ନୂଆଦିଲ୍ଲୀ, ୧୧।୧: ବ୍ରେନ୍ ଡେଡ୍ ଘୋଷିତ ହୋଇଥିବା ଜଣେ ୯୨ ବର୍ଷୀୟ ବୃଦ୍ଧ ମୃତ୍ୟୁ ପୂର୍ବରୁ ନିଜର ଲିଭର ଓ କିଡ୍ନୀ ଦାନ କରି ଜଣେ ୫୬ ବର୍ଷୀୟା ମହିଳାଙ୍କ ଜୀବନ ବଞ୍ଚାଇଛନ୍ତି। ଫଳରେ ଅମ୍ରିତ୍ ଲାଲ୍ ବୁଧରାଜା ଅଙ୍ଗଦାନ କରିବାରେ ବିଶ୍ୱର ସବୁଠୁ ବୟସ୍କ ବ୍ୟକ୍ତିର ପରିଚୟ ହାସଲ କରିଛନ୍ତି। ସେ ରିସର୍ଚ୍ଚ ଆଣ୍ଡ ଆନାଲିସିସ୍ ଓ୍ବିଙ୍ଗ୍ର ଜଣେ ଅବସରପ୍ରାପ୍ତ ଅଫିସର। ଅମ୍ରିତ୍ ସୁସ୍ଥ ଓ ଶାରୀରିକ ଭାବେ ସକ୍ରିୟ ଥିଲେ। ଜାନୁୟାରୀ ୫ରେ ଦୁର୍ବଳତା ଅନୁଭବ କରିବାରୁ ତାଙ୍କୁ ସାକେତ୍ର ମାକ୍ସ ସୁପର ସ୍ପେଶିଆଲିଟି ହସ୍ପିଟାଲରେ ଭର୍ତ୍ତି କରାଯାଇଥିଲା। ପରୀକ୍ଷାରୁ ତାଙ୍କ ମସ୍ତିଷ୍କର ବ୍ଲଡ୍ ଭେସେଲ୍ରୁ ରକ୍ତ କ୍ଷରଣ ହେଉଥିବା ଜଣାପଡ଼ିଥିଲା। ଅସ୍ତ୍ରୋପଚାର ସତ୍ତ୍ୱେ ତାଙ୍କ ସ୍ବାସ୍ଥ୍ୟାବସ୍ଥା ଅଧିକ ଖରାପ ହେବାରୁ ୭ ତାରିଖରେ ଡାକ୍ତର ତାଙ୍କୁ ବ୍ରେନ୍ ଡେଡ୍ ଘୋଷଣା କରିଥିଲେ। ପରିବାର ଲୋକେ ତାଙ୍କ ଅଙ୍ଗଦାନ କରିବାକୁ ଆଗ୍ରହ ପ୍ରକାଶ କରିବା ପରେ ଲିଭର, କିଡ୍ନୀ ଓ ଅନ୍ୟାନ୍ୟ ଅଙ୍ଗ ସଂଗ୍ରହ କରାଯାଇଥିଲା।
