ଧା ମୌସୁମୀ ବର୍ଷା ସ୍ବାଭାବିକ ଠାରୁ ଯଥେଷ୍ଟ କମ୍ ହୋଇଛି। ଜୁଲାଇ ମାସରେ ପ୍ରାୟ ୨୨୦ ମିଲିମିଟର ବୃଷ୍ଟିପାତ ଜାଗାରେ ମାତ୍ର ୧୫୦ ମିଲିମିଟର ବର୍ଷା ହୋଇଥିବା ଦିଗପହଣ୍ଡି ଜିଲା କୃଷି କାର୍ଯ୍ୟାଳୟରୁ ସୂଚନା ମିଳିଛି। ଫଳରେ ଧାନଚାଷ ଗୁରୁତର ପ୍ରଭାବିତ ହୋଇଛି। ତଥାପି ଚାଷୀ ଏଯାଏଁ ଚାଷ ଉପରୁ ଆସ୍ଥା ହରାଇ ନାହିଁ। ଗତବର୍ଷ ବିଳମ୍ବିତ ତଥା ଅସ୍ବାଭାବିକ ବର୍ଷା ସତ୍ତ୍ୱେ ଦିଗପହଣ୍ଡି ଅଞ୍ଚଳରେ ଖରିଫ ଧାନ ଚାଷ ବିଶେଷ ପ୍ରଭାବିତ ହୋଇନଥିଲା। ଚଳିତବର୍ଷ ଅଗଷ୍ଟ ପ୍ରଥମ ସପ୍ତାହ ସରିବାକୁ ବସିଥିବା ବେଳେ ମଙ୍ଗଳବାର ସୁଦ୍ଧା ମୌସୁମୀ କିମ୍ବା ଲଘୁଚାପଜନିତ ବଡ଼ ଧରଣର ବର୍ଷା ଅନୁଭୂତ ହୋଇପାରିନାହିଁ। ଫଳରେ ଚାଷ ଗୁରୁତର ପ୍ରଭାବିତ ହୋଇଛି।
ଚଳିତବର୍ଷ ଦିଗପହଣ୍ଡି ବ୍ଲକ ଏବଂ ଏନ୍ଏସି ଅଞ୍ଚଳର ୨୫,୮୫୫ ହେକ୍ଟର ଚାଷ ଜମିରେ ଖରିଫ ଧାନ ଚାଷ କରାଯିବା ପାଇଁ କୃଷି ବିଭାଗ ପକ୍ଷରୁ ଲକ୍ଷ୍ୟ ଧାର୍ଯ୍ୟ କରାଯାଇଥିବା ବେଳେ ଜୁଲାଇ ୩୧ ସୁଦ୍ଧା ମାତ୍ର ୧୦ ପ୍ରତିଶତ ଅର୍ଥାତ ୧ ହଜାର ହେକ୍ଟର ଚାଷ ଜମିରେ ଧାନ ରୁଆ କାର୍ଯ୍ୟ ସମ୍ଭବ ହୋଇପାରିଥିବା କୃଷି ବିଭାଗ ସୂଚନା ଦେଇଛି। ଧାରା ଶ୍ରାବଣରେ ମଧ୍ୟ ପ୍ରଚଣ୍ଡ ଗ୍ରୀଷ୍ମର ପ୍ରଭାବ ଦ୍ୱାରା ଗୋଟିଏ ଗୋଟିଏ ତଳି ଘେରାରେ ପ୍ରାୟ ୫୦ ଭାଗ ଧାନ ତଳି ପୋଡିଗଲାଣି। ଆଉ ଦୁଇ ତିନି ଦିନ ଯଦି ଖରା ଲାଗିରହେ ତେବେ ଧାନ ତଳି ସମ୍ପୂର୍ଣ୍ଣ ପୋଡ଼ିଯିବ ବୋଲି ଆଶଙ୍କା କରାଯାଉଛି। କେତେକ ସ୍ଥାନରେ ଧାନ ତଳି ବଞ୍ଚାଇବା ପାଇଁ ଚାଷୀମାନେ ସଂଘର୍ଷ ଚଳାଇଛନ୍ତି। ଗାଁ ଠାରୁ ପ୍ରାୟ ୨ କିଲୋମିଟର