Posted inଖେଳ

ଫ୍ରେଞ୍ଚ୍‌ ଓପନରୁ ଓହରିଲେ ଓସାକା: ମାନସିକ ଅବସାଦ କାରଣରୁ ନିଷ୍ପତ୍ତି ନେଲେ

ପ୍ୟାରିସ୍‌,୨।୬(ଏପି): କ୍ରୀଡ଼ାରେ ମାନସିକ ଅବସାଦ ତଥା ଦୁଶ୍ଚିନ୍ତାର ପ୍ରଭାବ ରହିବା ନୂଆ କଥା ନୁହେଁ। ପୂର୍ବରୁ ଅନେକ କ୍ରୀଡ଼ାବିତ୍‌, କ୍ରିକେଟର ମାନସିକ ଅବସାଦ ପାଇଁ ଖେଳ ଛାଡ଼ିବାର ଏକାଧିକ ଉଦାହରଣ ରହିଛି। ଏବେ ଟେନିସରେ ଏହା ଦେଖିବାକୁ ମିଳିଛି। ୪ଟି ଗ୍ରାଣ୍ଡସ୍ଲାମ୍‌ ଟାଇଟଲ ହାସଲ କରିଥିବା ଜାପାନର ୨୩ ବର୍ଷୀୟା ମହିଳା ତାରକା ଟେନିସ ଖେଳାଳି ନାଓମି ଓସାକା ଦୁଶ୍ଚିନ୍ତା ତଥା ମାନସିକ ଅବସାଦର ଶିକାର ହୋଇ ଫ୍ରେଞ୍ଚ୍‌ ଓପନ ଗ୍ରାଣ୍ଡସ୍ଲାମ ଟୁର୍ନାମେଣ୍ଟରୁ ଓହରିଯାଇଛନ୍ତି। ଫଳରେ ସମଗ୍ର କ୍ରୀଡ଼ା ଜଗତରେ ଚର୍ଚ୍ଚା ସୃଷ୍ଟି ହୋଇଛି। ବିଶ୍ୱର ୨ ନମ୍ବର ଖେଳାଳି ରବିବାର ବର୍ଷର ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟରେ ଫ୍ରେଞ୍ଚ୍‌ ଓପନ ପ୍ରଥମ ରାଉଣ୍ଡ ମ୍ୟାଚ୍‌ରେ ରୋମାନିଆର ପାଟ୍ରିସିଆ ଟିଗ୍‌ଙ୍କୁ ୬-୪, ୭-୬ ସେଟ୍‌ରେ ପରାସ୍ତ କରି ଅଗ୍ରଗତି କରିଥିଲେ। ସେ ଦ୍ୱିତୀୟ ରାଉଣ୍ଡ ମ୍ୟାଚ୍‌ରୁ ଓହରିଯାଇ କ୍ରୀଡ଼ା ଜଗତରେ ହଇଚଇ ସୃଷ୍ଟି କରିଛନ୍ତି। ପ୍ରଥମେ ମିଡିଆକୁ ଏଡାଇଯିବା, ପରେ ଜରିମାନା ଓ ଶେଷରେ ଓହରିବା ନିଷ୍ପତ୍ତି ନେଇଥିବାରୁ ଓସାକାଙ୍କୁ ନେଇ ବାଦବିବାଦ ଦେଖାଦେଇଛି।
ଟୁଇଟ୍‌ କରି ଓସାକା ଏ ସମ୍ପର୍କରେ ସୂଚନା ଦେଇଥିଲେ। ୨୦୧୮ ୟୁଏସ୍‌ ଓପନ୍‌ରୁ ସେ ଡିପ୍ରେସନର ଶିକାର ହୋଇଥିଲେ ବୋଲି କହିଛନ୍ତି। ବିଶ୍ୱର ସବୁଠାରୁ ଆୟକାରୀ ମହିଳା ଖେଳାଳିର ମାନ୍ୟତା ପାଇଥିବା ଓସାକା ମାନସିକ ଅବସାଦ, ଚିନ୍ତାର ଶିକାର ହୋଇଛନ୍ତି ଓ ଟୁର୍ନାମେଣ୍ଟରୁ ଓହରିବା ତାଙ୍କ ପାଇଁ ଶ୍ରେୟସ୍କର ବୋଲି କହିଛନ୍ତି। ତେବେ ଟୁର୍ନାମେଣ୍ଟରୁ ଓହରିବାର ଟାଇମିଂ ଠିକ୍‌ ନୁହେଁ ବୋଲି ସେ ସ୍ବୀକାର କରିଛନ୍ତି।
