କରାଚୀ,୬।୭(ପି.ଟି.): କୋଭିଡ୍-୧୯ ମହାମାରୀ କାରଣରୁ ଯଦି ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ବାତିଲ ହୁଏ ଓ ଏହା ସ୍ଥାନରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ କରାଯାଏ ତା’ହେଲେ ପ୍ରଶ୍ନବାଚୀ ସୃଷ୍ଟି ହେବ ବୋଲି ପୂର୍ବତନ ପାକିସ୍ତାନ ଅଧିନାୟକ ଇଞ୍ଜାମାମ- ଉଲ- ହକ୍ କହିଛନ୍ତି।
ଅଷ୍ଟ୍ରେଲିଆରେ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଟି୨୦ ବିଶ୍ୱକପ୍ ଅକ୍ଟୋବର ୧୮ରୁ ଆରମ୍ଭ ହୋଇ ନଭେମ୍ବର ୧୫ରେ ଶେଷ ହେବାର କାର୍ଯ୍ୟକ୍ରମ ରହିଛି। ଆଇସିସି ମଧ୍ୟ ଟି୨୦ ବିଶ୍ୱକପ୍ ନେଇ କୌଣସି ଅନ୍ତିମ ନିଷ୍ପତ୍ତି ନେଇନାହିଁ। ତେବେ କରୋନ ମହାମାରୀ କାରଣରୁ ଏହି ମେଗା ଇଭେଣ୍ଟ ବାତିଲ ହେବାର ଯଥେଷ୍ଟ ସମ୍ଭାବନା ରହିଛି। ଆଇପିଏଲ୍ ଓ ଭାରତ- ଅଷ୍ଟ୍ରେଲିଆ ସିରିଜ ସହିତ ଟି୨୦ ବିଶ୍ୱକପ୍ ଏକା ସମୟରେ ପଡୁଛି। ତେଣୁ ବିଶ୍ୱକପ୍ ଆୟୋଜନ ହେବନାହିଁ ବୋଲି ଇଞ୍ଜାମାମ୍ ରବିବାର ତାଙ୍କ ୟୁଟ୍ୟୁବ୍ ଚ୍ୟାନେଲରେ କହିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ବହୁତ ଶକ୍ତିଶାଳୀ ଓ ଆଇସିସିକୁ ନିଜ ନିୟନ୍ତ୍ରଣରେ ରଖିଛି। ଯଦି ମହାମାରୀ କାରଣରୁ ଅଷ୍ଟ୍ରେଲିଆ ବିଶ୍ୱକପ୍ ଆୟୋଜନ ନେଇ ଅକ୍ଷମତା ପ୍ରକାଶ କରେ ତା’ହେଲେ ଆଇପିଏଲ୍ ପାଇଁ ବାଟ ଖୋଲିଯିବ ଓ ଏହାକୁ ସମସ୍ତେ ଗ୍ରହଣ କରିବେ। କିନ୍ତୁ ଏପରି ହେଲେ ପ୍ରଶ୍ନବାଚୀ ସୃଷ୍ଟି ହେବ ସେ ସ୍ପଷ୍ଟ କରିଛନ୍ତି।
ଇଞ୍ଜାମାମ୍ ପାକିସ୍ତାନ ପାଇଁ ୧୨୦ଟି ଟେଷ୍ଟ ଖେଳି ୮୮୩୦ ରନ ଓ ୩୭୮ ଦିନିକିଆ ଖେଳି ୧୧,୭୩୯ ରନ ସଂଗ୍ରହ କରିଛନ୍ତି। ଯଦି ୧୨ରୁ ୧୪ଟି ଦଳକୁ ନେଇ ଆଇପିଏଲ ଭାରତରେ ଖେଳାଯାଇପାରେ ତା’ହେଲେ ଅଷ୍ଟ୍ରେଲିଆ ଭଳି ଉନ୍ନତ ଦେଶରେ ବିଶ୍ୱକପ୍ କାହିଁକି ଆୟୋଜନ ହୋଇପାରିବ ନାହିଁ ବୋଲି ସେ ପ୍ରଶ୍ନ ପଚାରିଛନ୍ତି। ପୁଣି ଯଦି ଏପରି ହୁଏ ତେବେ ଯୁବ କ୍ରିକେଟରମାନେ ଅନ୍ତର୍ଜାତୀୟ କ୍ରିକେଟ ନ ଖେଳି ଘରାଇ ଲିଗ୍ ଖେଳିବାକୁ ଅଧିକ ପସନ୍ଦ କରିବେ ଓ ଏହା କ୍ରିକେଟ ପ୍ରତି ବିପଦ ଦୃଷ୍ଟି କରିବ ସେ ସତର୍କ କରାଇ ଦେଇଛନ୍ତି। ତେବେ ବର୍ତ୍ତମାନର ପରିସ୍ଥିତିରେ ଟି୨୦ ବଶ୍ୱକପ୍ ଆୟୋଜନ କରିବା ଆଦୌ ସହଜ ନୁହଁ ବୋଲି ସେ ସ୍ବୀକାର କରିଛନ୍ତି। ସେହିପରି ସେପ୍ଟେମ୍ବରରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ର ଭାଗ୍ୟ କ’ଣ ହେବ ତାହା କେହି କହିପାରିବେ ନାହିଁ ବୋଲି ସେ କହିଛନ୍ତି। ପାକିସ୍ତାନ କ୍ରିକେଟ ବୋର୍ଡ (ପିସିବି) ନିରାପତ୍ତା କାରଣରୁ ଏହାକୁ ନିରପେକ୍ଷ ଦେଶରେ ଆୟୋଜନ କରିବାର କାର୍ଯ୍ୟକ୍ରମ ରହିଛି।