ପର୍ଯ୍ୟନ୍ତ ପାଣି ବୋହିନେଇ ତଳି ଘେରାରେ ପକାଉଥିବା ବେଳେ ଆଉ କେତେକ ଚାଷୀ ପମ୍ପ ସାହାଯ୍ୟରେ ଜଳସେଚିତ କରିବା ପାଇଁ ଉଦ୍ୟମ କରୁଛନ୍ତି। ବାସୁଦେବପୁର ପଞ୍ଚାୟତ ଚାଷୀ କିଶୋର ଦୋରାଙ୍କ କହିବା କଥା ହେଲା ଡେରିରେ ବର୍ଷା ହେଲେ ମଧ୍ୟ ସେତେବେଳକୁ ଆଉ ଧାନତଳି ନଥିବ। ପାଖରେ ମଧ୍ୟ ଆଉ ବଳକା ବିହନ ନାହିଁ।
ଦିଗପହଣ୍ଡି ବ୍ଳକର ସିଦ୍ଧେଶ୍ୱର, କୋଟିନଡା, ବାସୁଦେବପୁର, କୁଶପଡା, ଗୋକର୍ଣ୍ଣପୁର, ବି.ତୁରୁବୁଡି, ବଡଡୁମୁଳା, କରପଡା, ଜକର ଗ୍ରାମପଞ୍ଚାୟତରେ ଧାନତଳି ପ୍ରାୟ ୫୦ ପ୍ରତିଶତ ପୋଡ଼ିଗଲାଣି। କ୍ଷୁଦ୍ର ସେଚପ୍ରକଳ୍ପ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ। ଦିଗପହଣ୍ଡି ଜିଲା କୃଷି ଅଧିକାରୀ ନିରଞ୍ଜନ ମହାପାତ୍ର କହିଛନ୍ତି, କେତେକ ନିର୍ଦ୍ଦିଷ୍ଟ ପଞ୍ଚାୟତରେ ଧାନତଳି ପ୍ରଭାବିତ ହୋଇଥିବା ସୂଚନା ମିଳିଛି। କୃଷି କର୍ମଚାରୀମାନଙ୍କୁ ନିଜ ନିଜର ପଞ୍ଚାୟତର ସବିଶେଷ ରିପୋର୍ଟ ପ୍ରଦାନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ବ୍ଳକ ସହକାରୀ କୃଷି ଅଧିକାରୀ ପଦାରବିନ୍ଦ ସାହୁ କହିଛନ୍ତି, ଯେଉଁ ଅଞ୍ଚଳରେ ଧାନତଳି ପ୍ରଭାବିତ ହୋଇଛି ସମ୍ପୃକ୍ତ ଚାଷୀମାନଙ୍କୁ ବର୍ଷା ହେଲା ପର୍ଯ୍ୟନ୍ତ ତଳି ବଞ୍ଚାଇବା ପାଇଁ ବିଭିନ୍ନ ମାର୍ଗ ସମ୍ପର୍କରେ ପରାମର୍ଶ ଦିଆଯାଉଛି। ଜଣେ ବିଭାଗୀୟ କୃଷି କ୍ଷେତ୍ର କର୍ମଚାରୀଙ୍କ ମତାନୁସାରେ ଖରିଫ ଧାନ ଚାଷ କାର୍ଯ୍ୟ ସେପ୍ଟେମ୍ବର ଛୁଇଁବ। ଆବଶ୍ୟକ ବର୍ଷା ନହେବାରୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ସେ କହିଛନ୍ତି।