ଡିପ୍ରେସନ ପାଇଁ ଓସାକା ଟୁର୍ନାମେଣ୍ଟରୁ ଓହରିଯାଇଛନ୍ତି ବୋଲି ଓସାକାଙ୍କ ଏଜେଣ୍ଟ ଷ୍ଟୁଆର୍ଟ ଡୁଗୁଇଡ୍‌ କହିଛନ୍ତି। ୨୩ ବର୍ଷରେ ପଦାର୍ପଣ କରିବାର ଗୋଟିଏ ଦିନ ପରେ ଓସାକା ଏହି ନିଷ୍ପତ୍ତି ନେଇ ସମସ୍ତଙ୍କୁ ଚକିତ କରିଛନ୍ତି। ଜାପାନ ଜନ୍ମିତ ଓସାକା ମାତ୍ର ୩ ବର୍ଷ ବୟସରେ ପରିବାର ସହ ଆମେରିକା ଚାଲିଆସିଥିଲେ। ତାଙ୍କର ଏହି ନିଷ୍ପତ୍ତିକୁ ଅବଶ୍ୟ ବିଭିନ୍ନ କ୍ରୀଡ଼ାବିତ୍‌ମାନେ ସମର୍ଥନ ଜଣାଇଛନ୍ତି। ଓସାକାଙ୍କ ଏହି ନିଷ୍ପତ୍ତି ଦୁର୍ଭାଗ୍ୟଜନକ ବୋଲି ଫ୍ରେଞ୍ଚ୍‌ ଟେନିସ ଫେଡେରେଶନ ଅଧ୍ୟକ୍ଷ ଗାଏଲ୍ସ ମୋରେଟନ କହିଛନ୍ତି। ସେ ଖୁବ୍‌ଶୀଘ୍ର ମାନସିକ ଅବସାଦରୁ ମୁକ୍ତିଲାଭ କରନ୍ତୁ ଓ ଆସନ୍ତା ବର୍ଷ ସେ ଏହି ଟୁର୍ନାମେଣ୍ଟରେ ଅଂଶଗ୍ରହଣ କରନ୍ତୁ ବୋଲି କହିଛନ୍ତି।
ଫ୍ରେଞ୍ଚ୍‌ ଓପନରେ ଓସାକା ସେତେଟା ସଫଳ ନୁହନ୍ତି
ରେଡ୍‌ କ୍ଲେ କୋର୍ଟରେ ଖେଳାଯାଉଥିବା ଫ୍ରେଞ୍ଚ୍‌ ଓପନରେ ଓସାକା ଅବଶ୍ୟ ସେତେଟା ସଫଳତା ହାସଲ କରିନାହାନ୍ତି। ଏକ ଗ୍ରାଣ୍ଡସ୍ଲାମ ଜିତିବାକୁ ହେଲେ କ୍ରମାଗତ ଭାବେ ୭ଟି ବିଜୟ ହାସଲ କରିବାକୁ ହୋଇଥାଏ। ଓସାକା ପୂର୍ବରୁ ଫ୍ରେଞ୍ଚ୍‌ ଓପନରେ କେବେହେଲେ ତୃତୀୟ ରାଉଣ୍ଡ ଅତିକ୍ରମ କରିନାହାନ୍ତି। ସେ ହାର୍ଡକୋର୍ଟ ଟୁର୍ନାମେଣ୍ଟରେ ୪ଟି ଗ୍ରାଣ୍ଡସ୍ଲାମ ଜିତିଛନ୍ତି। ସେ ୨୦୧୮ ଓ ୨୦୨୦ରେ ୟୁଏସ୍‌ ଓପନ ଜିତିଛନ୍ତି। ସେହିପରି ସେ ୨୦୧୯ ଓ ୨୦୨୧ରେ ଅଷ୍ଟ୍ରେଲିଆନ ଓପନରେ ଚାମ୍ପିୟନ ହୋଇଥିଲେ।
ଖବରଦାତା ସମ୍ମିଳନୀ ଏଡ଼ାଇବାରୁ ୧୦ ଲକ୍ଷ ଟଙ୍କା ଜରିମାନା
