କୋଲକାତା, ୧୨ା୧୨ (ପି.ଟି.)- ଭାରତୀୟ ଟେନିସ୍ ଆଇକନ୍ ଲିଆଣ୍ଡର ପେସ୍ ଆସନ୍ତାବର୍ଷ ହେବାକୁ ଥିବା ଟୋକିଓ ଅଲିମ୍ପିକ୍ସ ଲାଗି ପ୍ରସ୍ତୁତ ହେଉଛନ୍ତି। ଜଣେ ପ୍ରଫେସନାଲ ଖେଳାଳି ହିସାବରେ ୨୦୨୦ ତାଙ୍କର ଶେଷବର୍ଷ ହେବ ବୋଲି ୨୦୧୯ ଖ୍ରଷ୍ଟମାସ୍ ଡେ’ରେ ସେ ଘୋଷଣା କରିଥିଲେ। ଏଥିରୁ ସ୍ପଷ୍ଟ ସୂଚୀତ ହେଉଥିଲା ଯେ, ସେ ଟୋକିଓ ଅଲିମ୍ପିକ୍ସରେ ଭାଗ ନେବେ। ଏଠାରେ ମୋଟୋଭୋଲ୍ଟ ମୋବିଲିଟି ସ୍ମାର୍ଟ ଇ-ସାଇକେଲ୍ସର ଅନାବରଣ ଉତ୍ସବରେ ଯୋଗଦାନ ଅବସରରେ ପେସ୍ କହିଛନ୍ତି କରୋନା ମହାମାରୀ ଦ୍ୱାରା ସମଗ୍ର ବିଶ୍ୱ ଏତେ ପ୍ରଭାବିତ ହେବ ବୋଲି କେହି କଳ୍ପନାରେ ସୁଦ୍ଧା ଭାବି ନ ଥିଲେ। ବହୁ ଦିନ ଧରି ବ୍ରେକ୍ ପରେ ସେ ଖୁସି ଅନୁଭବ କରୁଛନ୍ତି। ଶାରୀରିକ, ମାନସିକ ଓ ଭାବନାତ୍ମକ ଦିଗରୁ ସେ ପ୍ରସ୍ତୁତ ଅଛନ୍ତି। ଇତିହାସ ପୃଷ୍ଠାରେ ଭାରତର ନାମ କିପରି ଲିପିବଦ୍ଧ ହୋଇ ରହିବ ତାହା ହେଉଛି ଗୁରୁତ୍ୱପୂର୍ଣ୍ଣ। ଏହି ଦୃଷ୍ଟିରୁ ସେ ୩୦ ବର୍ଷ ହେଲା ତାଙ୍କ କ୍ୟାରିୟର ଜାରି ରଖିଛନ୍ତି। ଟୋକିଓ ଅଲିମ୍ପିକ୍ସ ଜୁଲାଇ ୨୩ରୁ ଆରମ୍ଭ ହେବ। ସେତେବେଳକୁ ପେସ୍ଙ୍କୁ ୪୮ବର୍ଷ ବୟସ ହୋଇଥିବ। ସେ କହିଛନ୍ତି, ବୟସ ଏକ ସଂଖ୍ୟା ଛଡ଼ା ଆଉ କିଛି ନୁହେଁ। ରେକର୍ଡ ବୁକ୍ରେ ଭାରତର ନାମ ସବୁଦିନ ପାଇଁ ରହୁ ବୋଲି ସେ ଚାହାନ୍ତି। ଜଣେ ଟେନିସ ଖେଳାଳି ହିସାବରେ ସର୍ବାଧିକ ୭ ଥର ଅଲିମ୍ପିକ୍ସରେ ଭାଗ ନେଇ ସେ ପୂର୍ବରୁ ରେକର୍ଡର ଅଧିକାରୀ ହୋଇସାରିଛନ୍ତି। ଟୋକିଓ ଅଲିମ୍ପିକ୍ସରେ ଭାଗ ନେଲେ ଏହି ସଂଖ୍ୟା ୮ରେ ପହଞ୍ଚତ୍ୟିବ। ଭବିଷ୍ୟତରେ ଏହି ରେକର୍ଡ ଭାଙ୍ଗିବା ସହଜ ହେବ ନାହିଁ।
