ଯାଜପୁର ଅଫିସ,୪ା୮:ରାଜ୍ୟର କୋଣ ଅନୁକୋଣରେ ପୂର୍ବରୁ ନକଲି ବିଏଡ୍/ସିଟି ଡିଗ୍ରୀଧାରୀ ଶିକ୍ଷୟିତ୍ରୀଶିକ୍ଷକଙ୍କ ରହସ୍ୟ ଉନ୍ମୋଚନ ହୋଇ ଥିବାବେଳେ ଏବେ ପୁଣି ଓଟିଇଟି(ଓଡ଼ିଶା ଟିଚର୍ସ ଏଲିଜିବିଲିଟି ଟେଷ୍ଟ)ପ୍ରମାଣପତ୍ର ଜାଲିଆତି ଧରାପଡ଼ିଛି। ସୂଚନା ଅଧିକାର ଆଇନ (ଆର୍ଟିଆଇ) ବଳରେ ମିଳିଥିବା ତଥ୍ୟ ଆଧାରରେ ଏହା ସ୍ପଷ୍ଟ ହୋଇଛି। ଆର୍ଟିଆଇ କର୍ମୀ ଭଦ୍ରକ ଜିଲାର ଅଭିମନ୍ୟୁ ବାରିକ ନକଲି ଓଟିଇଟି ଡିଗ୍ରୀଧାରୀ ଜଣେ ଶିକ୍ଷକଙ୍କ ନାମରେ ୧୯ା୩ା୨୦୨୧ରେ ଯାଜପୁର ଜିଲା ଶିକ୍ଷାଧିକାରୀ ଏବଂ ୯ା୬ା୨୦୨୧ରେ ସ୍କୁଲ ଓ ଗଣଶିକ୍ଷା ବିଭାଗର ସଚିବ ସତ୍ୟବ୍ରତ ସାହୁଙ୍କ ଦୃଷ୍ଟି ଆକର୍ଷଣ କରିଥିଲେ। ତେବେ ଆଳୁ ଖୋଳୁଖୋଳୁ ମହାଦେବ ବାହାରିବା ନୀତିରେ ଜିଲା ଶିକ୍ଷା ବିଭାଗ ପକ୍ଷରୁ ହୋଇଥିବା ତଦନ୍ତରେ ୩ଜଣ ଶିକ୍ଷକ ଜାଲ୍ ଓଟିଇଟି ପ୍ରମାଣପତ୍ର (ସାର୍ଟିଫିକେଟ)ଦାଖଲ କରି ଇନକ୍ରିମେଣ୍ଟ ସୁବିଧା ପାଇଥିବା ଜଣାପଡ଼ିଛି। ୨୭ା୭ା୨୦୨୧ରେ ଜିଲା ଶିକ୍ଷା ବିଭାଗ ପକ୍ଷରୁ ବଡ଼ଚଣା ବିଇଓ (ବ୍ଲକ ଏଜୁକେଶନ ଅଫିସର)ଙ୍କୁ ସମ୍ପୃକ୍ତ ଶିକ୍ଷକମାନଙ୍କ ବିରୋଧରେ ମାସକ ମଧ୍ୟରେ କାରଣ ଦର୍ଶାଅ ନୋଟିସ ଜାରି କରିବାକୁ ନିର୍ଦ୍ଦେଶ ଦିଆଯାଇଛି। ଏହାବାଦ ଓଡ଼ିଶା ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ(ଡିଇଇ)ର ଯୁଗ୍ମ ନିର୍ଦ୍ଦେଶକ ଓ ନୋଡାଲ ଅଫିସର ତାଙ୍କ ପତ୍ରସଂଖ୍ୟା ୧୨୨୨୫/୨୯ା୭ା୨୦୨୧ରେ ଯାଜପୁର ଜିଲା ଶିକ୍ଷାଧିକାରୀ ଓ ବଡ଼ଚଣା ବିଇଓଙ୍କୁ ପ୍ରମାଣପତ୍ର, ମାର୍କଶିଟ ଆଦି ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି। ସମ୍ପୃକ୍ତ ଶିକ୍ଷକ ଜାଲ୍ ପ୍ରମାଣପତ୍ର ଦାଖଲ କରିଥିବା ପ୍ରମାଣିତ ହେଲେ ଓସିଏସ୍(ସିସିଏ)ନିୟମ-୧୯୬୨ ଅନୁସାରେ ଚାକିରିରୁ ବହିଷ୍କାର କରିବା ସହ ସ୍ଥାନୀୟ ପୋଲିସ ଷ୍ଟେଶନରେ ଏଫଆଇଆର ଦେବାକୁ ନିର୍ଦ୍ଦେଶ ଦିଆଯାଇଛି।
ସୂଚନାଯୋଗ୍ୟ, ସ୍କୁଲ ଓ ଗଣଶିକ୍ଷା ବିଭାଗ ପତ୍ର ସଂଖ୍ୟା ୨୦୭୧୦/୩୦ା୧୧ା୨୦୧୫, ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଉପନିର୍ଦ୍ଦେଶକ ପତ୍ରସଂଖ୍ୟା ୬୯୨୮/୧୮ା୪ା୨୦୧୬, ସ୍କୁଲ ଓ ଗଣଶିକ୍ଷା ବିଭାଗର ଅତିରିକ୍ତ ସଚିବ ବି.ଏନ୍. ପ୍ରଧାନ ତାଙ୍କ ପତ୍ରସଂଖ୍ୟା ୧୭୦୯୯/୨୬ା୮ା୨୦୧୬ରେ ନକଲି ଶିକ୍ଷକଙ୍କ ପ୍ରମାଣପତ୍ର ଆଦି ଯାଞ୍ଚ କରିବାକୁ ନିର୍ଦ୍ଦେଶ ଦେଇଥିଲେ। ଏହିସବୁ ନିର୍ଦ୍ଦେଶ ନାଲିଫିତା ତଳେ ଚାପିହୋଇ ରହିଛି। ସେହିପରି ଡିଇଇଙ୍କ ପକ୍ଷରୁ ୩୦୪୫୯/୩ା୧୨ା୨୦୧୯, ୩୨୨୫୯/୨୦ା୧୨ା୨୦୧୯, ୨୦୮୪/୨୨ା୧ା୨୦୨୦ ଏବଂ ୧୦୩୬୫/୪ା୬ା୨୦୨୦ ରେ ଅଭିଯୁକ୍ତ ନକଲି ଶିକ୍ଷୟିତ୍ରୀଶିକ୍ଷକଙ୍କ ପ୍ରମାଣପତ୍ର ଆଦି ଯାଞ୍ଚ କରିବାକୁ ନିର୍ଦ୍ଦେଶ ହୋଇଥିଲା। କିନ୍ତୁ ଜିଲାସ୍ତରରେ କୌଣସି ଉପଯୁକ୍ତ ପଦକ୍ଷେପ ଗ୍ରହଣ ନ କରିବାରୁ ଡିଇଇ ପକ୍ଷରୁ ଉପନିର୍ଦ୍ଦେଶକ ଓ ନୋଡାଲ ଅଧିକାରୀ ଉଦ୍ବେଗ ପ୍ରକାଶ କରି ପୁଣି ଥରେ ତାଙ୍କ ପତ୍ରସଂଖ୍ୟା ୧୯୧୬୬/୨୯ା୧୦ା୨୦୨୦ରେ ପ୍ରମାଣପତ୍ରଗୁଡିକ ଯାଞ୍ଚ କରିବାକୁ ନିର୍ଦ୍ଦେଶ ଦେଇଥିଲେ। ତେବେ ଏହି ନିର୍ଦ୍ଦେଶ ଠିକ୍ ଭାବେ କାର୍ଯ୍ୟକାରୀ ହେଉ ନ ଥିବାରୁ ଜାଲ୍ ପ୍ରମାଣପତ୍ରଧାରୀଙ୍କ ସଂଖ୍ୟା ବଢୁଥିବା ଏହି ଓଟିଇଟି ମାମଲାରୁ ସ୍ପଷ୍ଟ ହୋଇଛି ବୋଲି ମତପ୍ରକାଶ ପାଇଛି।