ପ୍ରଥମ ରାଉଣ୍ଡ ମ୍ୟାଚ୍‌ ଜିତିବା ପରେ ଖବରଦାତା ସମ୍ମିଳନୀରେ ଯୋଗ ନ ଦେବାରୁ ଫ୍ରେଞ୍ଚ୍‌ ଓପନ ଟୁର୍ନାମେଣ୍ଟ ରେଫରି ଓସାକାଙ୍କ ଉପରେ ୧୫,୦୦୦ ଆମେରିକୀୟ ଡଲାର ତଥା ପାଖାପାଖି ୧୦ ଲକ୍ଷ ଟଙ୍କା ଜରିମାନା ଧାର୍ଯ୍ୟ କରିଛନ୍ତି। ଗଣମାଧ୍ୟମଠାରୁ ଦୂରେଇ ରହିବାର ଏଭଳି ଆଚରଣ ଜାରି ରଖିଲେ ତାଙ୍କ ଉପରେ ଆହୁରି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ସତର୍କ କରାଇଛନ୍ତି। ଫ୍ରେଞ୍ଚ୍‌ ଟେନିସ ଫେଡେରେଶନ (ଏଫ୍‌ଟିଏଫ୍‌) ଅଧ୍ୟକ୍ଷ ମୋରେଟନ ଓ ଅନ୍ୟ ୩ ଗ୍ରାଣ୍ଡସ୍ଲାମ ଟୁର୍ନାମେଣ୍ଟର ମୁଖ୍ୟ ମିଳିତ ଭାବେ ମନ୍ତବ୍ୟ ଦେଇ ଏହି ଜରିମାନା ଧାର୍ଯ୍ୟ କରିଛନ୍ତି। ପୂର୍ବରୁ ଓସାକା ଗତ ବୁଧବାର ଫ୍ରେଞ୍ଚ୍‌ ଓପନ ଖେଳିବା ଅବସରରେ କୌଣସି ଖବରଦାତା ସମ୍ମିଳନୀରେ ଯୋଗଦେବେ ନାହିଁ ବୋଲି ସ୍ପଷ୍ଟ କରିଥିଲେ। ତେବେ ଏହି ନିଷ୍ପତ୍ତି କାରଣରୁ ଯଦି କୌଣସି ଖବରଦାତା ଆଘାତ ପାଇଛନ୍ତି ତାହାହେଲେ କ୍ଷମାମାଗୁଛି ବୋଲି ସେ ଟୁଇଟ୍‌ କରି ଉଲ୍ଲେଖ କରିଥିଲେ। ସ୍ବତଃପ୍ରବୃତ୍ତ ଭାବେ ଭଲ କଥା କହିପାରି ନ ଥାଏ। ତେଣୁ ସାରା ବିଶ୍ୱର ଗଣମାଧ୍ୟମ ସହ କଥା ହେବା ପୂର୍ବରୁ ଅତ୍ୟଧିକ ଭାବେ ଚିନ୍ତା, ନର୍ଭସ ଓ ଉଦ୍‌ବେଗର ଶିକାର ହୋଇଥାଏ ବୋଲି ସେ କହିଛନ୍ତି। ବର୍ତ୍ତମାନ ପାଇଁ ଟେନିସ କୋର୍ଟରୁ ଦୂରେଇ ରହିବି ବୋଲି ସେ କହିଛନ୍ତି।
କ’ଣ କହୁଛି ଟେନିସର ନିୟମ
ଖବରଦାତା ସମ୍ମିଳନୀରେ ନ ପହଞ୍ଚିବା ପରେ ଓସାକାଙ୍କ ଉପରେ ଆୟୋଜକମାନେ କ୍ଷୁବ୍ଧ ହୋଇଥିଲେ। ତେବେ ସେ ଯଦି ଏଭଳି କରିବା ଜାରି ରଖନ୍ତି ତା’ହେଲେ ତାଙ୍କ ଉପରେ ପ୍ରତିବନ୍ଧକ ଲଗାଯାଇପାରେ। ଟେନିସ ଆଚରଣ ବିଧି ୩ ଏଚ୍‌ ଅନୁସାରେ ଖେଳାଳିମାନେ ଖବରଦାତା ସମ୍ମିଳନୀରେ ଯୋଗଦେବା ଦ୍ୱାରା ଟେନିସ ଖେଳର ପ୍ରଚାର ତଥା ପ୍ରସାର ହୋଇଥାଏ। ତେଣୁ ଖେଳାଳିମାନେ ଗଣମାଧ୍ୟମ କାର୍ଯ୍ୟକଳାପରେ ଜଡ଼ିତ ରହିବା ଅପରିହାର୍ଯ୍ୟ ବୋଲି କୁହାଯାଇଛି।


