ନୂଆଦିଲ୍ଲୀ,୨୧।୭(ପି.ଟି.): ବିକାଶ ଦୁବେଙ୍କ ଭଳି ଗ୍ୟାଙ୍ଗ୍ଷ୍ଟରଙ୍କୁ ଜାମିନ ମିଳିବା ସଂସ୍ଥାଗତ ବିଫଳତା ବୋଲି ସୋମବାର ସୁପ୍ରିମକୋର୍ଟ କହିଛନ୍ତି। ଗ୍ୟାଙ୍ଗଷ୍ଟର ଏନ୍କାଉଣ୍ଟର ଘଟଣାର ତଦନ୍ତ ପାଇଁ ଗଠିତ କମିଟିରେ ସୁପ୍ରିମକୋର୍ଟର ଜଣେ ପୂର୍ବତନ ବିଚାରପତି ଏବଂ ଜଣେ ଅବସରପ୍ରାପ୍ତ ପୋଲିସ ଅଧିକାରୀଙ୍କୁ ନେବା ଲାଗି ସର୍ବୋଚ୍ଚ ଅଦାଲତ ଉତ୍ତରପ୍ରଦେଶ ସରକାରଙ୍କୁ ପରାମର୍ଶ ଦେଇଛନ୍ତି।
ଅନେକ ଜଘନ୍ୟ ଅପରାଧରେ ସମ୍ପୃକ୍ତ ଗ୍ୟାଙ୍ଗ୍ଷ୍ଟର ଦୁବେ ଜେଲ୍ରେ ରହିବା କଥା। ସେ କିପରି ଜାମିନରେ ବାହାରିଥିଲେ ବୋଲି ପ୍ରଧାନ ବିଚାରପତି ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ପ୍ରଶ୍ନ କରିଥିଲେ। ଖଣ୍ଡପୀଠରେ ଜଷ୍ଟିସ୍ ଏ.ଏସ୍. ବୋପାନ୍ନା ଏବଂ ଭି. ରାମସୁବ୍ରମଣ୍ୟନ ରହିଛନ୍ତି। ଏତେ ସଂଖ୍ୟାରେ ମାମଲା ସତ୍ତ୍ୱେ ଦୁବେଙ୍କୁ ଜାମିନ ମିଳିବା ଘଟଣା ଆମକୁ ବିସ୍ମିତ କରିଛି ବୋଲି ଖଣ୍ଡପୀଠ କହିବା ସହ ଆଇନର ଶାସନ ବଜାୟ ରଖିବା ପାଇଁ ଉତ୍ତରପ୍ରଦେଶ ସରକାରଙ୍କୁ କହିଥିଲେ। ଏହା ଉପରେ ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀ କୌଣସି ମନ୍ତବ୍ୟ ଦେଇଥିଲେ କି ଏବଂ ଏହାକୁ ଅନୁସରଣ କରାଯାଇଥିଲା କି ନାହିଁ ବୋଲି ୟୁପି ସରକାରଙ୍କ ପକ୍ଷରୁ ଉପସ୍ଥିତ ଥିବା ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ସର୍ବୋଚ୍ଚ ଅଦାଲତ ପ୍ରଶ୍ନ କରିଥିଲେ।
ଗ୍ୟାଙ୍ଗ୍ଷ୍ଟର ଦୁବେ ଓ ତାଙ୍କ ସହଯୋଗୀମାନଙ୍କ ଏନ୍କାଉଣ୍ଟର ଘଟଣାର ତଦନ୍ତ ଅଦାଲତଙ୍କ ତତ୍ତ୍ୱାବଧାନରେ କରାଯିବାକୁ ନିର୍ଦ୍ଦେଶ ଦେବା ଲାଗି ଦାଏର ଏକାଧିକ ପିଟିଶନର ଶୁଣାଣି କରି ଖଣ୍ଡପୀଠ କହିଥିଲେ ଆଇନର ଶାସନ ବଜାୟ ରଖିବା ରାଜ୍ୟର ଦାୟିତ୍ୱ। ଦୁବେ ମାମଲାଗୁଡ଼ିକର କୋର୍ଟ ରାୟର ରିପୋର୍ଟ ମାଗିଥିଲେ ଖଣ୍ଡପୀଠ। ତଦନ୍ତ କମିଟିରେ ସୁପ୍ରିମକୋର୍ଟର କାର୍ଯ୍ୟକାରୀ ବିଚାରପତିଙ୍କୁ ନିୟୋଜିତ କରିବା ସମ୍ଭବ ହେଉ ନୁହେଁ। ତଦନ୍ତ କମିଟିରେ ପରିବର୍ତ୍ତନ ପାଇଁ ଅଦାଲତ ପ୍ରସ୍ତାବ ଦେବା ସହ ୨୨ ତାରିଖ ସୁଦ୍ଧା ରାଜ୍ୟ ସରକାର ଏନେଇ ଏକ ଚିଠା ସଂକଳ୍ପନାମା ଦାଖଲ କରିବାକୁ କହିଥିଲେ। ୟୁପି ସରକାର ତାଙ୍କ ସତ୍ୟପାଠରେ କହିଥିଲେ, ଗ୍ୟାଙ୍ଗଷ୍ଟର ଏନ୍କାଉଣ୍ଟର ଘଟଣାର ତଦନ୍ତ ଲାଗି ହାଇକୋର୍ଟର ପୂର୍ବତନ ବିଚାରପତି ଜଷ୍ଟିସ୍ ଶଶିକାନ୍ତ ଅଗ୍ରଓ୍ବାଲଙ୍କୁ ନେଇ ଜଣିକିଆ ତଦନ୍ତ କମିଶନ ଗଢ଼ାଯାଇଛି।
ସୂଚନାଯୋଗ୍ୟ ଜୁଲାଇ ୩ ତାରିଖରେ କାନପୁରର ଚୌବେପୁର ଅନ୍ତର୍ଗତ ବିକ୍ରୁ ଗ୍ରାମରେ ପୋଲିସ ଚଢ଼ାଉ କରିବାକୁ ଯାଇଥିବାବେଳେ ବିକାଶ ଦୁବେ ଓ ତାଙ୍କ ଲୋକମାନେ ଅତର୍କିତ ଆକ୍ରମଣ କରିବାରୁ ଡିଏସ୍ପି ଦେବେନ୍ଦ୍ର ମିଶ୍ରଙ୍କ ସମେତ ୮ ପୋଲିସ ନିହତ ହୋଇଥିଲେ। ୧୦ ତାରିଖ ଭୋର ସମୟରେ ଦୁବେଙ୍କୁ ଉଜ୍ଜୟିନୀରୁ କାନପୁର ଅଣାଯାଉଥିବାବେଳେ କାର୍ ଦୁର୍ଘଟଣାର ସୁଯୋଗ ନେଇ ସେ ଖସିପଳାଇବାକୁ ଉଦ୍ୟମ କରୁଥିବାବେଳେ ଏନ୍କାଉଣ୍ଟରରେ ନିହତ ହୋଇଥିଲେ ବୋଲି ପୋଲିସ କହିଥିଲା। ଦୁବେଙ୍କ ପୂର୍ବରୁ ତାଙ୍କର ୫ ଜଣ ସହଯୋଗୀଙ୍କୁ ପୋଲିସ ଏନ୍କାଉଣ୍ଟରରେ ହତ୍ୟା କରିଥିଲା।
