ଭୁବନେଶ୍ୱର,୨୪ା୪(ବ୍ୟୁରୋ): ଓଡ଼ିଶା ମୁଖ୍ୟମନ୍ତ୍ରୀ ଯେମିତି ଓଡ଼ିଆ କୁହନ୍ତି, ଠିକ୍ ସେମିତି ଓଏସ୍ଏସ୍ସି ପରୀକ୍ଷାରେ ଓଡ଼ିଆ ପ୍ରଶ୍ନପତ୍ର ପ୍ରସ୍ତୁତ କରାଯାଇଛି। ରାଜ୍ୟ ସରକାର ଓଡ଼ିଶାର ଛାତ୍ରୀଛାତ୍ରଙ୍କ ଭବିଷ୍ୟତ ସହ ଖେଳ ଖେଳୁଛନ୍ତି। ଓଏସ୍ଏସ୍ସି ପରୀକ୍ଷା ପ୍ରଶ୍ନପତ୍ର ଦେଖିଲେ ଜଣାପଡ଼ୁଛି, ଏହାକୁ ପ୍ରସ୍ତୁତ କରୁଥିବା ସଂସ୍ଥା ଓଡ଼ିଆ ସଂସ୍ଥା ନୁହେଁ ଏବଂ ଏହାର ଦାୟିତ୍ୱରେ ଥିବା ଅଧିକାରୀ ମଧ୍ୟ ଓଡ଼ିଆ ନୁହନ୍ତି। ଯେଉଁଥିପାଇଁ ଓଡ଼ିଆ ଭାଷାକୁ ସମ୍ପୂର୍ଣ୍ଣ କଦର୍ଥ କରାଯାଇ ପ୍ରକାଶ କରାଯାଇଛି। ପ୍ରଶ୍ନପତ୍ରରେ ସମସ୍ତ ଲିଖିତ ପ୍ରଶ୍ନ ଭୁଲ୍ ରହିଛି। ପରୀକ୍ଷାର୍ଥୀମାନେ କେତେ ପରିଶ୍ରମ କରି ପ୍ରସ୍ତୁତ ହୋଇ ପରୀକ୍ଷା ଦେବାବେଳେ ପ୍ରଶ୍ନପତ୍ର ଭୁଲ୍, ଯାହା ପଢ଼ିବା ଏବଂ ବୁଝିବାଯୋଗ୍ୟ ନୁହେଁ। ସେଥିରେ ସେମାନଙ୍କ ମାନସିକ ଅବସ୍ଥା କ’ଣ ହୋଇଥିବ ସରକାର ଚିନ୍ତା କରିବା ଆବଶ୍ୟକ ବୋଲି ଭାଜପା ରାଜ୍ୟ ଗଣମାଧ୍ୟମ ମୁଖ୍ୟ ଦିଲୀପ ମଲ୍ଲିକ କହିଛନ୍ତି।
ପ୍ରଶ୍ନପତ୍ରର ଫାଇନାଲ ପ୍ରୁଫ୍ ବା ପ୍ରିଣ୍ଟିଂ ପ୍ରୁଫ୍କୁ ଦାୟିତ୍ୱରେ ଥିବା ଅଧିକାରୀ ଦେଖିନାହାନ୍ତି ନା ଓଡ଼ିଆ ଜାଣିନାହାନ୍ତି ତାହା ସରକାର ସ୍ପଷ୍ଟକରନ୍ତୁ। ଯେଉଁ ହଜାର ହଜାର ପରୀକ୍ଷାର୍ଥୀଙ୍କର ପରିଶ୍ରମ, ସମୟ ଓ ଅର୍ଥ ନଷ୍ଟ ହେଲା ଏବଂ ସରକାରଙ୍କ ରାଜସ୍ବରୁ ଖର୍ଚ୍ଚ ହେଲା ତାହାର ଭରଣା କିଏ କରିବ! ଓଡ଼ିଶାରେ ଓଡ଼ିଆଭାଷାର ଏପରି ତ୍ରୁଟି ପାଇଁ ରାଜ୍ୟ ସରକାରଙ୍କ ଓଡ଼ିଆ ବିରୋଧୀ ମନୋଭାବକୁ ସ୍ପଷ୍ଟ କରୁଛି। ଓଡ଼ିଆ ଭାଷାକୁ କଦର୍ଥ କରିବା ଓ ହଜାର ହଜାର ଛାତ୍ରୀଛାତ୍ରଙ୍କ ଭବିଷ୍ୟତ ସହ ଖେଳ ଖେଳିଥିବାରୁ ମୁଖ୍ୟମନ୍ତ୍ରୀ କ୍ଷମା ମାଗନ୍ତୁ ବୋଲି ଭାଜପା ଦାବି କରିଛନ୍ତି।