Enter your email to get our daily news in your inbox.

All Right Reserved By Dharitri.Com

Posted inଖେଳ View All

ଅନ୍ତିମ ଦିନିକିଆ ପୂର୍ବରୁ ନ୍ୟୁଜିଲାଣ୍ଡ ଦଳରେ ପରିବର୍ତ୍ତନ

ଓ୍ବେଲିଂଟନ,୧୦।୨- ଟିମ୍‌ ଇଣ୍ଡିଆ ବିପକ୍ଷ ୩ ମ୍ୟାଚ୍‌ ବିଶିଷ୍ଟ ସିରିଜ୍‌କୁ ଆଗୁଆ ଜିତି ନେଇଥିବା ନ୍ୟୁଜିଲାଣ୍ଡ ଦଳ ଅନ୍ତିମ ମ୍ୟାଚ୍‌ ପୂର୍ବରୁ ଦଳରେ ପରିବର୍ତ୍ତନ କରିଛି।...

ଲିଭରପୁଲକୁ ମାଞ୍ଚେଷ୍ଟର ସିଟି ଗାର୍ଡ ଅଫ୍‌ ଅନର ଦେବ

ଲଣ୍ଡନ,୨୮।୬(ଏପି): ଦୀର୍ଘ ୩୦ ବର୍ଷପରେ ଇଂଲିଶ୍‌ ପ୍ରିମିୟର ଲିଗ୍‌ ଟାଇଟଲ ହାସଲ କରିଥିବା ଲିଭରପୁଲ କ୍ଲବକୁ ମାଞ୍ଚେଷ୍ଟର ସିଟି ଗାର୍ଡ ଅଫ୍‌ ଅନର ଦେବ। ଏ...

ଟୋକିଓ ଅଲିମ୍ପିକ୍ସ କାର୍ଯ୍ୟସୂଚୀ ଅପରିବର୍ତ୍ତିତ ରହିବ

ଟୋକିଓ,୧୮।୭(ଏପି): ଟୋକିଓ ଅଲିମ୍ପିକ୍ସର କାର୍ଯ୍ୟସୂଚୀ ପ୍ରାୟ ଅପରିବର୍ତ୍ତତ ରହିବ। ଆସନ୍ତାବର୍ଷ ଆୟୋଜନ ହେବାକୁ ଥିବା ଏହି ବିଳମ୍ବିତ ମେଗା ଇଭେଣ୍ଟର ୪୨ଟି ଭେନ୍ୟୁକୁ ସୁରକ୍ଷିତ ରଖାଯାଇଛି।...