ଆର୍ଟିଆଇରୁ ମିଳିଥିବା ତଥ୍ୟ ଅନୁସାରେ, ୨୧ା୧୧ା୨୦୧୯ରେ ଓଟିଇଟି ରେଜଲ୍ଟ ପ୍ରକାଶ ପାଇଥିଲା। ଏଥିରେ ୪୬,୮୨୨ ଜଣ ପରୀକ୍ଷାର୍ଥୀ ଉପକୃତ ହୋଇଥିଲେ। କିନ୍ତୁ ୧୮୧୩୦୦୨୨୫୫, ୧୮୧୩୦୧୦୦୬୭ ଓ ୧୮୧୧୩୦୬୦୧୧ ରୋଲ ନମ୍ବର ପରୀକ୍ଷାର୍ଥୀ ଉପକୃତ ହୋଇ ନ ଥିଲେ। ଏଥିରେ ବଡ଼ଚଣା ବ୍ଲକର ସହକାରୀ ଶିକ୍ଷକ ଅନିୟ କୁମାର ବରାଳ ଏହି ଜାଲିଆତିରେ ସମ୍ପୃକ୍ତ ଥିବା ଆର୍ଟିଆଇ କର୍ମୀ ବାରିକ ଅଭିଯୋଗ ଆଣିଥିଲେ। ଅଭିଯୋଗକୁ ଭିତ୍ତିକରି ଯାଜପୁର ଜିଲା ଶିକ୍ଷା ବିଭାଗ ୧୦ ଜଣ ଶିକ୍ଷକଙ୍କ ନାମରେ ବୋର୍ଡ ଅଫ ସେକେଣ୍ଡାରି ଏଜୁକେଶନକୁ ଆବଶ୍ୟକ ତଥ୍ୟ ମାଗିଥିଲେ। ୨୭ା୭ା୨୦୨୧ରେ ବୋର୍ଡ ଅଫ ସେକେଣ୍ଡାରିରୁ ମିଳିଥିବା ତଥ୍ୟରେ ଶିକ୍ଷକ ଅନିୟଙ୍କ ସମେତ ରେଜିଆ ସୁଲତାନା ଓ ଜୟନ୍ତୀ ସାହୁ ଜାଲ୍ ଓଟିଇଟି ପ୍ରମାଣପତ୍ର ଦାଖଲ କରିଥିବା ଜିଲା ଶିକ୍ଷା ବିଭାଗରୁ ସୂଚନା ମିଳିଛି। ତେବେ ପୂର୍ବରୁ ଜାଲ୍ ପ୍ରମାଣପତ୍ରଧାରୀ ଶିକ୍ଷକଙ୍କ ବିରୋଧରେ କୋହଳ ମନୋଭାବ ପୋଷଣ କରୁଥିବା ଦୃଷ୍ଟାନ୍ତ ରହିଛି। ରାଜ୍ୟରେ ଏଭଳି ଶତାଧିକ ନକଲି ଓଟିଇଟି ପ୍ରମାଣପତ୍ର ଧାରୀ ଶିକ୍ଷକ ନିଯୁକ୍ତି ପାଇଥିବା ପୂର୍ବରୁ ଅଭିଯୋଗ ହୋଇଛି। ତେଣୁ ରାଜ୍ୟ ସରକାର ଏହି ନକଲି ଶିକ୍ଷକଙ୍କ ବିରୋଧରେ ନିର୍ଦ୍ଦିଷ୍ଟ ସମୟରେ କିଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ତାହା ସମୟ କହିବ ବୋଲି ମତପ୍ରକାଶ ପାଇଛି।
