ଡେରାବିଶ,୪ା୭(ସ୍ବ.ପ୍ର.): ରାଜ୍ୟ ସରକାର ଗ୍ରାମାଞ୍ଚଳର ଜନସାଧାରଣଙ୍କୁ ବିଶୁଦ୍ଧ ପାନୀୟଜଳ ଯୋଗାଇ ଦେବାକୁ ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ତତ୍ତ୍ୱାବଧାନରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଡେରାବିଶ ବ୍ଲକ ଅନ୍ତର୍ଗତ ଗୁଆଳସିଂ ପଞ୍ଚାୟତର ଠାକୁରହାଟଠାରେ ୧୦ ବର୍ଷ ପୂର୍ବରୁ ନିର୍ମିତ ହୋଇଥିବା ଓଭରହେଡ୍ ପାଣି ଟାଙ୍କିଟି ନିର୍ମାଣର ୨ ବର୍ଷ ପରେ ଅଚଳ ହୋଇପଡିଥିଲା। ବିଭାଗୀୟ କର୍ତ୍ତୃପକ୍ଷ ଖରାପ ହୋଇଥିବା ଏହି ପାଣି ଟାଙ୍କିକୁ ମରାମତି କରିବା ପରିବର୍ତ୍ତେ ପ୍ରତ୍ୟେକ ବର୍ଷ ବାହାରପଟୁ ରଙ୍ଗ କରି ସରକାରୀ ଅର୍ଥକୁ ହରିଲୁଟ୍ କରିଚାଲିଥିଲେ। ସ୍ଥାନୀୟ ଅଞ୍ଚଳବାସୀଙ୍କୁ ପାଣି ଟାଙ୍କି ବଦଳରେ ପାଣି ପମ୍ପ ଯୋଗେ ପାନୀୟଜଳ ଯୋଗାଇବାର ବନ୍ଦୋବସ୍ତ କରାଯାଇଥିଲା। ହେଲେ ପଞ୍ଚାୟତ ଅଧୀନ ୮ଟି ୱାର୍ଡର ଶେଷମୁଣ୍ଡ ଯାଏ ଠିକ୍ ଢଙ୍ଗରେ ପାଣି ପହଞ୍ଚତ୍ପାରୁ ନ ଥିଲା। ପଞ୍ଚାୟତବାସୀଙ୍କ ପକ୍ଷରୁ ବାରମ୍ବାର କେନ୍ଦ୍ରାପଡ଼ା ବିଭାଗୀୟ ନିର୍ବାହୀ ଯନ୍ତ୍ରୀଙ୍କଠାରୁ ଆରମ୍ଭ କରି ବ୍ଲକ କନିଷ୍ଠ ଯନ୍ତ୍ରୀଙ୍କ ଯାଏ ଅଭିଯୋଗ ହୋଇଆସୁଥିଲା। ହେଲେ ଏ ନେଇ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିଲା। ତେବେ ମେ’ ୨୯ରେ ପଞ୍ଚାୟତ ସମିତି ଅଧ୍ୟକ୍ଷା ପ୍ରଭାତୀ ମଲ୍ଲିକଙ୍କ ଦ୍ୱାରା ଆହୁତ ସ୍ବତନ୍ତ୍ର ବୈଠକରେ ଗୁଆଳସିଂ ସରପଞ୍ଚ ମଧୁସ୍ମିତା ଦାସ ଗ୍ରାମ୍ୟ ପାନୀୟଜଳ ଯୋଗାଣ ବିଭାଗ ପକ୍ଷରୁ ସମ୍ପୃକ୍ତ ପଞ୍ଚାୟତର ପ୍ରତି ଜଳ ଯୋଗାଣ ବ୍ୟବସ୍ଥାରେ ବ୍ୟାପକ ଅଣଦେଖା ନେଇ ପ୍ରତିବାଦ କରିଥିଲେ। ୭ ଦିନ ଭିତରେ ଏହି ସମସ୍ୟାର ସମାଧାନ ନ ହେଲେ ବିଭାଗୀୟ କାର୍ଯ୍ୟାଳୟ ସମ୍ମୁଖରେ ସେ ଧାରଣରେ ବସିବେ ବୋଲି ଚେତାବନୀ ଦେଇଥିଲେ। ବ୍ଲକ କନିଷ୍ଠ ଯନ୍ତ୍ରୀ ଦୁଇଦିନ ମଧ୍ୟରେ ଏହି ସମସ୍ୟାର ସମାଧାନ ହେବ କହି ସମୟ ଗଡ଼ାଇ ଚାଲିଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ସରପଞ୍ଚ ଦାସ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ପୁନର୍ବାର ଦାବି ଜଣାଇବା ପରେ ବିଭାଗୀୟ କର୍ତ୍ତୃପକ୍ଷ ଏହାକୁ ଗୁରୁତ୍ୱ ଦେବା ସହ ଯୁଦ୍ଧକାଳୀନ ଭିତ୍ତିରେ ଏହି ଟାଙ୍କିର ମରାମତି ହେବ ବୋଲି କହିଥିଲେ। ତୁରନ୍ତ ପାନୀୟଜଳ ଯୋଗାଇ ଦେବାକୁ ନିର୍ବାହୀ ଯନ୍ତ୍ରୀ ବସନ୍ତ କୁମାର ନାୟକ, ଡେରାବିଶ ବ୍ଲକର କନିଷ୍ଠ ଯନ୍ତ୍ରୀ ଦେବାଶିଷ ଧଳ ଓ ବିଭୁଦତ୍ତ ଦାସ ଶନିବାର ଘଟଣାସ୍ଥଳକୁ ଯାଇ ଅଚଳ ହୋଇପଡ଼ିଥିବା ଟାଙ୍କିକୁ ଅନୁଧ୍ୟାନ କରି ଫେରିଛନ୍ତି। ତେବେ ସୋମବାରଠାରୁ ଏହି ଟାଙ୍କି ମରାମତି କରାଯାଇ ତୁରନ୍ତ ଲୋକଙ୍କୁ ପାନୀୟଜଳ ଯୋଗାଇ ଦିଆଯିବ ବୋଲି କନିଷ୍ଠ ଯନ୍ତ୍ରୀ ଧଳ କହିଛନ୍ତି।
