ମୋହନା, ୧୯।୬ (ମନ୍ମଥ ମିଶ୍ର): ଗଜପତି ଜିଲା ଠିକାଦାର ସଂଘ ପକ୍ଷରୁ ଏକ ନୂତନ ନିୟମାବଳୀ ପ୍ରସ୍ତୁତ କରାଯାଇଛି। ସଂଘର ସଦସ୍ୟମାନଙ୍କ ସର୍ବସମ୍ମତିକ୍ରମେ ଗୃହୀତ ଏହି ନିୟମାବଳୀ ଅନୁଯାୟୀ, ବାହାର ଜିଲାର ଠିକାଦାରମାନଙ୍କୁ ଗଜପତି ଜିଲାରେ କାମ କରିବା ପାଇଁ ସମ୍ପୂର୍ଣ୍ଣ ଭାବେ ବାରଣ କରାଯାଇଛି।
ଜିଲା ଠିକାଦାର ସଂଘ ପକ୍ଷରୁ ପ୍ରତ୍ୟେକ ଟେଣ୍ଡର ସରକାରଙ୍କ ସିଡ୍ୟୁଲ୍ ଅନୁଯାୟୀ ପକାଯିବା ସହ ସମସ୍ତ ଠିକାଦାରଙ୍କ ସୁବିଧା ହେବା ଦିଗରେ ଗୁରୁତ୍ୱ ଦିଆଯାଇଛି। ଏ ନେଇ ଜିଲାର ସମସ୍ତ ଠିକାଦାର ଏକମତ ହୋଇ ନିଷ୍ପତ୍ତି ନେଇଛନ୍ତି।
ସଂଘର ନିଷ୍ପତ୍ତି ଅନୁଯାୟୀ, ଜିଲାର ଠିକାଦାରମାନେ ୬ କୋଟି ଟଙ୍କା ପର୍ଯ୍ୟନ୍ତ ସମସ୍ତ ଠିକା କାମ କରିବେ। ଏହାଠାରୁ ଅଧିକ ଟଙ୍କାର ଟେଣ୍ଡରରେ ଅନ୍ୟ ଜିଲାର ଠିକାଦାରମାନେ ଅଂଶଗ୍ରହଣ କରି କାମ କରିପାରିବେ। ତେବେ ସେଥିପାଇଁ ଏକ ସର୍ତ୍ତ ରଖାଯାଇଛି। ସମ୍ପୃକ୍ତ ଠିକାଦାରଙ୍କୁ ଗଜପତି ଜିଲା ଠିକାଦାର ସଂଘକୁ କାମ ଓ ଟେଣ୍ଡର ସମ୍ପର୍କରେ ଅବଗତ କରାଇବା ସହ ସରକାରୀ ସିଡ୍ୟୁଲ୍ ଅନୁଯାୟୀ ଟେଣ୍ଡର ପକାଇବାକୁ ପଡ଼ିବ।
ଯଦି କୌଣସି ବାହାର ଜିଲାର ଠିକାଦାର ସରକାରୀ ସିଡ୍ୟୁଲ୍ ଅନୁଯାୟୀ ଟେଣ୍ଡର ନ ପକାଇ ଅତ୍ୟଧିକ କମ୍ ଦରରେ (ଲେସରେ) ଟେଣ୍ଡର ପକାନ୍ତି, ତେବେ ତାହାକୁ ସଂଘ ପକ୍ଷରୁ ସମ୍ପୂର୍ଣ୍ଣ ଭାବେ ବିରୋଧ କରାଯିବ ବୋଲି ନିଷ୍ପତ୍ତି ନିଆଯାଇଛି।
ସୂଚନା ଅନୁଯାୟୀ, ପୂର୍ବ ସରକାରଙ୍କ ସମୟରେ ଟେଣ୍ଡର ପ୍ରକ୍ରିୟାରେ ସର୍ବାଧିକ ୧୫ ପ୍ରତିଶତ ପର୍ଯ୍ୟନ୍ତ କମ୍ ଦରରେ ଟେଣ୍ଡର ପକାଇବାର ବ୍ୟବସ୍ଥା ଥିଲା। ହେଲେ ସରକାର ପରିବର୍ତ୍ତନ ପରେ ଯିଏ ଯେତେ କମ୍ ଦରରେ ଟେଣ୍ଡର ପକାଇପାରିବେ, ସେହି ବ୍ୟବସ୍ଥା ଲାଗୁ ହୋଇଥିବାରୁ ଠିକାଦାରମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଦିନକୁ ଦିନ କୋଠାବାଡ଼ି ଓ ରାସ୍ତା ନିର୍ମାଣ ସାମଗ୍ରୀର ଦରଦାମ ଅହେତୁକ ଭାବେ ବୃଦ୍ଧି ପାଉଥିବା ବେଳେ, ଅତ୍ୟଧିକ କମ୍ ଦରରେ ଟେଣ୍ଡର ପକାଇ ଅନେକ ଠିକାଦାର ନିମ୍ନମାନର କାମ କରୁଥିବା ଅଭିଯୋଗ ହେଉଛି। ବିଶେଷକରି ବାହାର ଜିଲାର ଅନେକ ଠିକାଦାର ଗଜପତି ଜିଲାରେ ଅଧିକ ରେଟ୍ କାଟି ନିମ୍ନମାନର କାର୍ଯ୍ୟ କରୁଥିବା ନେଇ ସଂଘ ଅସନ୍ତୋଷ ପ୍ରକାଶ କରିଛି।
ଏପରି କାର୍ଯ୍ୟରୁ ବିରତ ରହିବା ସହ ଗଜପତି ଜିଲାର ଟେଣ୍ଡର ପ୍ରକ୍ରିୟାରେ ଅଂଶଗ୍ରହଣ ନ କରିବାକୁ ବାହାର ଜିଲାର ଠିକାଦାରମାନଙ୍କୁ ଜିଲା ଠିକାଦାର ସଂଘ ପକ୍ଷରୁ ମୋହନା ଆର୍ଡି କାର୍ଯ୍ୟାଳୟ ସମ୍ମୁଖରେ ଗଣମାଧ୍ୟମ ଜରିଆରେ ଅନୁରୋଧ କରାଯାଇଛି।