‘ଇଣ୍ଡିଆନ୍‌ ମହାରାଜ’ର ନେତୃତ୍ୱ ନେବେ ସେହ୍ବାଗ

ମସ୍କାଟ,୧୯।୧: ପୂର୍ବତନ ବିସ୍ଫୋରକ ଓପନର୍‌ ବିରେନ୍ଦ୍ର ସେହ୍ବାଗ ଗୁରୁବାରଠାରୁ କିମ୍ବଦନ୍ତୀ ଲିଗ୍‌ କ୍ରିକେଟ (ଏଲ୍‌ଏଲ୍‌ସିି) ଟି-୨୦ ଟୁର୍ନାମେଣ୍ଟରେ ପୂର୍ବତନ ଭାରତୀୟ କ୍ରିକେଟରଙ୍କ ଟିମ୍‌ ‘ଇଣ୍ଡିଆନ ମହାରାଜ’ର...

ସୋହିନୀଙ୍କୁ ଟାଇଟଲ

ଭୁବନେଶ୍ୱର, ୨୪।୫(କ୍ରୀଡ଼ା ପ୍ରତିନିଧି): ମୁମ୍ବାଇଠାରେ ଶୁକ୍ରବାର ଏମଏସଏଲଟିଏ(ମହାରାଷ୍ଟ୍ର ରାଜ୍ୟ ଲନ୍‌ ଟେନିସ ଆସୋସିଏଶନ)-ୟୋନେକ୍ସ ସନ୍‌ରାଇଜ୍‌ ସୁପର ସିରିଜ ଟେନିସ ଟୁର୍ନାମେଣ୍ଟ ଶେଷ ହୋଇଛି। ଏହାର ୧୨...

ଦ୍ୱିତୀୟ ଥର ପାଇଁ ୟୁଏସ୍‌ ଓପନ୍‌ ଟାଇଟଲ୍ ଜିତିଲେ ଓସାକା

ନ୍ୟୁୟର୍କ, ୧୩।୯: ଚତୁର୍ଥ ସିଡ୍‌ ଜାପାନାର ନାଓମି ଓସାକା ଏଠାରେ ଅନୁଷ୍ଠିତ ୟୁଏସ୍‌ ଓପନ୍‌ ଗ୍ରାଣ୍ଡସ୍ଲାମ ପ୍ରତିଯୋଗିତାର ମହିଳା ସିଙ୍ଗଲ୍ସରେ ଚାମ୍ପିୟନ ହୋଇଛନ୍ତି। ଫାଇନାଲରେ ଓସାକା...

ନାଲକୋ କପ୍‌ ବାସ୍କେଟବଲ ଉଦ୍‌ଘାଟିତ

କଟକ ଅଫିସ,୨୮।୧୧- ଜବାହରଲାଲ ନେହେରୁ ଇନଡୋର ଷ୍ଟାଡିୟମରେ ସିନିୟର ରାଜ୍ୟ ବାସ୍କେଟବଲ ଚାମ୍ପିୟନଶିପ ନାଲକୋ କପ୍‌-୨୦୧୯ ବୁଧବାର ଉଦ୍‌ଘାଟିତ ହୋଇଛି। ଓଡ଼ିଶା ବାସ୍କେଟବଲ ଆସୋସିଏଶନ(ଓବିଏ) ଆନୁକୂଲ୍ୟରେ...

ପ୍ରସିଦ୍ଧ ହକି ଖେଳାଳି ବଲବୀର ସିଂଙ୍କ ପରଲୋକ

ଚଣ୍ଡୀଗଡ, ୨୫।୫: ପ୍ରସିଦ୍ଧ ହକି ଖେଳାଳି ବଲବୀର ସିଂ ସିନିୟରଙ୍କ ପରଲୋକ ଘଟିଛି। ମୋହାଲିର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିବାବେଳେ ତାଙ୍କ ମୃତ୍ୟୁ ହୋଇଛି।...

Advertisement
Archives

Model This Week